Azərbaycan millisinin köməkçi məşqçisi Arif Əsədovun “Football-plus.az” saytına müsahibəsi...

- Dünən premyer-liqanın 16-cı turunda “Qarabağ” “Neftçi”ni 4:0 hesabı ilə məğlub etdi. Qarşılaşma haqda fikirlərizi bilmək maraqlı olardı...
- Gözləniləndən aşağı səviyyəli oyun getdi. Bunun da səbəbi var idi. Çünki “Neftçi” “Qarabağ”a müqavimət göstərə bilmədi. Hamı bu qarşılaşmada “ağ-qaralar”dan nəsə gözləyirdi. Arada 9 xallıq fərq var. “Neftçi”nin bunu azaldacağı düşünülürdü. Maraqlı oyun üçün hər cür şərait var idi. Görüş axşam saat 9-da keçirilirdi. Qarşılaşma ətrafında maraqlı ajiotaj formalaşmışdı. Hamı istəyirdi ki, bərabər səviyyəli qarşılaşma olsun. Təəssüf ki, bu, olmadı. Səbəb də “Neftçi”nin çox zəif çıxış etməsi idi. Demək olar ki, “Qarabağ” 90 dəqiqə bir qapıya oynadı.

- “Neftçi”nin zəif, “Qarabağ”ın belə üstün oyun nümayiş etdirəcəyini gözləyirdiz?
- Ağdam təmsilçisi 90 dəqiqə ərzində oyuna diktə edirdi. “Neftçi”nin niyə bu qədər zəif çıxış etdiyi, oyunçuların matça köklənməsinin səbəbi ayrıca bir sualdı. Açığı, komanda oyun tərzindən də “Qarabağ”dan çox geri qalırdı. Düzdü, bunun səbəbini ən yaxşı Regekampf bilir. Amma qıraqdan görsənirdi ki, həm oyun planında, həm də istək planında ağdamlılar daha üstün idi. Sanki bu qələbə “Qarabağ”a daha çox vacib idi, nəinki bakılılara. Amma bunun əksi olmalı idi.

- “Neftçi”nin bu durumda olmasının səbəbi nədi?
- Təbii ki, bakılıların heyəti “Qarabağ”ınkından zəifdi. Ağdam təmsilçisinin iki bərabər səviyyəli “11-liy”i var. Buna baxmayaraq, “Neftçi”ni matça buraxılan heyət də kifayət qədər optimal idi. Düzdü, bəziləri təzə zədədən qayıdıb. Təbii ki, əsas səbəb ehtiyat qüvvənin az olmasıdı. Buna baxmayaraq, optimal heyətin belə çıxış etməsi düşündürücü məqamdı.

- Emin Mahmudova qarşı edilən haqda deyə bilərsiz? Düzdü, fanatlar bütövlüklə komandanı təhqir etdilər. Emin formasını çıxardaraq onlara cavab verdi...
- Matçın bitməsinə 15 dəqiqə qalmış arenanı tərk etdim. Çünki özümü narahat hiss edirdim. Bir az soyuq olub. Hadisəni görmədim. Ona görə də nəsə deməyə çətinlik çəkirəm. Ümumiyyətlə, futbolçuların təhqir olunması yol verilməzdi. Təbii ki, “Neftçi” azarkeşləri komandalarına çox sadiqdilər. Onlar flaqmanı səmimi qəlblə sevirlər. Daim qələbə qazanmasını istəyirlər. Bu, məlum məsələdi. Onların da haqqı var ki, futbolçulardan həmişə qələbə tələb etsin. Amma təhqirə yol verilməsi düzgün deyil. Bu, yaxşı hal deyil. Futbolçular da insandı. Onlar da həmişə qələbə qazanmaq istəyirlər. Bəzən qarşındakı rəqib səndən güclü olur. Ona müqavimət göstərməyə qadir olmursan. Bu, futboldu. Bu gün udarsan, sabah məğlub olarsan. Bu səbəbdən də azarkeşlərin oyunçuları təhqir etməsini düzgün hesab etmirəm.

- Sizcə, bu hadisə Eminin performansına təsir edəcək?
- Emin futbolçu və insan kimi sadiq biridi. Təbii ki, ona kapitan olaraq bu hadisə təsir edib. “Neftçi” üçün çəkdiyi əziyyətlər gözünün önünə gəlib. Belə şeylərdən sonra insan təhqir olunub. Amma belə məsələlər baş verə bilər. Çünki məğlubiyyət olanda istər-istəməz bu cür anlaşılmızlıqlar yaşanır. Düşünmürəm ki, Emin bu hadisəyə görə “Neftçi”dən getsin. O, həqiqətən də insan kimi sadiq və təmiz biridi. Həmçinin, ideal futbolçudu. Düşünmürəm ki, bu hadisənin hansısa fəsadları olsun.

İLKİN SULTANLI