“Qarabağ”ın Konfrans Liqasının pley-off mərhələsindəki rəqibi olan “Gent”i bir futbolçusu ilə yolları ayırıb.

Belçika klubunun rəsmi saytında yer alan xəbərə görə, yarımmüdafiəçi Elişa Ovusu Fransa “Oser”inə satılıb. Qana millisinin üzvü 2019-cu ilin yayından formasını geydiyi “Gent”lə vidalaşıb. Onun belçikalılarla müqaviləsinin müddəti mövsümün sonuna qədər idi. Fransada anadan olan orta sahə oyunçusu “Lion”un yetirməsidi.

“Gent” əvəzində Polşa millisinin üzvü Kamil Pyatkovskini heyətinə cəlb edib. 23 yaşlı müdafiəçi Avstriya “Zaltsburq”undan icarəyə götürülüb. 2021-ci ildən Polşa millisinə çağrılan mərkəz müdafiəçisi mövsümün sonuna qədər “Gent”in formasını geyəcək.

Vadis Ocica-Ofoe isə “Qarabağ”la oyunları buraxa bilər. Buna səbəb 34 yaşlı kapitanın zədələnməsidi. 20-ci turda “Kortreyk”ə qarşı matçın (2:1) 16-cı dəqiqəsində zədələnərək əvəzlənən Belçika millisinin sabiq yarımmüdafiəçisi dizindən əməliyyat olunub. Onun yaşıl meydanlara nə vaxt qayıdacağı açıqlanmayıb.

Xatırladaq ki, “Qarabağ” "Gent"i fevralın 16-sı, saat 21.45-də Tofiq Bəhramov adına Respublika stadionunda qonaq edəcək. Bir həftə sonra səfərdə keçiriləcək qarşılaşma isə Bakı vaxtı ilə saat 00.00-da start götürəcək.