Bu da son! Sanki Qətərlə Ekvador arasında açılış oyunu dünən olmuşdu.

Amma hər kəsin böyük maraqla izlədiyi DÇ-2022 artıq başa çatmaq üzrədi. Bu gün bürünc medalın sahibi, sabah isə çempion bəlli olacaq. Biz də sizi son afişamızla baş-başa buraxırıq.

Bazar günü Qətərin ən böyük stadionunda bu turnirin həqiqətən də iki ən güclü komandası arasında keçiriləcək oyunla DÇ-2022 tarixin yaddaşına qovuşacaq. Argentina tarixində 6, Fransa isə 4-cü dəfə mundialın finalında oynamaq haqqı qazanıb. Onların hər ikisi DÇ-nin ikiqat qalibidi. Adətən, neytral azarkeşlər belə oyunlardan öncə iki yerə bölünür. Amma bu dəfə neytral azarkeşlərin böyük əksəriyyəti Lionel Messi amilinə görə Argentinaya azarkeşlik edəcək. Çünki futbol dünyasının ümumi fikrinə görə, Messinin bu oyunun gəlmiş-getmiş ən güclüsü sayılması üçün məhz bu titula ehtiyacı var. Dünya çempionatı faktiki Messinin peşəkar karyerası ərzində iştirakçısı olub qazana bilmədiyi yeganə turnirdi! Elə Argentina xalqı da bu anı 36 ildi gözləyir. Komandanın son çempionluğu 1986-da qeydə alınıb. Yəni “albiselesta” üçün bu finalın mənası belə desək, bir oyundan daha artıqdı. Fransaya gəlincə, avropalılar bu turnirdə yaxşı mənada təəccübləndirməyi bacardılar. Təbii ki, fransızların gücünə heç kim şübhə ilə yanaşmırdı. Sadəcə, Millətlər Liqasında qeydə alınan sürprizlərdən və heyətdəki ciddi itkilərdən sonra “xoruzlar”ın belə fenomenal oynayacağını az adam gözləyərdi. Bu mundialda yaşananlar onu göstərir ki, Fransanın Millətlər Liqasında öz meydanında Danimarka ilə Xorvatiyaya uduzmasını, hər iki komandanı irəli buraxıb qrupda 3-cü yer tutmasını ciddi qəbul etmək lazım deyil. Bu komanda özünə lazım olan məqamda toparlanmağı, ideala yaxın futbol sərgiləməyi və qələbələr qazanmağı bacarır. XXI əsrdə son dünya çempionu statusunda ola-ola, mundialın finalına vəsiqə qazanan ilk komanda olan Fransa daha bir mühüm göstəricinin astanasındadı. Çünki futbol tarixində DÇ-ni ardıcıl 2 dəfə qazanmağı bacaran cəmi iki komanda olub. Söhbət İtaliya (1934, 1938) və Braziliya (1958, 1962) yığmalarından gedir.

Tarixi kontekstdən bir qədər əl çəkib finalöncəsi son duruma toxunaq. Heyətlərdə cəzalı futbolçu yoxdu. Argentinada, ümumiyyətlə, heyətlə bağlı problem yaşanmır. Yarımfinalı cəza üzündən buraxan Akunya ilə Montielin bu dəfə oynamasına heç bir əngəl yoxdu. “Albiselesta”nın göz bəbəyi Messinin srağagünkü məşqi buraxması bir qədər narahatlıq doğurmuşdu. Xorvatiya ilə oyunda 2-3 dəfə baldırını tutması Leonun müəyyən ağrılarının olduğunu göstərirdi. Dünən isə o, fərdi şəkildə məşq etdi. Amma komandanın liderinin və kapitanının həlledici oyunda meydanda olacağı şübhə doğurmur. Fransada isə heyətlə bağlı problemlər var. İki mərkəz müdafiəçisi – Varan ilə Konate qripə yoluxub və oyunu buraxa bilərlər. Eyni səbəb üzündən Rabyo ilə Upamekano Mərakeşə qarşı matçı buraxmışdı. Bundan başqa, yarımfinalda iki dəfə ayağına ağır zərbələr alan sol müdafiəçi Teo Ernandesin də oynaması sual altındadı.

Finala Messi – Mbappe dueli kimi yanaşanlar da az deyil. Hər ikisi əla formadadı və 5 qolla bu mundialda bombardirlər yarışına başçılıq edirlər. Çox güman, DÇ-nin ən yaxşı oyunçusu (və “Qızıl top”un qalibi) onlardan biri olacaq. Bu iki futbolçunun şəxsi duellərindən hələ ki Mbappe qalib ayrılıb. Ötən mundialın 1/8 finalında Fransanın Argentinanı 4:3 hesabı ilə yendiyi matçda fransalı ulduz mükəmməl futbol ortaya qoymuşdu. Eləcə də 2020/21-də ÇL-in 1/8 finalında PSJ “Barsa”nı 4:1 darmadağın edərkən Mbappe Messinin o dönəmdəki məbədində, yəni “Nou Kamp”da het-trik etmişdi! Leo artıq DÇ-lər tarixində 11 qol, 9 məhsuldar ötürmə ilə ən çox qolun vurulmasında iştirak edən futbolçudu. O, bu göstəricidə almaniyalı Miroslav Klozeni (16+3) geridə qoydu. Xorvatiya ilə oyunda Batistutanı geridə qoymaqla DÇ-lərdə ən məhsuldar argentinalıya çevrilən Messi finalda daha bir mühüm rekordun sahibi olacaq. Belə ki, 26-cı oyununu keçirməklə o, Lotar Matteusa məxsus rekordu yeniləyərək mundiallarda ən çox oyun keçirən futbolçuya çevriləcək! Təbii ki, çempion ola bilməsə, onun bu göstəricilərinin hamısına böyük bir kölgə düşəcək. Rekordlardan söz düşmüşkən, Uqo Lyoris də adını tarixə yazdıracaq. O, 20-ci oyununu keçirməklə Manuel Noyerin rekordunu yeniləyəcək və DÇ-də ən çox oyun keçirən qapıçıya çevriləcək.

Argentina ilə Fransanın şəxsi oyunlarına gəlincə, onların yolu 12 dəfə kəsişib və cənubi amerikalılar qələbə sayında öndədi (6:3). DÇ çərçivəsində bu komandalar 4-cü dəfə üz-üzə gələcəklər. Argentina həm DÇ-1930 (1:0), həm də DÇ-1978-də (2:1) üstün olub. Az öncə haqqında bəhs etdiyimiz DÇ-2018-in 1/8 finalındakı nəfəsləri kəsən qarşılaşmada isə Fransa sevinmişdi.

Sonda onu da bildirək ki, adı hələ də Fransanın iştirak ərizəsində olan Kərim Benzemanın oyunu izləmək üçün Qətərə gələcəyi gözlənilir. Bəzi mənbələr onun hətta meydana çıxmaq ehtimalının olduğunu da iddia edirdilər. Amma “Qızıl top”un son sahibi ən yaxşı halda oyundan sonra qızıl medalları almaq üçün komandasına qoşula bilər.

ƏLİ