Azərbaycan futbolunda yenilik olanda hamı sevinir.

Düşünürük ki, ölkədə bu idman növü az da olsa, inkişafa doğru irəliləyəcək. Amma ümidlərimiz həmişə qırılır. Məsələn, VAR! Bu sistem ölkəmizə gəlməmiş hamı düşünürdü ki, cari mövsümdən hakim səhvlərinin sayı azalacaq və tədricən yox olacaq. Amma VAR premyer-liqada istifadə olunandan sonra hakimlərin özünəinamı azalıb. Referilər daha lazımi məqamlarda dəqiq qərarları VAR-da oturanların verməsini istəyir.

Gəlin bir müddət əvvələ qayıdaq. Çox uzağa yox, mövsümün əvvəlinə dönək. Əliyar Ağayev, Rauf Allahverdiyev, Elçin Məsiyev, Rauf Cabbarov, Rəşad Əhmədov kimi hakimlər tez-tez bu sistemə müraciət etmirdi. Qətiyyətlə özləri son və dəqiq qərarı verirdilər. Lakin qış fasiləsindən sonra bu yöndə dəyişiklik baş verdi. Gəlin penaltilərə və mübahisəli epizodlara nəzər yetirək. 3-cü dövrənin oyunlarının 90 faizində ən dəqiq qərarları VAR hakimləri verib. Buna uyğun 2-3 nümunə çəkə bilərəm. Çox səhvə yol verməyim deyə son iki həftədə reportyor kimi iştirak etdiyim oyunlardan nümunə çəkəcəm. 25-ci turun "Qəbələ" - "Qarabağ" (1:3) görüşündə Kamal Umudlunun oyunu necə idarə etdiyini hamımız gördük. Referi 3 penalti, 1 qol epizodunda özü qərar verə bilmədi. Rəşad Əhmədov olmasaydı, bəlkə də Azərbaycan futbolu tarixində ən biabırçı idarəçilik olacaqdı. Matçın 65-ci dəqiqəsində top cərimə meydançasında Murad Musayevin əlinə dəydi. Müdafiəçi həmin an dayandı ki, hakim penalti təyin edəcək. Amma Kamal Umudlu davam işarəsi verdi. Rəşad Əhmədovun müdaxiləsindən sonra Ramil Şeydayev topun arxasına keçərək dublunu rəsmiləşdirdi. Elə həmin oyunda top Elvin Cəfərquliyevin əlinə dəyməsə də, Umudlu “nöqtə”ni göstərdi. Lakin VAR hakimi növbəti dəfə referini səhv çıxardı.

"Kəpəz" - "Zirə" matçında yaşananları bilirsiz. Bütün ölkə deyir ki, Kamranbəy Rəhimov səhv qərar verib. Əminəm ki, həmin epizoda VAR müdaxilə etsəydi, doğru qərar veriləcəkdi. "Turan Tovuz" - "Qəbələ" matçında da 2 qolun qeydə alınmasının səbəbkarı, demək olar ki, VAR oldu. Çünki Rauf Cabbarov 11 metrlik cərimə zərbəsini qeydə almamışdı, qonaqların oyundankənar vəziyyətdən qol vurduğunu bildirmişdi. Lakin VAR-da əyləşən Cavid Cəlilov hər iki qərarın səhv olduğunu bildirdi.

Nümunələri çoxaltmaq da olar. Amma ümumi fikir eynidi. Sanki VAR gələndən sonra hakimlərin qətiyyəti azalıb. Ya da onlar səhv etməmək üçün epizodları yanlış dəyərləndirir. Hə, bir də 3-cü dövrədə keçirilən görüşlərin 50 faizindən çoxunda Cavid Cəlilov VAR hakimi olub. Bu olduqca maraqlı məqamdı. O da maraqlıdı ki, Cəlilov VAR-da olmasaydı, referilərin səhv qərarları ucbatından komandaların haqqı yeyiləcəkdi. Bir sözlə, Cavid Cəlilov Azərbaycan futbolunda oyunların taleyini həll edir. Bu həm gülməli, həm də ağlamalı məqamdı.

İLKİN SULTANLI