Ronaldo: “Dünya kubokunu qazanmaq karyeramın ən böyük arzusu idi”
Portuqaliyanın 1/4 finalda gözlənilmədən Mərakeşə uduzması (0:1) Kriştiano Ronaldoya çox pis təsir edib.
Football-plus.az xəbər verir ki, karyerasında 5-ci mundialını da titulsuz başa vuran ulduz futbolçu ürək sözlərini sosial şəbəkə hesabında yazıb.
Portuqaliya yığmasının DÇ-2022-də mübarizəni dayandırmasına münasibət bildirən 37 yaşlı hücumçu komandasının mundialın qalibi olmaq üçün çox çalışdığını qeyd edib:
“Portuqaliya ilə dünya kubokunu qazanmaq karyeramın ən böyük və ən iddialı arzusu idi. Xoşbəxtlikdən milli komanda ilə bir çox beynəlxalq titullar qazanmışam. Lakin ölkəmizi dünyada ən yüksək səviyyəyə qaldırmaq mənim ən böyük arzum idi. Bu arzum üçün çox şey verdim. Son 16 ildə iştirak etdiyim 5 dünya çempionatında milyonlarla portuqaliyalının dəstəyi ilə həmişə böyük oyunçuların yanında olmuş və bütün gücümü ortaya qoymuşam. Hər şeyi meydanda qoydum”.
Ronaldo milli formada özünü döyüşçüyə bənzədib:
“Təəssüf ki, dünən yuxu bitdi. Son günlər haqqımda çox deyilib, çox yazılıb. Amma mən, sadəcə, hər kəsin bilməsini istəyirəm ki, Portuqaliyaya olan bağlılığım bir an belə dəyişməyib. Mən həmişə növbəti döyüşçü olmuşam və heç vaxt yoldaşlarımdan və ölkəmdən üz döndərməmişəm. İndi daha deməyə sözüm yoxdu. Təşəkkürlər, Portuqaliya. Təşəkkürlər, Qətər. Yuxu davam edərkən gözəl idi. İndi fırtınanın səngiyəcəyinə ümid etmək lazımdı. Bundan sonra hər kəs öz nəticələrini çıxaracaq”.
Yeri gəlmişkən, Mərakeşlə oyundan əvvəl bir azarkeş Kriştianonun üstünə su tökmək istəyib. “Daily Mail”in məlumatına görə, hadisə o, komandasının ehtiyat oyunçular skamyasına gedərkən baş verib. Azarkeşlərdən biri tribunadan əyilib və Ronaldoya butulkadan su atıb. Həmin şəxs dərhal digər fanatlar tərəfindən dayandırılıb. Sonra mühafizəçilər azarkeşlə danışıb və onu stadiondan çıxarıblar.
Qeyd edək ki, Ronaldo meydana 51-ci dəqiqədə daxil olub.
Digər xəbərlər
