Braziliya Futbol Konfederasiyası (BFK) irqçiliklə mübarizəni gücləndirəcək. Təşkilatın Şurasının son iclasında bu planda bir sıra qərarlar qəbul edilib.

Football-plus.az xəbər verir ki, BFK azarkeşlərin irqçi davranış və hərəkətlərə əl atmasına görə veriləcək cəzaları bayrağı altında keçirilən turnirlərin reqlamentinə daxil edəcək. Yerli liqalarda mübarizə aparan komandaların müxtəlif sanksiyalara məruz qalacağı reqlamentdə əksini tapacaq. İrqçiliklə bağlı hallara görə nəzərdə tutulan ən kiçik cəza 500 min real (təxminən 90 min dollar) olacaq. Bu cəza ilk belə hala görə tətbiq olunacaq. İkinci halda komanda növbəti ev oyununu tamaşaçısız keçirəcək. Klubların nümayəndələri və azarkeşləri irqçi hərəkət və davranışları bir daha təkrarlayarsa, BFK həmin komandaları hesabından xal silməklə cəzalandıracaq. Klub nümayəndələri, məşqçilər və oyunçuların ala biləcəyi cəzanın kəmiyyət göstəricisi isə 5-10 oyunluq kənarlaşdırılma ilə bağlı olacaq.

Qeyd edək ki, Braziliyada indiyədək bu kimi yolverilməz hallar İdman Məsələləri üzrə Ali Məhkəmə tərəfindən tənzimlənirdi. Bu məhkəmə müvafiq İdman Məcəlləsinə əsasən sanksiyalar verirdi. BFK-nın yeni reqlament ən yüksək divizionda – A seriyasında mübarizə aparacaq 20 klub tərəfindən təsdiqlənib. Yeni qaydalar artıq fevralın 22-dən qüvvəyə minib. Onu da qeyd edək ki, BFK dünyada irqçiliyə görə komandanın hesabından xal siləcək ilk milli federasiyadı.