Belçika təmsilçisi "Gent"in kapitanı Sven Kums Konfrans Liqasının pley-off mərhələsində evdə "Qarabağ"la baş tutacaq cavab oyunu haqda danışıb.

Football-plus.az xəbər verir ki, 35 yaşlı yarımmüdafiəçi klubun rəsmi saytına açıqlamasında vəziyyəti dəyişməyin mümkün olduğunu deyib:

"Siz belə yarışlarda bunu edə bilərsiniz. Hər kəs "Qarabağ"la oyuna çox həvəsli və hazırlıqlı olacaq".

Belçikalı futbolçu həftənin gərgin keçməsinə baxmayaraq, özünü yaxşı hiss etdiyini bildirib:

"Başqalarını deyə bilmərəm,amma mən özümə qulluq edirəm. Nə qədər ki, gücüm var, oynamaq istəyirəm".

Qeyd edək ki, "Qarabağ" Bakıdakı oyunda "Gent"ə 1:0 hesabı ilə qalib gəlib. Sözügedən komandalar arasında cavab görüşü fevralın 23-də Belçikada olacaq və Bakı vaxtı ilə saat 00:00-da başlayacaq.