Kanada – Panama matçı baş tutmayıb. Buna ev sahibi komandanın oyunçuları səbəbkar olublar.

Yoxlama oyunu iyunun 5-də keçirilməli idi. Lakin Kanada millisinin üzvləri sınaq matçına çıxmaqdan imtina ediblər. “The Athletic” nəşrinin yazdığına görə, oyun ərəfəsində futbolçularla Kanada Futbol Assosiasiyasının (KFA) rəhbərliyi arasında qalmaqal yaşanıb. Buna səbəb DÇ-2022-yə vəsiqə qazanan komanda üçün nəzərdə tutulan mükafatların düzgün bolüşdürülməməsi səbəb olub. Futbolçular federasiyaya ayrılan ümumi mükafatın 40 faizinin onlara verilməsini tələb ediblər. Onlar

ötən həftənin cümə və şənbə günləri məşqə, bazar günü isə Panama ilə oyuna çıxmaqdan boyun qaçırıblar. Milli üzvləri yaydığı bəyanatda ölkənin futbol rəhbərliyini onlara hörmətsizlik etməkdə günahlandırıblar. Onlar məlum hadisəyə görə azarkeşlərdən üzr istəməyi də unutmayıblar. Futbolçuların digər tələbi də var: onlar KFA-dan teleyayın və sponsorluğa görə müqavilələrə yenidən baxılmasını da tələb ediblər.

Yeri gəlmişkən, Kanada millisinin KONKAKAF Millətlər Liqasının qrup mərhələsində cümə gününə təyin olunan oyunu baş tutub. “Qırmızı-ağlar” Kürasaonun qapısından 4 cavabsız top keçiriblər. Deyəsən, futbolçuların tələbləri yerinə yetiriləcək...