Samir Əliyevin narazı qaldığı məqamlar çoxdu
20 yaşadək futbolçulardan ibarət yığmanın Bakıda təlim-məşq toplanışı davam edir.
"Football-plus.az" xəbər verir ki, komanda artıq ilk yoldaşlıq oyununu da keçirib. İyunun 5-də özbəkistanlı həmyaşıdları ilə qarşılaşan U-20 rəqibini 3:2 hesabıyla yenib. Camal Cəfərov het-trik müəllifi olub.
U-20-nin baş məşqçisi Samir Əliyevin Özbəkistanla matç haqda fikirlərini öyrəndik: “Bu yaş qrupu üzrə milli 2 ildən çox idi beynəlxalq oyun keçirmirdi. Belə bir şans yarandı. Biz də istədik ki, bundan yararlanaq. Qarşıdan İslam Həmrəyliyi Oyunları gəlir. Hazırda ikisi qapıçı olmaqla 7 futbolçumuz U-21 millisindədi. Ona görə istədik ki, ilk dəfə düşərgədə yer alan futbolçuları yoxlayaq. Meydanda əllərindən gələni etdilər. Bunun nəticəsidi ki, qələbə qazandıq. Rəqib də zəif komanda deyil. Asiyada ilk “5-lik”də olan ölkədi, güclü rəqibdi. Düzdü, keyfiyyət baxımından axsamalar var idi. Narazı qaldığımız məqamlar da çoxdu. Futbolçular öz klublarında işləməlidi. Bizim onlarla işləmək üçün vaxtımız az olur. Amma məqşçilər korpusu olaraq, komandadan razı qaldıq”.
Yığma növbəti yoldaşlıq matçını bu gün yenə Özbakistana qarşı keçirəcək. Görüş saat 19.00-da Bakı Olimpiya Stadionunun ehtiyat meydanında başlayacaq. Görəsən, baş məşqçi bu oyun haqda nə düşünür? Samir Əliyevi dinləyək: “İlk oyunda şans vermədiyimiz futbolçular var idi. İkinci görüşdə məhz onlara şans veriləcək ki, özlərini göstərsinlər”.
ŞAİR ABDULLA
Digər xəbərlər
