“Çelsi”nin 2021/22 mövsüm üçün maliyyə hesabatı açıqlanıb.

"Football-plus.az" xəbər verir ki, nəticə heç də ürəkaçan deyil.

London klubu 2022-ci il iyunun 30-da başa çatan maliyyə ilində 100 milyon funt sterlinqdən çox itki ilə üzləşib. Rəsmi məlumata görə, “Çelsi”nin sabiq sahibi Roman Abramoviçə qarşı tətbiq edilən sanksiyalar “fövqəladə xərclərə və mənfəətin azalmasına” təsir edib.

Klub İngiltərə hökuməti tərəfindən verilmiş xüsusi lisenziya əsasında fəaliyyət göstərməli idi. Klub bir sıra sahələrdə, o cümlədən biletlərin, abunə biletlərinin və müxtəlif məhsulların satışı ilə bağlı məhdudiyyətlərə məruz qalıb və tədbirlər üçün sifarişləri qəbul edə, həmçinin oyunçular və sponsorlarla müqavilə bağlaya bilməyib.

Kluba qoyulan məhdudiyyətlərə baxmayaraq, ümumi gəlir 434,9 milyon funt sterlinqdən 481,3 milyona yüksəlib. Mal və ya xidmətlərin satışından əldə edilən gəlir 177,1 milyon funt sterlinqə çatıb.

Klub 2021/22 mövsümündə əsas komandanın heyətinə 118 milyon funt sterlinq sərmayə qoyub və oyunçu satışından 123,2 milyon funt sterlinq qazanıb. Londonluların ümumi zərəri isə 121,3 milyon funt sterlinq olub.

Bu qədər itkiyə və sanksiyalara görə əməliyyat problemlərinə baxmayaraq, “Çelsi” UEFA və Premyer-Liqanın “maliyyə feyr-pleyi” qaydalarına əməl edib. Ona görə də komandanın daxili yarışlarda və avrokuboklarda iştirakına qadağa qoyulması ilə bağlı təhlükə ortaya çıxmayıb.