Samir Abasov mətbuat konfransında nə demək istəyib?
Premyer-liqanın 10-cu turunda "Qarabağ" - "Sumqayıt" qarşılaşmasından sonra təşkil olunan mətbuat konfransında “gənclik şəhəri” təmsilçisinin baş məşqçisi Samir Abasov bir məsələni qabartdı:
"Deyəsən, oyun haqda "CBS Sport"a verdiyim açıqlamanı mətbuat konfransında da yenidən açıqlamaq məcburidi".
Mütəxəssis bununla nə demək istəyib? Bunu "Sumqayıt"ın mətbuat katibi Rəşad Məmmədovla söhbətdə aydınlaşdırdıq:
"Samir müəllimin jurnalistlərə açıqlama verməmək və ya gileylənmək kimi bir xasiyyəti yoxdu. Ola bilsin, fikrini tam izah edə bilməyib, çoxları da bunu fərqli yozub. Baş məşqçimiz demək istəyib ki, oyundan sonra "CBS Sport"a verdiyim açıqlamanı mətbuat konfransında da təkrarlamaq məcburiyyətindəyəm. Yəni idman telekanalına nə demişəmsə, həmin fikiriləri burda da təkrarlayacam. Samir müəllim bunu demək istəyib".
ABDULLA İSMAYILOĞLU
