Premyer-liqa komandaları kimi, 1-ci divizion təmsilçiləri də də mövsümün ikinci yarısının hazırlığını davam etdirir.

Qış fasiləsinə 10-cu pillədə yollanan "Qaradağ Lökbatan"ın baş məşqçisi Səbuhi Həsənov saytımıza açıqlamasında bir neçə futbolçu ilə yolları ayırdıqlarını, onlardan birinin də Fərid Şahhüseynli olduğunu söyləmişdi. Futbolçu divizion komandasından ayrılandan sonra "Səbail-2"yə keçib.

Bu gün isə Fəridin atası, "Neftçi” İK-də məşqçi işləyən Şahin Şahhüseynli redaksiyamıza müraciət etdi. Təcrübəli mütəxəssis Səbuhi Həsənovun açıqlamasının doğru olmadığını bildirdi:

"Fəridə bir neçə təklif gəldi. "Sabah" və "Neftçi"nin U-19, "Səbail"in isə əvəzedici komandasından. Bundan sonra "Qaradağ Lökbatan" rəhbərliyi ilə şəxsən özüm danışdım. Qərara gəldik ki, Fərid bu komandadan ayrılsın və "Səbail-2" ilə anlaşsın. Yəni "Qaradağ Lökbatan"la müqavilə qarşılıqlı razılıq əsasında pozuldu. Fərid həm də millinin oyunçusudu. Amma “Qaradağ Lökbatan”nın heyətində meydana az çıxır. Bu isə onun yığma karyerasına mənfi təsir edir. "Neftçi" və "Sabah"ın məşqçilərinə də təşəkkür edirəm ki, dəyər verib dəvət göndəriblər. Biz isə qərar verdik ki, "Səbail-2"nin təklifiylə razılaşaq. Fəridin hələ 16 yaşı var, karyerası qarşıdadı. Artıq bir həftədən çoxdu yeni komandasının heyətində təlim-məşq toplanışındadı, hətta 2 yoldaşlıq oyununa da çıxıb. Açığı, Səbuhi müəllimin niyə elə açıqlama verdiyini başa düşmədim. Özü ilə də danışdım. Məşqçi mediaya düzgün məlumat verməlidi. Bu uşağın hələ 16 yaşı var, gələcəyi qarşıdadı, amma deyilir ki, yolları ayırdıq. Mənə dedi ki, burda heç bir problem görmür. Mən də demək istəyirəm ki, "Qaradağ Lökbatan" Fəridlə yox, futbolçu özü klubla yolları ayırıb. Bunu faktlarla deyirəm, sübut da edərəm".

ŞAİR ABDULLA