Vidadi Rzayev Azərbaycan futbolunun ən parlaq simalarından biridi.

Yolu ölkənin aparıcı klublarından və milli komandadan keçən mütəxəssis uzun müddətdi “Kəpəz”in məşqçilər korpusunda yer alıb.

Football-plus.az olaraq onunla görüşümüz də komandasının 18-ci turda "Zirə"yə qarşı oyunundan sonra baş tutdu. Rzayevlə fərqli mövzularla bağlı söhbətləşdik.

- Vidadi bəy, çempionatımızın səviyyəsindən razısız?
- Bildiyiniz kimi, xeyli vaxtdan sonra "Kəpəz"lə "Turan Tovuz" elitaya qayıtdı. Bununla qərb bölgəsində yeni səhifə açıldı. Çempionatımızda klubların sayı ilə yanaşı, səviyyənin də artdığını düşünürəm. Hər turda gərgin oyunlar baş tutur. Premyer-liqanın hazırkı səviyyəsindən razıyam. Düşünürəm ki, gələcəkdə çempionatımız daha da inkişaf edəcək.

- Komandanız ilk yarıya "Zirə"yə qarşı oyunla yekun vurdu. Qarşılaşma barədə nə deyə bilərsiz?
- Gərgin və maraqlı oyun alındı. Rəqibin gücü hamıya bəllidi, avrokuboklara vəsiqə uğrunda döyüşən komandadı. Buna rəğmən, "Zirə" 9 nəfərlə azlıqda olarkən qələbə qazanmalıydıq. İlk hissədə rəqibi üstələyərək fasiləyə üstün yollandıq. İkinci yarıda bir qədər arxayınlıq, fürsətlərin boşa verilməsi və hakimin qərarları qələbənin əldən çıxması ilə nəticələndi.

- Hakimlikdən narazı qaldız?
- Narazı deyəndə ki, istər rəqibin, istərsə də bizim futbolçulara verilən qırmızı vərəqələri düzgün saymıram. Erqemlidzenin vurduğu qolu əvvəlcə qeydə alıb, sonra oyunun gedişində gedib VAR-a baxaraq ləğv etməsinə şübhə ilə yanaşıram. Düşünürəm ki, haqlı qolumuz əlimizdən alındı.

- Çoxdan “Kəpəz”də məşqçi işləyirsiz. Yaşar Vahabzadənin rəhbərlik etdiyi komanda ilə Tərlan Əhmədovun çalışdırdığı arasında hansı fərqlər var?
- Bu suala birbaşa cavab vermək çox çətindi. Yaşar müəllimlə birlikdə çalışdıq, klub üçün o da əlindən gələni etdi. Amma alınmadı. Yaşar müəllimə uzun ömür, cansağlığı və gələcək işlərində uğurlar arzulayıram. Düşünürəm ki, Tərlan müəllim "Kəpəz"ə gələndən sonra futbolçuların bir-birinə münasibəti, nizam-intizam və başqa məsələlərdə fərqlilik baş verdi. Bunun nəticəsidi ki, komanda xallar qazanmağa başladı. Hazırda "Kəpəz" bütün rəqiblərə başağrı ola bilir. İnanıram ki, gələcəkdə daha güclü Gəncə klubu görəcəyik.

- Tərlan Əhmədovun təcrübəli futbolçularla qarşıdurması bitmək bilmir. Sizcə, bunun səbəbi nədi?
- Futbolçularla bağlı bütün qərarları baş məşqçi verir. Biz, sadəcə, məşqçilər kimi "Kəpəz"ə əlimizdən gələn köməyi etməkdə maraqlıyıq. Düşünürəm ki, bu sualı Tərlan müəllimə ünvanlasaz, daha yaxşı olardı.

- Tərlan Əhmədova dəfələrlə bu suallar verib. O da qeyd edib ki, mənə həmin futbolçular lazım deyil və bu məsələ artıq bağlanıb. Rauf Əliyev, Əfran İsmayılov və Elvin Yunuszadə pis-yaxşı ölkə futbolunda iz qoymuş futbolçulardı. Onları bu cür səs-küylə qovmaq nə dərəcədə doğrudu? Yəni məsələni sakitcə həll etmək və ya razılığa gəlmək olmazdı?
- Təbii ki, məsələnin klubun daxilindən çıxması və mediada gündəm olması xoş deyil. Çoxları kimi mən də istərdim ki, belə bir hal olmasın və məsələ xoşluqla həllini tapsın. Amma istənilən halda, bu işdə əsas qərar verən şəxs baş məşqçidi. Ona görə biz köməkçi məşqçilər Tərlan müəllimin qərarına hörmət etməliyik.

- Qış toplanışında neçə transfer etməyi düşünürsüz?
- Təxminən 10 günlük istirahətdən sonra Antalyada təlim-məşq toplanışı başlayacaq. Axsayan mövqelərimiz var. Tərlan müəllimlə məsləhətləşirik. Düşünürəm ki, komandaya 3-4 yeni futbolçu cəlb edəcəyik. Amma bu məsələdə əsas söz sahibi baş məşqçidi. O, hansı futbolçuları istəsə, biz də onun qərarına hörmət edəcəyik. Fasilədə "Kəpəz"i maksimum gücləndirməklə mövsümün ikinci yarısında daha yaxşı çıxış etmək, turnir cədvəlində irəliləmək istəyirik.

ABDULLA İSMAYILOĞLU