Bilet satışı ürəkaçan deyil
Azərbaycan - Estoniya görüşünün biletləri mayın 17-dən satışa çıxarılıb. Artıq matça iki gün qalır.
Görəsən, Canni de Byazinin taleyini müəyyənləşdirmək baxımından xüsusi önəm daşıyan qarşılaşmanı nə qədər azarkeş stadiondan izləmək istəyir? Bilet satışı necə gedir? 6700 azarkeş tutumuna malik “Dalğa Arena” dolacaqmı?
Bu sualları AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdullaya ünvanladıq:
“Bilet satışı davam edir. Son məlumata əsasən, 2000-dən artıq bilet satılıb. Dəqiq rəqəmlər isə sabah axşam bəlli olacaq”.
Xatırladaq ki, biletlər üç kateqoriyaya bölünüb. 1-ci kateqoriya 5, 2-ci kateqoriya 2, VIP üçün isə 10 manat nəzərdə tutulub. Biletləri “28 Mall”, “Gənclik Mall”, Heydər Əliyev Sarayı, Köşk №1, Köşk №2, 1 saylı ASAN Xidmət, 2 saylı ASAN Xidmət, 3 saylı ASAN Xidmət, 4 saylı ASAN Xidmət və Sumqayıt ASAN Xidmətində əldə etmək mümkündü.
KƏNAN BAHADIR
