Bu gün premyer-liqanın 2022/23 mövsümünün püşkatması olub.

Football-plus.az xəbər verir ki, tədbirdən sonra PFL prezidenti Ramin Musayev jurnalistlərin suallarını cavablandırdı...

- İlk turda "Kəpəz" "Zirəni qəbul edəcək. Bilirik ki, Gəncə stadionda problemlər var. Arena görüşləri keçirməyə hazırdı?
- Bir ay öncə nümayəndəmiz orda olub. Çatışmazlıq rəhbərliyə deyilib. AFFA rəhbərliyi də bilir ki, çatışmazlıqlar var. Amma söz veriblər ki, çempionat başalyana qədər bərpa olunmalıdı. Çatdıra bilməsələr, tələb etməliyik ki, həmin stadionda oyun keçirilməsin. Yəqin ki, ya "Dalğa Arena"ya gələrlər, ya hara gedərlər, bilmirəm.

- AFFA-nın baş katibi Sərxan Hacıyev bildirib ki, mövsümün yekununa əsasən, bir komanda aşağı liqaya yuvarlanacaq, digəri yüksələcək. Bu, mümkündü?
- Bu, nə AFFA, nə də PFL rəhbərliyindən asılıdı. Hamısı maliyyə ilə bağlıdı. Yadınızdadısa, hər dəfə demişəm ki, qanun pozuntusuna yol versəm belə, həmin komandaları premyer-liqaya buraxmağı boynuma götürürəm. Bəziləri düşünürlər ki, bəzi klubların dağılmasında PFL və AFFA rəhbərliyi günahkardı. Amma belə deyil.

- "Turan Tovuz" ev oyunlarını Tovuzda günorta vaxtlarında keçirəcək? Çünki işıqlandırma ilə bağlı problemlər olduğu bildirilir...
- Tək işıqlandırmaya görə stadionu dəyişmək düzgün deyil. Şamaxıda da yoxdu. Ona az pul ayrılmır. Bunu bərpa etsələr, həmin komandanın yarım illik büdcəsi gedər. Onları bərpa etmək üçün zaman lazımdı. "Turan Tovuz"un stadionu məncə, liqanın oyunlarını keçirməyə hazırdır.

- Premyer-liqada komandaların sayının artması rəqabətə nə dərəcədə təsir edəcək?
- Ən azından oyunların sayı artır. Bütün çempionatın Bakıda keçirilməsi marağı da öldürürdü. Komandalar getsin, gözəl güşələrimizi də görsün. Ola bilər, “Turan Tovuz” və “Kəpəz” premyer-liqaya yeni qədəm qoyurlar. Amma əminəm ki, növbəti illərdə hər iki komanda öz gücünü göstərəcək.

- Sizcə, "Qarabağ" Çempionlar Liqasında "Sürix"i keçə biləcək?
- Belə düşünürdük ki, "Lex"i keçə bilməyəcək. Amma Qurban Qurbanov onların adını dəyişdi, "lox" etdi. Digər klublarımızın hər üçü də keçməlidi. Futboldu, 100 faiz heç nə demək olmaz. Borcumuz uğurlar arzulamaqdı. Nə kömək lazımdısa, etməliyik.

- Ramin Musayevi futbolumuzda narahat edən əsas məqam nədi?
- Onu otağıma gələrsən, danışarıq. Amma yaxşısı, “tet-a-tet”, mətbuat üçün yox, özümüz üçün. Komandaların sayı artdı ki, bu da sevindirici haldı. Topları da görəcəksiz. Toplarla bağlı problemimiz var. Qaydasına qoyulmalıdı. Bu il də komandalar AFFA tərəfdindən toplar hədiyyə olunacaq. VAR sistmi 1-ci turdan fəaliyyətə başlayacaq. Rəhbəri də türkiyəli mütəxəssisdir. Barış Şimşek Yıldırım bizimlədi. Maraqlandıq onunla, çalışqan adamdı. Ona kömək etmək borcumuzdu. Hardasa bir az da yerlimdi.

