Hesabda üstün olan komanda 2-ci hissəyə çıxmadı
Dünən Yeni Zelandiya ilə Qətər arasında baş tutan yoldaşlıq görüşü qalmaqalla yekunlaşdı.
Oyun Avstriyada keçirilirdi. İlk yarıdan sonra Yeni Zelandiya 1:0 hesabı ilə öndə idi. Ancaq bu komanda müdafiəçi Maykl Boksollun ilk yarıda dəfələrlə rəqib oyunçu tərəfindən irqçi təhqirlərə məruz qaldığını iddia edərək ikinci hissəyə çıxmaqdan imtina etdi! Komandanın rəsmi bəyanatında bu sözlər qeyd olunub:
''Maykl Boksoll ilk hissədə Qətər yığmasının bir oyunçusu tərəfindən irqçi təhqirlərə məruz qaldı. Hakimlər tərəfindən bu məsələ ilə bağlı heç bir tədbir görülmədi. Ona görə də Yeni Zelandiyanın oyunçuları öz aralarında razılığa gələrək ikinci hissəyə çıxmaqdan imtina etdilər''.
Qeyd edək ki, ilk yarıda yeganə qolu ''Kopenhagen''in futbolçusu Marko Stameniç vurmuşdu. Görüşün hakimi isə avstriyalı Manuel Şuttenqruber idi. Hələ ki, hesab olduğu kimi qalıb. Amma FİFA-nın bu matçın aqibəti ilə bağlı nə qərar verəcəyi bilinmir.
ƏLİ RAUFOĞLU
Digər xəbərlər
