"Ədalət bəyin haqqımda dedikləri cəfəngiyat, bəhanə və böhtandı. Məni topları mənimsəməkdə ittiham edir. Adama demək lazımdı ki, biz o topları nə saymışıq, nə də yemişik. Komandamızın məşqi üçün lazım olan vəsaitlərin hamısı yerindədi. Ortada qoyası deyilik. Məşq olmayanda da onların yeri anbardı.

Bu insanın mənimlə sözü iki səbəbdən çəp gəldi. Əvvəla, hər şeyə müdaxilə edərək, bizim fikrimizi nəzərə almadan öz bildiklərini etdi. İkincisi, qapıçımıza qörə mənimlə yola getmədi. Adam gəldiyi gündən klubun üzvlərindən heç kimə xoş üz, hörmət-ehtiram göstərməyib. Həm Ədalət, həm də gətirdiyi yeni məşqçi özlərini ağa sayır. Komandaya yaxşı qapıçı gətirmişdim. Bizə çox köməyi də dəyib. Özü də, demək olar, havayı oynayır. Söhbət 1994-cü il təvəllüdlü Taleh Əsədovdan gedir. Vaxtlə AZAL-da, “Keşlə”də oynayıb. Son klubu Region Liqasında "Mil Muğan" olub. Ədalətin gətirdiyi məşqçinin ilk gündən onu “gözü götürmədi” və tezliklə komandadan göndərdilər. Mən də onlara dəfələrlə müraciət etdim ki, bu hərəkətin yeri yoxdu, o qapıçının bizə çox köməyi dəyib və adam, demək olar, pulsuz oynayır. Bu yanaşmam ona xoş gəlmədi və başladı prinsip aparmağa. Ədalət və onun gətirdiyi məşqçini gözümçıxdıya salmaq niyyətimiz yox idi. Düşünürdü ki, onların gəlişiylə komandanın maliyyə şərtləri yaxşılaşacaq. Amma adam gedib loqomuzu dəyişib, yeni hesab və MMC açdıraraq klubun adına müdaxilə edib. Ədalətə dönə-dönə demişdim ki, təşkilati işlərinizə qarışan yoxdu, biz Saatlı təmsilçisinin peşəkarlaşmasını istəyirik. Amma keçmişi dağıtmaq, burda əziyyət, zəhmət çəkən şəxslərin işini yerə vurmaq düz deyil. Xəyal müəllim və atası bu komandanı min bir əziyyətlə formalaşdırıb, bu günə qədər gətirib. 2018-ci ildən komandadayam. Çox zəhmət çəkərək "Araz"ı inkişaf etdirmişik. İndi kənardan gələn biri hər şeyi öz adına çıxır, illərlə klub üçün əzab-əziyyət çəkən, tər tökənlərə hörmətsizlik edir. Mömin adamam, heç kimə də dəyib-dolaşan deyiləm. Amma bu qədər haqsızlığa susmaq da düz deyil".