- Klublar stadionlarda media sektoruna önəm vermir....
- Bütün stadionlarda birinci tələbimiz jurnalistlərin oturacağı yerlərlə təmin olunmasıdı. Hansısa stadionda problemlə rastlaşsaz, həmin dəqiqə bizə məlumat verin. Heç kəsin ixtiyarı yoxdu ki, sizin xətrinizə dəysin.

- Uzun müddət hakimlər PFL-in nəzarətində oldu. AFFA-ya veriləndən sonra hakimlik lap aşağı səviyyəyə düşdü. Sizin dövrünüzdə yetişənlər də "itdi-batdı". Bu, sizi narahat edir?
- Burda AFFA-nı günahlandırmaq lazım deyil ki, xarici gəldi, hakimlərimiz belə oldu. Sözsüz ki, narahat olmaya bilmərik. Bəzi hakimlərimizi itirdik. Rəhim Həsənov FIFA referisi ola-ola hakimlikdən uzaqlaşdırılıdı. Səbəbi də bəlli deyil. Gedənin dalınca danışmazlar. Ən azından 3-4 nəfər qaldı. Buna da şükür.

- Klublara 3 milyon verilirsə, premyer-liqada sonuncu olan klub 1-ci diviziona yuvarlana və həmin məbləğ yuxarı qalxacaq tərəfə verilə bilərmi?
- Onsuz elə olacaq da. Bu il qərar verildi ki, liqada sonuncu yeri tutan diviziona yuvarlanacaq, aşağı dəstədə çempion olan yüksək liqaya gələcək. Amma ola bilər ki, "Qarabağ-2", "Zirə-2" çempion oldu, onları çempionata gətirə bilmərik. Elə komanda da çempion ola bilər ki, özü gəlmək istəməsin. Heç kimin haqqına girə bilmərik. "Neftçala" 3 il çempion oldu, amma gələ bilmədi. Həmin vaxt, doğurdan da, məsələ maliyyə idi. Amma bu il dövlət pul ayırırsa, həmin komandaya da şamil olunacaq. Bizim üçün fərqi yoxdu.

- İslam Həmrəliyi Oyunlarına görə fasilə olacaq?
- UEFA tərəfindən nəzərdə tutulubsa, hə.

- VAR sisteminə görə oyun 90 dəqiqə yox, uzun ola bilər. Burda yayın məsələsini necə tənzimləyəcəksiz?
- VAR sistemiylə bağlı rəhbərliklə görüşdük. Bu gün bir maşınları var və ondan bir oyunda istifadə edə bilərlər. Söhbət bölgələrdən gedir, Bakıdakı oyunlarla bağlı problem yoxdu. 80 km məsafədən istifadə olunurlar. Xahiş etdilər ki, yanvara qədər bölgələrdə eyni gündə iki oyun olmasın. Çünki çatdıra bilməzlər. Biz də belə qərar gəldik ki, hər turda üç gündən istifadə edək: cümə, şənbə və bazar günündən.

- Son günlər koronavirusa yoluxma sayı artır. Hətta qapalı məkanlarda maskadan istifadə etməyi təklif ediblər. PFL bu dəfə bu məsələyə daha hazırlıqlı olacaq? Operativ Qərargahla danışıqlar aparmısız?
- Püşkatmamışdan əvvəl Rövnəq müəllim çıxış etdi və göstəriş verdi ki, Operativ Qərargahla əlaqədə olun və tez-tez danışın. Ehtiyatlı olmaq lazımdı. İnsan üçün ən vacibi can-sağlığıdı. Sözsüz ki, pandemiya ilə bağlı peşəkarlaşmışıq. Əsasnamədə də pandemiya ilə bağlı qeydlər var. Böhran gəlsə, ona hazırıq. Çalışarıq ki, olmasın, Allahın işidi. Məlumatımız var ki, yoluxma sayı artır. 19-da "Qarabağ" oynayır. Rəhbərlik nə göstəriş verərsə, ona əməl etmək borcumuzdu.