“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Nazim Süleymanovu hər kəs tanıyır. Yığmanın ilk kapitanı və ilk qolunun müəllifi futbolçu kimi bir çox uğurlara imza atıb. “Alaniya”nın heyətində Rusiya çempionu adını qazanan Süleymanov indi də azarkeşlər tərəfindən sevilir, onun vurduğu qolları qürurla xatırlayırıq. Hazırda Rusiyanın “Ximki” klubunun 19 yaşlılardan ibarət komandasını çalışdıran Nazim bəyin övladı Tamerlan Süleymanov onun yolunu davam etdirir. Futbolçu karyerası qısa olan Tamerlan hazırda azyaşlılara top oyununun sirlərini öyrətməklə məşğuldu. Ona ilk sualımız da elə futbola necə gəlməsiylə bağlı oldu.

- Tamerlan, futbola gəlişin necə oldu? Bu sahəyə maraq göstərməyində Nazim Süleymanovun oğlu olmağın nə dərəcədə rol oynadı?
- Futbolçu ailəsində dünyaya göz açan uşağın futbola maraq göstərməsi təbii haldı. Bu mənada mənim futbolu sevməyimdə Nazim Süleymanovun oğlu olmağımın böyük rolu var. Mən gözümü açandan, özümü dərk edəndən futbolla maraqlanmışam, bu idman növünü sevmişəm. Futbola olan marağım yaşımın artmasıyla mütənasib inkişaf etdi, getdikcə futbolu daha çox sevməyə başladım. Qərar verdim ki, gələcəyimi məhz futbola bağlayım, karyeramı bu sahədə qurum. Orta məktəbi bitirəndən sonra İdman Akademiyasının futbol fakültəsinə qəbul olundum.

- Bəs məşqçiliyə gəlişin necə oldu? Hazırda məşqçi kimi fəaliyyətini harda davam etdirirsən?
- Bakalavr pilləsini başa vurandan sonra magistr kimi “İdman məşqinin nəzəriyyəsi və metodikası” ixtisası üzrə təhsilimi davam etdirdim. Elə həmin dövrdə də futbol məşqçiliyi üzrə C kateqoriyasını aldım. Bundan sonra da “Vətən” futbol məktəbində işləməyə başladım. Hazırda isə “Sabah” Futbol Akademiyasının U-10 komandasında çalışıram.


- Bu sahənin mütəxəssisi kimi fikirlərin maraqlıdı. Hazırkı uşaqların səviyyəsi, onların məşqlərə marağı səni qane edirmi?
- Əlbəttə, uşaqların futbola marağı var. Uşaqların böyük əksəriyyəti lap məşqlərə gəlməsələr belə futbolla maraqlanırlar, bu oyunu müəyyən səviyyədə oynayırlar. Hər bir mütəxəssis üçün də sevindiricidi ki, uşaqlar məşqlərə gəlsinlər, futbolun incəliklərini öyrənsinlər. Biz məşqçilər uşaqların məşqlərə həvəslə gəldiyini, öyrənməyə çalışdığını, öyrəndiklərini oyun zamanı nümayiş etdirdiyini görəndə sevinirik. Bir mütəxəssis kimi uşaqların futbola marağını artıracaq pedoqoji metodlardan istifadə etməliyik. Lakin oyunçuların səviyyəsindən danışsaq, hər bir futbolçudan yüksək performans gözləmək düzgün deyil. Bizim də işimiz onların potensialını düzgün qiymətləndirmək, uşaqları istiqamətləndirmək və istedadlarını üzə çıxarmaqdı.

- Uşaq futbolunda hansı problemlər səni narahat edir? Onları necə aradan qaldırmalıyıq?
- Bu sahənin problemlərindən çox danışmaq olar. Məni ən çox narahat edən keyfiyyətli stadionların sayının azlığıdı. Bu amil çox mühümdü. Stadionların örtüyünün pis olması uşaqların sağlamlığı üçün təhlükəlidi, onların gələcəyinə zərər verə bilər. Yararsız meydançalarda uşaqların zədələnmə riski yüksəkdi. Uşaqlar mütləq yaxşı meydançalarda, yüksək keyfiyyətli örtük üzərində məşq etməlidilər. Digər ciddi problem uşaqların oyun təcrübəsinin azlığıdı. Uşaqlar çox az oyun keçirirlər, bu da onların təcrübə qazanmasına imkan vermir. Uşaq komandaları üçün müxtəlif turnirlər təşkil etmək, oyun sayını mümkün qədər artırmaq vacibdi. Mən təklif edərdim ki, uşaqların birə-bir, ikiyə-iki, üçə-üç məşq prosesi rəqabət yaradacaq formada, yarış kimi keçirilsin. Azyaşlıları məşq prosesində komandalara bölməklə bunu reallaşdırmaq olar. Belədə daha yaxşı olmağa çalışan uşaqlar böyük həvəslə çalışacaqlar.

- Sonda valideynlər barədə soruşmaq istərdim. Bəzən məşqçilər valideynlərin yersiz müdaxiləsindən şikayətlənir. Sən də belə hallarla qarşılaşmısanmı?
- Təəssüf ki, belə hallar mövcuddu. Məşqçi həmkarlarım bu cür hadisələrlə qarşılaşırlar. Amma şəxsən özüm “Sabah” Futbol Akademiyasında və “Vətən” Futbol Məktəbində belə hallarla rastlaşmamışam. Valideynləri müəyyən mənada başa düşmək olar. Amma onlar da bilməlidilər ki, belə davranış məşqçilərin işinə qarışmaqdı. Ona görə də belə hallara yol vermək doğru deyil. Məşqçilərə imkan yaratmaq lazımdı ki, öz bilik və bacarığını uşaqlara öyrətsin, onlara normal məşq keçsin. Hər bir valideyn üçün öz uşağı əzizdi. Amma unutmaq lazım deyil ki, məşqçilər bu işin peşəkarıdı, biz övladlarımızı məşqə aparanda mütəxəssislərə etimad göstərmiş oluruq.

İLKİN SULTANLI