Birinci divizionun 11-ci turunda “Kəpəz-2” Binə qəsəbə stadionunda “Qarabağ-2”ni 4:1 hesabı ilə məğlub etdi.

AFFA-nın İntizam Komitəsi son iclasında isə hər iki klub cəzalandırıldı. Belə ki, “Qarabağ-2”nin futbolçusu Şirxan Həsənzadə rəqib futbolçuları təhqir etdiyinə görə 3 oyunu kənardan izləyəcəksə, klub 160 manat cərimə olunub. Komandanın daha bir futbolçusu Rəhim Cəfərli isə rəqib futbolçuya qarşı sərt oynadığına görə birbaşa qırmızı vərəqə ilə meydandan kənarlaşdırılıb. Ona 4 oyunluq cəza verilib, komandası isə 320 manat cərimə olunub. Həmçinin oyundan sonra təhlükəsizliyin təmin edilmədiyi üçün baş verən kütləvi intizamsızlığa görə “Qarabağ-2” daha 400 manat cərimə olunub.

Maraqlıdı, oyunda nə baş verib ki, hakimin final fitindən sonra da kütləvi intizamsızlıq qeydə alınıb? Bu qədr cəza və cərimənin səbəbi nədi? Bu suallarla “Qarabağ-2”nin baş məşqçisi Cavad Mirzəbəyliyə müraciət etdik. Onun “Football-plus.az” saytına açıqlaması belə oldu:

“Hakimlik barədə çox danışmaq istəmirəm. Amma düşünürəm ki, bizim futbolçular belə sərt cəzalanırdısa, rəqib komanda üçün də eyni addım atılmalı idi. Çünki insidenti başladan Gəncə təmsilçisi idi. Təbii ki, xoşagələn hal deyil. İstər-istəməz meydanda biri digərinə söyüş söyəndə, qarşılığı olur. Bu halda isə hakimlər bir tərəfi cəzalandırır, digər tərəfi yox. Rəqib komandanın futbolçuları, sadəcə, cərimə olunur, amma bizim komandaya konkret cəza verilir. Bu ikili standart olur. Təhqir edən onlar olubsa, niyə cəzalanmırlar? Oyundan sonra da bizim futbbolçulara qarşı təhqiramiz ifadələr işlədilib. Şirxan Həsənzadə onlara cavab verib. Mən futbolçunu buna görə danlamışam. Amma istənilən halda, heç kim qarşı tərəfin şəxsiyyətini alçatmamalıdı. Şirxana cəza verilib, amma onu bu hərəkətə məcbur edənlər cəzalanmayıb”.

ŞAİR ABDULLA