“Həmin oyun indiki kimi yadımdadı. Çox maraqlı və gərgin qarşılaşma olmuşdu. Samir Mənsimovun vurduğu qolun ötürməsini də mən vermişdim. Sevindirici hal idi ki, o mövsüm kubok “Neftçi”nin oldu. Bu matça gəlincə, hər iki klubun uğursuz mövsüm keçirdiyini düşünürəm. Daha yuxarı pillələrdə qərarlaşa bilərdilər. “Qəbələ” həmişə ilk “üçlük” uğrunda mübarizə aparıb. Qəbələ futbolu önəmli tarixə malikdi. “Neftçi”nin isə liderliyinə öyrəşmişdik. Bu dəfə eniş-yoxuşlu yollardan keçdilər.

Ümid edirəm ki, növbəti mövsümdə etimadı daha yaxşı nəticələrlə doğruldacaqlar. İstərdim ki, mənim üçün doğma olan “Neftçi” kuboku qazansın. Qəlbim hələ də o klubla döyünür. Bilirəm, asan olmayacaq. Çünki rəqib üçün də eyni dərəcədə vacib oyundu. Hər iki komandaya uğurlar arzulayıram. Bizi futbol tarixində iz qoyacaq, rəqabətin yüksək olacağı matç gözləyir”.