Klublar Geryenin maaşını vaxtında ödəyib - AÇIQLAMALAR
"Zirə”nin futbolçusu Vild-Donald Gerye məhkəməyə verilib.
"Football-plus.az" xəbər verir ki, İqtisadiyyat Nazirliyi yanında Dövlət Vergi Xidməti Bakı Şəhəri Kiçik Sahibkarlıqla İş üzrə Baş İdarəsi futbolçu ilə bağlı məhkəməyə müraciət edib.
İş Bakı Kommersiya Məhkəməsinin hakimi Aytən Əliyevanın icraatındadı. Ərizədən məlum olur ki, Geryenin vergi borcu var və onun ölkədən çıxmaq hüququnun müvəqqəti məhdudlaşdırılması xahiş olunur. İşə xüsusi icraat qaydasında baxılacaq.
Maraq üçün qeyd edək ki, Vild-Donald Gerye uzun illərdi Azərbaycanda çıxış edir. O, 2017-ci ildə Türkiyə "Alanyaspor"undan "Qarabağ"a transfer olunub. 2019-da "Neftçi"yə keçən haitili futbolçu bir il sonra yenidən "Qarabağ"a qayıdıb. 2021-də ölkəmizi tərk edən 34 yaşlı müdafiəçi bu ilin yanvarında Cənubi Kipr "Olimpiakos"unu tərk edərək, "Zirə" ilə müqavilə bağlayıb.
Görəsən, haitili futbolçu dövlətə niyə borcludu? Problem hardan qaynaqlanıb? Gerye bu məsələni necə həll edəcək? Problemlə bağlı bütün suallarımızı “Zirə”nin futbolçusuna ünvanladıq:
“Mənim heç bir borcum yoxdu. Həm “Neftçi”, həm də “Qarabağ” müqaviləmdə göstərilən bəndə əsasən vergi məsələlərimi həll edib. Bu həftə qeyd olunan məsələni dəqiqləşdirəcəm”.
Bildiyiniz kimi, bir-iki aylıq vergi borcuna görə hansısa şəxs məhkəməlik olmur. Deməli, problem “Zirə”dən qaynaqlanmır. Bu borc köhnədən qalmadı. Görəsən, “Neftçi”də və ya “Qarabağ”da çıxış edərkən vergi ödənişlərində problem yaşanıbmı? Məsələ ilə bağlı suallarımızı hər iki klubun nümayəndəsinə ünvanladıq. “Qarabağ”ın mətbuat xidmətinin rəhbəri Gündüz Abbaszadə bunları söylədi:
“Biz vaxtında Geryenin təqdim etdiyi hesaba ödənişini etmişik. “Qarabağ”da çıxış etdiyi dövrdə hansısa problem olmayıb”.
“Neftçi”nin Media Marketinq Departamentinin rəhbəri Rüstəm Allahverdiyev də Geryenin ödənişlərində hansısa səhə yol vermədiklərini dilə gətirdi:
“Vild-Donald Geryeyə borcumuz olsaydı, haitili futbolçu çoxdan “Neftçi”dən FİFA-ya şikayət ünvanlamışdı. Belə bir hal baş verməyib. Deməli, problem bizdən qaynaqlanmır”.
Bəs bu məsələ necə ortaya çıxıb? Geryenin Azərbaycan dövlətinə necə borcu yaranıb? Məsələ ilə bağlı redaksiyamıza yeni informasiya daxil olub. Ümumiyyətlə, Azərbaycandakı klublar əcnəbi və yüksəködənişli yerli futbolçuların ödənişlərini VÖEN əsasında həyata keçirir. Daha sonra oyunçular öz vergi məsələlərini həll etməli olur. Burda bir məsələ var ki, klublar futbolçuların müqaviləsində qeyd olunan məbləğdən əlavə vergisini də hesaba köçürür. Yəni başverənlər hansısa klubun yox, Vild-Donald Geryenin problemidi.
İLKİN SULTANLI
Digər xəbərlər
