Rusiyanın Ukraynaya hərbi təcavüzü bir çox başqa turnirlər kimi, “Formula-1”in də təqviminə təsirsiz ötüşməyib.

“Formula-1” rəhbərliyi ləğv olunan Rusiya “Qran-pri”sinin əvəzinə heç bir yarışın olmayacağını deyib. Sentyabrın 23-25-i aralığında keçirilməsi planlaşdırılan, ancaq məlum səbəbdən ləğv olunan Soçi yarışının əvəzinə alternativlər axtarılırdı. Əsas namizəd Qətər olsa da, futbol üzrə dünya çempionatına hazırlıq prosesinə görə bu mümkün olmayacaq. Logistika cəhətdən başqa ölkə tapılmadığı üçün “Formula-1” rəhbərliyi Rusiya mərhələsinin əvəzinə yarış keçirməməyi qərara alıb. Nəticədə 2022 mövsümü 22 mərhələdən ibarət olacaq, İtaliya və Sinqapur yarışları arasında üçhəftəlik fasilə yaranacaq. Bu hal büdcə limiti ilə bağlı problem yaşayan komandalar üçün yaxşıdı.

“Formula-1” üzrə yeddiqat dünya çempionu, cari mövsümdə o qədər də inamlı təsir bağışlamayan Lüis Hemilton şəhər trassları haqda danışıb:

“Bir qədər köhnəfikirliyəm. Buna görə də bəzi tarixi trassları sevirəm. Amma yaşlandıqca zövqlərin müxtəlifliyini anlayıram. Çox az insanın yaşadığı, yaxşı otelləri və auditoriyası olmayan yerlərə gedə bilərik. Bizim üçün tarixi olan trassda sürmək daha əyləncəli olar, ancaq bu insanlardan asılıdı. Yarışda atmosferi azarkeşlər yaradır. Pandemiya vaxtı gördük ki, onlarsız mümkün deyil. Yarışlar testləri xatırladırdı və həzz vermirdi. İndi isə sevə-sevə yarışlara gəlirlər. Daha çox insanın olduğu şəhərlərə getməliyik. Nurburqrinqi çox sevsəm də, orda insan azdı. Mayamidə isə çox şey etmək olar. Orda mühəndis kimi işləmək istəyən uşaqlarla tanış oldum və bu, mənim üçün gözəl idi”.

Bildiyiniz kimi, şəhər trasslarından biri də Bakının payına düşür. Azərbaycan paytaxtında yarış iyunun 10-12-si aralığında keçiriləcək.