“La Gazzetta dello Sport” Joze Mourinyo haqda maraqlı məlumat yayıb. Deyəsən, “Roma”nın baş məşqçisi yeni mövsümə olduqca ciddi şəkildə köklənib.

59 yaşlı mütəxəssis bu dəfə məşq prosesində tətbiq etdiyi fərqli metodlarla diqqəti öz üzərinə çəkib. O, gündə iki dəfə məşq keçirdiyi komandanın oyunçularının günorta və axşam yeməkləri üçün evlərinə qayıtmasına icazə verib. Həmçinin “Roma”nın bütün üzvlərindən qan analizi üçün testlər götürülüb. Futbolçulardan başqa klubun media departamentində işləyənlərlə də maraqlanan Mourinyo onlardan komandanın məşqi zamanı şəkil və video çəkməmələrini istəyib. Portuqaliyalı çalışdırıcının bu addımları hansı səbəbdən atması məlum deyil. Hər halda buna aydınlıq gətirməyi lazım bilməyib. Onun artıq çəkisi olan futbolçularını qorumaq və onların normal çəkiyə qayıtması üçün belə fərqli metodlara əl atdığı ehtimal olunur.

Qeyd edək ki, Mourinyo “Roma”nın baş məşqçi vəzifəsinə bir il əvvəl təyinat alıb. 2021/22 mövsümündə A seriyasını 6-cı yerdə başa vuran komanda ilk dəfə keçirilən Konfrans Liqasının qalibi olub.