Belə bir atalar sözümüz var: “əlindən bir iş gəlməyən on danışar”.

Bu el məsəli tam milli komandamızın baş məşqçisi Canni de Byazinin əyninə biçilib. Adamın CV-sinə baxırsan, mat-məəttəl qalırsan ki, Albaniya millisinə necə Avropa çempionatının final mərhələsinə vəsiqə qazandırıb? Yadınıza salım ki, orda da bəxti gətirib. Niyə? UEFA elə Albaniya ilə oyunda Serbiya millisinə texniki məğlubiyyət verdiyi üçün De Byazinin rəhbərlik etdiyi komanda AÇ-yə vəsiqə qazandı. Digər işlədiyi yerlərdə isə olduqca uğursuz olub. İtaliyalının maksimumu hansısa komandanı Millətlər Liqasında ikinci etməkdi. Daha yaxşısına indiki halda gücü çatmır.

Nəyə görə düşünürəm ki, De Byazinin əlindən bir iş gəlmir? İzah edim. Adam premyer-liqanın bütün oyunlarına gedir, futbolçuları izləyir. Görüşlərdə köməkçiləri ilə müntəzəm nələrisə danışdığını görürük. Amma ortaya çıxardığı işə baxaq. Adam sanki futbolçuların durumundan xəbərdar deyil. Bir aydı “Sabah”da oynamayan, zədəsini millinin düşərgəsində tam sağaldan Bəxtiyar Həsənalızadəni ilk “11-lik”də meydana buraxmaq italiyalının danışmaqdan başqa nəsə etmədiyinin bariz nümunəsidi.

Görmüşük ki, 0:5 uduzan komandanın baş məşqçinin oyundan sonra ilk fikri üzr istəmək olur. Lakin De Byazi mətbuat konfransında deyir ki, əla oynadıq. “İlk 37 dəqiqəni yaxşı çıxış etdik, lakin sonradan hər şey bərbad oldu” desəydi, onunla razılaşardım. Amma “əla oynadıq”, - deyə fikir səsləndirmək məzələnməkdi. Bəli, italiyalı mırt tutur. Azərbaycan futbol ictimaiyyətini ələ salır, AFFA rəhbərliyini, futbolçuları məzə obyektinə çevirir. Bunun başqa adı yoxdu.

Buna kimsə “dur” deməlidi. Təbii ki, söz sahibi AFFA rəhbərliyi və İcraiyyə Komitəsidi. Orda yer alanlar italiyalının başa salmalıdı ki, bu ölkədə futboldan anlayışı olan yetərincə insan var. Onlar nəyin yaxşı, nəyin pis olduğunu bilirlər. Biz futboldan heç anlayışı olmayan ölkə deyilik. Azərbaycan klub səviyyəsində son 10 ildə müntəzəm Avropa səviyyəli turnirlərdə iştirak edir. 8 il öncə hətta iki komandamız Avropa Liqasının qrup mərhələsində mübarizə aparıb. “Qarabağ” iki mövsümdü Konfrans Liqasının pley-offuna vəsiqə qazanır. Orda çıxış edənlərin əksəriyyəti azərbaycanlılardı. Güvəndiyi Ramil Şeydayev, Elvin Cəfərquliyev, Musa Qurbanlı, Riçard Almeyda, Filip Ozobiç, Toral Bayramov, Bəhlul Mustafazadə Ağdam təmsilçisinin əsas üzvləridi. Onlar öz komandaları ilə iki ildi tarix yazırlar. Necə olur ki, “Qarabağ”ın matçlarında Avropa səviyyəli kollektivlərlə oynamağa gücləri çatır, amma millidə yox? Azərbaycanlı məşqçi Qurban Qurbanov bu futbolçulardan yaxşı komanda, ilk “11-lik” formalaşdıra bilir, amma Albaniya millisi ilə AÇ-yə vəsiqə qazanan De Byazi yox? İtaliyalı yuxarıda qeyd olunan 7 futbolçunun hamısını meydana buraxsaydı, kimsə ona nəsə deyəcəkdi? Yox! Hətta yığma daha keyfiyyətli oyun nümayiş etdirəcəkdi. De Byazi və onun müdafiəçiləri söyləyə bilər ki, “Qarabağ”ın heyətində keyfiyyətli legionerlər var, uğur qazanmalarının sirri budu. Yalandı! Tutaq ki, yuxarıda qeyd etdiyim futbolçuların hamısı ilk “11-lik”də yer aldı. Qalır cəmi 4 futbolçu. Müəyyən qədər qapıda problem ola bilər ki, bununla razıyam. Millimiz son iki oyunda bu baxımından əziyyət çəkdi. Bəs qalan 3 seçim? “Qarabağ”ın legionerləri Emin Mahmudovdan iki-üç baş üstündülər? Qara Qarayev və Julio Romao Eddi İsrafilovdan çox güclüdü? Marko Veşoviç Azər Əliyevi və ya Höccət Haqverdini çox şeydə qabaqlayır? Bu sualların hamısının cavabı “yox”du.
İndi milli üçün ilk “11-lik” formalaşdıracam. Elə De Byazinin istifadə etdiyi sxemdən yararlanacam. Qapıda Səlahət Ağayev dayansa, müdafiənin solunda Elvin Cəfərquliyev, mərkəzində Anton Krivotsyukla Bəhlul Mustafazadə, sağında Höccət Haqverdi yer alsa, Eddi İsrafilov və Riçard Almeyda dayaq yarımmüdafiəçisi kimi çıxış etsə, Emin Mahmudov pleymeykerlik etsə, Toral Bayramovla Ramil Şeydayev əks istiqamətlərdə vinger olsa, hücumda Musa Qurbanlı qərarlaşsa, Avstriya və İsveç millisi ümumilikdə Azərbaycana 9 qol vura bilərdi? Təbii ki, yox! Hər iki oyunda məğlub da ola bilərdik. Amma belə biabırçılıq yaşanmayacaqdı. Təbii ki, De Byazi də bunu edə bilərdi. Amma etmədi. Niyəsini bilmirəm. Ola bilər ki, “Qarabağ”ın uğurlarının fonunda komanda formalaşdırmaq istəmir. Ya da həqiqətən bu haqda düşünə bilmir. Bildiyimiz bir şey var ki, De Byazi Azərbaycan millisində danışmaqdan başqa heç nə edə bilmir.

İLKİN SULTANLI