“Barselona”nın, bütün maliyyə problemlərinə rəğmən, mövsümlərarası dövrdə transfer bazarında böyük sövdələşmələrə imza atması ətrafında çoxlu diskussiya gedir.

Premyer-liqanın bəzi zəngin klublarıyla mübarizə aparan kataloniyalılar bu kiçik döyüşlərdən qələbə ilə ayrıldılar. Rafinya, Robert Levandovski və Jül Kunde kimi futbolçuların transferi nəyə desən, dəyər.
Ancaq heç kim bu futbolçuların çox nüfuzlu premyer-liqada oynamaq imkanından imtina edib, əvəzində ötən mövsüm qənimətsiz qalan və maliyyə problemi yaşayan “Barsa”ya qoşulmasının səbəbləri haqda danışmır. Yəqin bu məsələ üzərində daha ciddi düşünməyə dəyər. Axı “Barsa”nın “Çelsi”ni və başqa İngiltərə zənginlərini qabaqlamasının səbəbləri nədi?

Xavi effekti

Kataloniyalılar onları La Liqanın turnir cədvəlində 10-cu pilləyə endirən Ronald Kumanla vidalaşandan sonra – ötən ilin noyabrında Xavi Ernandes “Nou Kamp”a baş məşqçi qismində döndü. “Barselona”nın əfsanəsi ağır vəziyyətdə olan doğma komandanın yükünü boynuna götürməliydi. Az qala genetik kimliyini itirən “Barsa” həm nəticələr, həm də maliyyə planında boğulurdu. Bu haqda çox yazmışıq, odu ki, 2022-nin iyuluna, yəni “göy-narıncılar”ın Levandovski, Kunde və Rafinya kimi ulduzları “rənglərinə bağlamaqla” faciəvi durumdan çıxdığı dönəmə qayıdaq. Klub bu transferləri həyata keçirərkən başqa iddiaçıların təzyiqi ilə üzləşdi. Və “Barsa” bu təzyiqin altından çıxıb qalib gəldi, özü də həmin rəqiblərlə müqayisədə futbolçulara artıq heç nə təklif etmədən. Bu uğurun əsas səbəbkarı klub hələ transfer imkanlarını araşdırmadan bütün oyunçularla şəxsən danışan Xavidi. Kunde müqaviləyə imza atdığı gün bildirdi ki, bütün transfer danışıqları boyunca Xavi ilə daimi təmasda olub və baş məşqçi növbəti mövsüm üçün planlarını ona təfsilatı ilə izah edib – istər konkret Kunde ilə, istərsə də komanda ilə bağlı planları. Eyni praktika Rafinya və Levandovski ilə də təkrarlanıb. Məşqçi ilə ünsiyyətdə olan hər iki ulduz Xavinin gələcəklə bağlı planının və bu plana inamının təsiri altına düşüb.

Klubun irsi

“Blauqrana”nın fanatı olmaq və ya ona bütün qəlbinlə nifrət etmək olar, ancaq bir həqiqəti danmaq mümkünsüzdü: “Barselona” dünyanın ən böyük futbol klublarından biridi. Söhbət tarixdəki statusa və irsə gəlib çatanda iki klub həmişə xüsusi yer tutur: “Barsa” və “Real”. Bu iki adın dünya futboluna gətirdiyi güc və cazibə rəqib tanımır.

Məhz irs amili son vaxtlar yetərincə mürəkkəb dönəm yaşayan “blauqrana” üçün xilas rolunu oynadı. Maliyyə problemləri içində boğulan klub elə mərhələyə çatmışdı ki, artıq imici ciddi zərər görməyə başlayırdı. Ancaq bəzi problemləri qısamüddətli perspektivdə həll edən kataloniyalılar hazırda yetərincə sabit vəziyyətdədi. Vəsaitlə bağlı müəyyən çatışmazlıqlar olsa da, transfer edə bilirlər.
Rafinya və Levandovski epizodlarında məhz klubun tarixdəki adı və statusu onları kataloniyalılara qoşulmağa inandırdı. Hər iki oyunçunun yayboyu yalnız bir hədəfi vardı: “Barselona”nın heyətində oynamaq. Rafinya İspaniyaya köç mümkan olmayacağı təqdirdə daha bir mövsüm “Lester”də qalmağa hazır idi. “Çelsi”nin və başqa klubların marağına baxmayaraq, Levandovski üçün “blauqrana” yeganə təyinat nöqtəsi idi.

Xavinin layihəsinə rəhbərlik etmək şansı

Xavinin kluba gəldiyi gündən bəri qurduğu layihə oyunçular, ekspertlər və azarkeşlər üçün xususi maraq daşıyır. Kənardan belə görünür ki, “Nou Kamp”da xüsusi nəsə yetişməkdədi. Hər yeni eranın başlanğıcında kimlərinsə bəxtinə layihənin əsas siması olmaq düşür. Pep Qvardiola üçün bunlar Xavi, İnyesta və Messi, Luis Enrike üçün Messi, Suares və Neymar idi. İndi isə məşqçi Xavinin yeni erası başlayır və futbolçular onun təcəssümü olmaq istəyirlər.

Səndə həyəcan və ehtiras oyadan komanda üçün oynamağın cəlbediciliyi istər-istəməz ön plana çıxır. Sərəncamında məhdud maliyyə imkanları və rıçaqları olan “Barselona” başqa cür bu qədər əla oyunçunu heyətinə cəlb edə bilməzdi. Dünyanın indiyə qədər gördüyü ən böyük futbol müdriklərindən birinin rəhbərliyi altında oynamaq perspektivi və bonus kimi bu fiqurun layihəsinin əsas simalarından biri olmaq imkanı – bax, top səviyyədə olan istənilən futbolçu üçün cəlbedici məqamlar bunlardı.

Demək olar ki, bütün karyerasını bundesliqda keçirən Levandovski üçün xüsusi vəziyyət yaranıb. 34 yaşlı hücumçu futbolçu irsini əbədiləşdirəcək layihədə yer almağa qərar verib.

Meydanda və onun hüdudlarından kənarda çətin dönəmə baxmayaraq, cari “transfer pəncərəsi” göstərdi ki, “Barselona” hələ də başqa klubların futbolçuları üçün cəlbedicidi. Və indi Xavinin əlinin altında olan heyətlə zirvədəki yeri qaytarmaq olar.

ORXAN