Bu gün Avropa Liqasının qrup mərhələsinin 4-cü turunun oyunlarına start verilib.

Football-plus.az xəbər verir ki, turnirdəki yeganə təmsilçimiz “Qarabağ” “Olimpiakos”u qəbul edib. Ağdamlıların üstünlüyü ilə keçən matçda hesab açılmayıb - 0:0.

Bu heç-heçə ilə xallarının sayını 7-yə çatdıran "Qarabağ" Konfrans Liqasının pley-offunu təmin edib.

Avropa Liqası
G qrupu, 4-cü tur
Qarabağ - Olimpiakos (Yunanıstan) 0:0
"Qarabağ": 1. Şahruddin Məhəmmədəliyev, 2. Qara Qarayev (k) 7. Riçard Almeyda, 10. Abdullah Zubir, 11. Kvabena Ovusu, 13. Bəhlul Mustafazadə, 20. Kadi Borges. 29. Marko Veşoviç, 44. Elvin Cəfərquliyev, 55. Bədavi Hüseynov, 77. Ramil Şeydayev
Baş məşqçi: Qurban Qurbanov

"Olimpiakos": 91. Aleksandros Pasxalakis, 2. Şime Vrsalko, 5. Andreas Buxalakis, 8. Pyer Kunde, 15. Sokratis Papastatopulos, 17. Marius Vrusai, 18. Hvan İy Co, 21. Pep Biel, 45. Oleq Ryabçuk, 47. Abubakar Kamara, 74. Andreas-Rixardos Ntoi,
Baş məşqçi: Miçel Qonsales
Hakimlər: KREYQ PAUSON, Li Betts, Yan Hassin, Con Bruks (hamısı İngiltərə).
VAR hakimi: Darren İnqlənd (İngiltərə).
VAR hakiminin köməkçisi: Piter Benks (İngiltərə).
Hakim-inspektor: Yon Skyervold (Norveç).
UEFA nümayəndəsi: Milan Yankoviç (Bosniya və Hersoqovina).
13 oktyabr. Bakı. Tofiq Bəhramov adına Respublika stadionu. Saat 20.45

“Qarabağ” Avropa Liqasının cari mövsümündə özünü yaxşı tərəfdən göstərir. Turnirə “Frayburq”a 1:2 hesabıyla uduzmaqla başlayan ağdamlılar ardıcıl iki 3:0-lıq darmadağın rəsmiləşdirib. Öncə “Nant”, ardınca “Olimpiakos” məğlub edilib. G qrupunun turnir cədvəlində “Qarabağ” 6 xalla ikincidi. “Olimpiakos”un nəticələri dəhşətlidi. Yunanıstan klubunun üç turdan sonra xala həsrət qalmaqla sonuncu pillədə qərarlaşacağını kim düşünə bilərdi?! “Nant”a 1:2 hesablı məğlubiyyətlə başlayan Pirey təmsilçisi sonradan “Frayburq”la “Qarabağ”a eyni - 0:3 hesabı ilə uduzub. İndi toparlana bilməsələr, heç Konfrans Liqasına da düşməyəcəklər. Əslində isə komandaya inam da yoxdu. Hadisələrin axarı “Olimpiakos”un hədəfə çatmayacağını göstərir. “Qarabağ” isə həm ölkə çempionatında, həm də Avropa Liqasında ardıcıl 6 qələbə qazanıb və Bakıda bu seriyanı davam etdirmək niyyətindədi. Ötən həftə qeydə alınan 3:0 da çox şeydən xəbər verir. Oturuşmuş, güclü heyətə malik komandanın yetərincə təcrübəsi var. “Doğma divarlar” da əlavə üstünlükdü.

Yunanıstan çempionunun süqutu isə çoxları üçün sürpriz oldu. Yaxşısı budu, “Olimpiakos”dan dirçəliş gözləməyək. Qlobal islahatlar, zədəlilərin çoxluğu, futbolçuların bərbad formada olması... Hər şey ondan xəbər verir ki, yunanlar Bakıda da “sındırılacaq”. Ola bilər ki, böyük hesab qeydə alınmasın. Amma oyuna görə qonaqların “Qarabağ”a qarşı şansı minimum bərabərdi. Komandanın heyətində kifayət qədər itki var. Bunu Yunanıstan mətbuatı iddia edir. Pirey təmsilçisi boşluğu gənc oyunçularla dolduracaq. Baş məşqçi Miçel xüsusən də müdafiənin mərkəzindəki itkiləri gənclərlə “sığortalamağı” üstün tutub. İspaniyalı mütəxəssis 19 yaşlı Konstantinos Krisopulosla 18 yaşlı Aleksios Kaloqeropulosu Bakıya gətirmək qərarına gəlib. Hər iki futbolçu UEFA-ya göndərilən iştirak ərizəsinin B siyahısında yer alıb. Şime Vrsalko da Bakıya gəlib. Pireydəki ilk görüşün iştirakçısı olan 30 yaşlı müdafiəçi Yunanıstan çempionatının ötən turunda OFİ (2:1) ilə görüşü səhhətindəki problemə görə buraxmalı olub. İnfeksiyaya yoluxan Vrsalko iki gün öncədə yenidən kollektivə qoşulub. O, “Qarabağ”la Bakıdakı qarşılaşmada məşqçilər korpusunun sərəncamında olacaq.

Oyun yubileylə əlamətdar olacaq. Tofiq Bəhramov adına Respublika stadionundakı görüş Azərbaycan klublarının avrokubokların qrup mərhələlərində 70-ci sınağı olacaq. Təmsilçilərimiz indiyədək 69 belə matça çıxıb. Bu qarşılaşmaların 51-i “Qarabağ”ın, 12-si “Qəbələ”nin, 6-sı “Neftçi”nin hesabındadı. Azərbaycan komandaları qrupda 11 qələbə qazanıb və 17 heç-heçəyə imza atıb. 41 dəfə uduzan təmsilçilərimiz top fərqində də geridədi: 58-117.