Rizvan Fərzəliyev: “Çox güman, məşqçi kimi davam edəcəm”
Rizvan Fərzəliyevin futzal yığmasındakı karyerasını başa vurduğunu xəbər vermişdik.
38 yaşlı futzalçı uzun illər yığmanın baza klubu "Araz-Naxçıvan"ın heyyətində çıxış edirdi. Maraqlıdı, Fərzəliyev millidən sonra klub karyerasını da bitirmək haqda düşünürmü?
Bu suala cavab tapmaq üçün onunla əlaqə saxladıq:
"Hələ ki istirahətdəyik. Milli karyeramı başa vursam da, “Araz-Naxçıvan”dakı gələcəyimlə bağlı rəhbərliyin qərarını gözləyirəm. Bizdə müqavilə birmövsümlük bağlanır deyə, hazırda azad agent sayılıram. Çox güman, məşqçi kimi davam edəcəm. Artıq qərarım odu ki, oynamayacam. Həvəskar səviyyədə ola bilər, amma peşəkar karyeramı bitirmişəm. "Araz-Naxçıvan" mənə oyunçu kimi davam etməyi təklif etsə də, böyük ehtimalla qəbul etməyəcəm".
Qeyd edək ki, Rizvan Fərzəliyev 2003-cü ildən “Araz-Naxçıvan”ın formasını geyib. Uzun müddət həm bu klubun, həm də yığmanın kapitanı funksiyasını yerinə yetirib.
ŞAİR ABDULLA
