“Mingəçevir” 5-ci turda evdə “Şamaxı-2”yə 2:4 hesabı ilə məğlub oldu.
Komanda bundan əvvəlki oyunların 2-də qalib gəlibsə, qalan 2-də məğlub olub. Son matçda hesabı meydan sahibləri açıb, ilk yarını da üstün başa vurub. Lakin ikinci hissədə “Şamaxı-2” vurduğu qollarla rəqibini məğlub edib.
Maraqlıdı, “Mingəçevir” üstünlüyü necə əldən verib? Komandanın uduzmasının səbəbi nədi? Bu haqda məlumat almaq üçün “Mingəçevir”in baş məşqçisi Azər Həşimovla əlaqə saxladıq. Onun “Football-plus.az” saytına açıqlaması belə oldu:
“Şamaxı-2” ilə oyunun birinci hissəsində 1:0 hesabı ilə öndə idik. Oyunda 3-4 yüzfaizlik qol imkanımız oldu. İlk hissədən sonra futbolçulara dedim ki, sən vurmayanda, sənə vururlar. Futbolda belə şeylər olur. Buraxılan qollardan sonra toparlanmağa çalışsaq da, alınmadı. Deməzdim ki, məğlubiyyətə layiq futbol oynadıq. Məğlubiyyətin səbəbi limitə düşənlərin bu matçda daha zəif təsir bağışlamasıdı. Ötən il “Mingəçevir” Region Liqasında oynayırdı. Bəziləri deyir ki, ötənilki komanda daha güclü idi. Bu fikirlə razıyam. Çünki orda limit yox idi. Mingəçevirdə aşağı yaş qrupları yoxdu ki, bizə kömək edə biləcək futbolçular olsun. Yeni yaranan komanda olduğumuza görə limitlə bağlı çətinliklərimiz çoxdu. Hələ bizi yaxşı tanımırlar. Həm bu, həm də maliyyə probleminə görə yeni oyunçular da cəlb edə bilmirik. Ona görə də bu gün ayağımızı yorğanımıza görə uzadırıq. Vaxt keçdikcə daha əzmkar “Mingəçevir” görəcəyik. Ötən oyunda “İmişli”yə 6:0 hesabı ilə qalib gəldik. Orda ilk 2 qolu tez vurduğumuza görə komanda daha rahat oldu. Həmin an mən onlara tapşırırdım ki, sona qədər mübarizə aparmaq və yenə qollar vurmaq lazımdı. Futbolçularım bunu da bacardılar. Lakin “Şamaxı-2” ilə oyunda alınmadı. Yenə deyirəm, uduzmalı deyildik. Futbolçular da çalışır ki, əzmlə mübarizə aparsınlar. İstəyirəm şəraitimiz, büdcəmiz yaxşı olsun. Belə olan halda gələcəkdə daha keyfiyyətli “Mingəçevir” görəcəksiz”.
ŞAİR ABDULLA