Bu yay “Barselona”nı xeyli çox futbolçu tərk edə bilər.

"Football-plus.az" xəbər verir ki, Kataloniya klubunun rəhbərliyi 10-dan çox oyunçuya yeni komanda axtarmağı təklif edəcək.

Baş məşqçi Xavi heyəti yenidən qurmağı planlaşdırır. Lakin bəzi oyunçular ayrılmaq istəmirlər. Həmçinin, “Barselona”da aldıqları yüksək maaşlar səbəbindən klub onları satmaqda çətinlik çəkir.

Xavi Riki Puçu, Oskar Minqesa, Martin Braytveyt və Samuel Umtitiyə onlarla uzunmüddətli planlarının olmadığını bildirib. Kleman Lanqle, Ferran Cucle, eləcə də icarədən qayıdan Miralem Pyaniç və Fransisko Trinkaunun da ayrılması istənilir.

“Barsa” bu mövsüm klubda icarə əsasında çıxış edən Adam Traore və Luc de Yonqu da satın almayacaq. Usman Dembele və Dani Alveşin gələcəyi ilə bağlı qeyri-müəyyənlik var. Onların müqavilələri iyunun 30-dək qüvvədədi.

Çətin maliyyə vəziyyətinə görə klub Memfis Depay və Frenki de Yonq üçün yaxşı təklifləri də dinləməyə hazırdı.