2022-ci ilin yanvarında fəaliyyətə başlayan “Neftçi” Futbol Məktəbinin filialı açılır.

Klubdan verilən məlumata görə, məktəb Yasamalda fəaliyyət göstərəcək. Futbolun sirlərini öyrənmək istəyən 6-14 yaşlı uşaqlar “Neftçi” Futbol Məktəbinə müraciət edə bilər. Qeyd edək ki, "Neftçi" Futbol Məktəbi "Neftçi" Peşəkar Futbol Klubunun nəzdində fəaliyyət göstərir. Məşqlər Bakıxanov qəsəbəsində yerləşən "Türk Hava Yolları Futbol Mərkəzi”ndə keçirilir. Məşq prosesində “Neftçi” Futbol Akademiyasının məşqçi, inzibati və tibbi heyəti iştirak edir.

Görəsən, filialının açılmasının məqsədi nədi? Buranın “Neftçi”yə hansı faydası olacaq? Flaqmanın futbol məktəbi başqa hansı qəsəbələrdə və mikrorayonlarda açılacaq? Bu istiqamətdə suallarımız çoxdu. Hamısına cavab tapmaq üçün Yasamal məktəbinin baş məşqçisi Vaqif Hidayətovla əlaqə saxladıq. Onunla layihənin kim tərəfindən həyata keçirildiyi, hansı məqsəd üçün istifadə olunacağı ilə bağlı söhbətləşdik.

- Vaqif bəy, “Neftçi”nin futbol məktəbinin açılması hansı zərurətdən irəli gəldi?
- Uşaqların futbol öyrənməsini istəyirik. Həm də “Neftçi”nin akademiyasına yaxşı futbolçular göndərmək istəyirik. Təkcə Yasamalla kifayətlənməyəcəyik. Böyük əraziləri əhatə edəcəyik. İstəyirik ki, “Neftçi” üçün yetişən futbolçuların sayı çoxalsın. Həm seçim şansımız olsun, həm də inkişaf edək. Ən vacib məqsədimiz budu.

- Belə başa düşdüm ki, “Neftçi” Bakıda yerləşən bütün rayonları əhatə edən layihəyə start verir. Flaqman şəhərin tək komandası olduğunu göstərmək istəyir?

- Bəli. Binəqədidə də filial açmaq istəyirik. Burda hələ işlər dayanıb. Lakin akademiyamıza uşaq seçimi başa çatıb. 40-dan çox futbolçu cəlb etmişik. Bazada 4 qrupun məşq etməsini istəyirik. Yasamal filialında isə 3 qrupa məşq keçəcəyik. Daha sonra Binəqədidəki məktəbə uşaq toplamağa başlayacağıq. Azərbaycanda fəaliyyət göstərən xarici məktəblər var. İstəyirik ki, onların da uşaqlarını “Neftçi”yə cəlb edək. Kütləviliyi artırmaq istəyirik. “Neftçi” üçün can qoyacaq uşaqların sayı çoxaldıqca seçim imkanımız da artacaq. Bizdən 3 uşaq akademiyaya seçilib. Bəyənilənlər ora qoşulur. Qalanlar burda özlərini təkmilləşdirirlər.

- Bu layihənin “Neftçi” üçün nə faydası olacaq?
- Ölkədə kifayət qədər futbol məktəbi var. Məsələn, “Fənərbaxça”, “Qalatasaray”, “Beşiktaş” kimi klubların nümayəndəlikləri fəaliyyət göstərir. Onlar üçün say və pul önəmlidi. Bizdə isə fərqlidi. İşin effektli olması əsasdı. Uşaqlar yarışlarda çıxış edir. “Sabahın ulduzları”nda çıxış edirik. İstəyirik ki, “Neftçi” brendini daha da inkişaf etdirək. Məsələn, Türkiyədə “Altınordu” brenddi. Biz də “Neftçi”nin belə olmasını istəyirik.

- Onların texniki təminatı yüksək səviyyədədi. Sizdə vəziyyət necədi?
- Bununla bağlı problem yoxdu. Sağ olsun Rüstəm Allahverdiyev, nə istəyiriksə, təmin edir. Heç vaxt “yox” deməyib.

- Məktəbin məşqçiləri kimlərdi? Yoxsa təksiz?
- Hələ ki təkəm. Amma köməkçim var. O da yeni gəlib. Növbəti həftədən başqa məşqçi məşqlərə qoşulacaq. Bütün filiallarda məşqçilər olacaq. Amma baş məşqçi mən olacam. Gənclərə nə lazım olsa, hamısını həll etməyə çalışacam.

- Belə başa düşdüm ki, “Neftçi” gələcəyini düşünür. Yerli futbolçu baxımından əziyyət çəkməmək üçün bu addımı atır.
- Bəli. Bunu layihə kimi klubun prezidenti Kamran Quliyev irəli sürdü. Düşünürəm ki, pis də layihə deyil. O, bildirdi ki, uşaqlar üçün nə lazımdısa, problem yoxdu. Əsas odu ki, “Neftçi”yə uşaqlar cəlb olunsun, klubu sevsinlər. Burda məşq edən 100 uşaqdan biri əsas komandanın üzvü olsa, bəsimizdi. Deməli, işimizi düz qururuq.

- “Neftçi”nin futbol məktəbi rəqiblərini yaxın zamanlarda geridə qoya biləcəkmi?
- Bu gün Azərbaycanın bir çox klubunun məktəbi var. “Qarabağ”, “Sabah”, “Səbail” bu işdə yaxşılardandı. Biz istəyirik ki, “bir nömrə” olaq. Onsuz da dünya ölkələri “Neftçi”ni klub olaraq tanıyır. İndi də futbol məktəbi kimi ən yaxşılar siyahısında yer almaq istəyirik.

İLKİN SULTANLI