Patrik Andrade - “Qarabağ”ın əsas simalarından olan yarımmüdafiəçi son mövsümdə özündən söz etdirməyi bacardı.

Kabo Verdedən olan futbolçu komandanın çempionluğunda və Konfrans Liqasının pley-offuna vəsiqə qazanmasında böyük rol oynadı. 29 yaşlı futbolçunun adı son vaxtlar tez-tez transfer xəbərlərində hallanır.

- Azərbaycan çempionu olmaq necə hissdi?

- Möhtəşəm! Həqiqətən çox xoşbəxtəm. Mövsümün qalibi olduq. Hər matça peşəkar yanaşıb, sonda istəyimizə çatdıq. Bu, mənim və ailəm üçün vacib idi. “Qarabağ”la çempionluq yaşamaq istəyirdim. Məqsədimə çatdığıma görə xoşbəxtəm. Kuboku da qazanmağa çalışacağıq. Çünki mövsümü iki titulla bitirmək istəyirik.

- Bəs Çempionlar Liqası ilə bağlı hədəf nədi?

- Bu haqda hələ düşünmürəm. Çünki bizi qarşıda çox vacib oyun gözləyir. “Zirə” ilə kubokun finalını deyirəm. Ondan sonra Çempionlar Liqası haqda düşünməyə başlayacağıq.

- “Qarabağ”ı tərk edəcəyinlə bağlı deyilənlər nə dərəcədə doğrudu?

- Hələ dəqiq nəsə bilmirəm. Menecerim bu həftə Azərbaycana gələcək. O, klubla bəzi məsələləri müzakirə edəcək. Necə olacağı bundan sonra bəlli olacaq. Hələ ki gözləmə mövqeyindəyik.

- Deyilənə görə, “Qarabağ”la maliyyə məsələsində razılaşa bilmirsən. Ağdam təmsilçisindən maaşının artırılmasını tələb edirsən...

- Xeyr! Təbii ki, yalandı. Deyirlər ki, klubdan həddən artıq çox pul tələb edirəm. Yaxşı olmaq üçün çox çalışmaq lazımdı. Özünü sübut edəndən sonra gəlirin də yaxşı olmalıdı. Bu məsələni menecerimlə klub həll edəcək. Hər şeyin mənim üçün yaxşı olmasına çalışacağıq.

- Kabo Verde yığmasının heyətində Afrika Millətlər Kubokunda iştirak etdin. Orda səndən “Qarabağ” haqda nələr soruşurdular?

- Hazırda ölkəmdə hamı bilir ki, bu komandada çıxış edirəm. Artıq vətənimdə hər kəs “Qarabağ”ı tanıyır, haranı təmsil etdiyini bilir. Bu mənim üçün qürurvericidi. Mənim sayəmdə ölkəmdəki insanlar Azərbaycan haqda öyrənirlər.

İLKİN SULTANLI