“Neftçi”nin idman direktoru olduğu vaxt daim mətbuatın maraq dairəsindəydisə, klubdan ayrılandan sonra sanki bir qədər kölgəyə çəkilib.

Söhbət Ceyhun Sultanovdan gedir. Dünən onunla əlaqə saxladıqda əvvəlcə “ölkədə deyiləm, müəyyən işlərlə bağlı bəzi görüşlərim planlaşdırlıb. Axşam danışarıq” söylədi. Sonra dediyi vaxtda vədinə əməl edərək, özü bizə əlaqə saxladı. Sultanovla qısa söhbətdə bir çox mətləbə toxunduq.

- Sabah (bu gün) keçiriləcək son turun oyunları ilə çempionat başa çatacaq. Nə gözləyirdiz, sonda nə gördüz?
- Yekun turnir cədvəli gözlədiyim kimi də oldu. Ola bilsin, “Sabah” bir qədər məni yanıltdı. Çünki mövsümün əvvəlindən bu komandadan çox şey gözləyirdim. Ancaq ilk dövrəni boşa verdilər. “Qəbələ”nin də avrokuboklara yollanması mənim üçün bir qədər gözlənilməz oldu. Ancaq onu da deyim ki, Elmar Baxşıyevin çalışdırdığı komanda mövsümboyu sərgilədiyi oyunla qitəmiqyaslı turnirə yollanmağı haqq etdi. Ola bilsin, heyətin kasad olması onların işini bir qədər çətinləşdirmişdi. Heyət geniş olsaydı, rahat oynaya bilərdilər. Komanda sonda istəyinə çatdı ki, onları da buna görə təbrik etmək lazımdı.

- Son turun nəticələrindən asılı olmayaraq, avrokuboklara qatılacaq 4 komandanın adı bəllidi. Necə düşünürsüz, təmsilçilərimiz bu yay qitə səhnəsində uğurlu çıxışla bizi sevindirə biləcək?
- İlk növbədə həmin komandaların qarşısına qoyulan turnir hədəfini bilmək lazımdı. Eləsi var ki, qarşısına qrup mərhələsinə düşməyi məqsəd qoyub, eləsi də olur, 2-3 mərhələ keçməyi artıq uğur kimi qiymətləndirir. “Zirə”, “Neftçi”, “Qəbələ” Konfrans Liqasında uğur qazanmaq istəyirsə, heyəti mütləq gücləndirməlidi. Hər komandada axsayan mövqelər var. Bu yöndə yalnız “Qarabağ” istisnadı. Ağdamlıların heyəti yetərincə güclüdü. İlkin mərhələ üçün kifayət edir. Ancaq Çempionlar Liqası kimi mötəbər turnirdə daha da uzağa getmək istəyirlərsə, daha dəqiq desəm, qrup mərhələsi barədə düşünürlərsə, heyət bir qədər də güclənməlidi.

- “Neftçi”dən ayrılandan sonra qısa müddətdə yeni adı “Şamaxı” olan “Keşlə”də idman direktoru kimi çalışdız. Ordan gedəndən sonra artıq xeyli vaxtdı işsizsiz. Bu müddətdə hansısa klubdan iş təklifi almısız?
- “Keşlə”də çalışdığım 6 ayı da nəzərə almayın. “Neftçi”dən ayrılandan sonra heç bir klubdan iş təklifi gəlməyib. Açığı, heç gözləmirəm də. Çünki premyer-liqanın 8 klubundan, demək olar, 5-i AFFA-nın nəzarəti altındadı. Assosiasiya da istəyir ki, daim onlara baş əyən, dediklərini sorğu-sualsız yerinə yetirən funksionerlərlə işləsin. Mən isə heç vaxt elə olmamışam, bundan sonra da olmayacam. Kim mənə hörmət edəcək, ona hörmətlə yanaşacam, hörmət qoymayanı isə əzib keçəcəm. Bu gün ölkə futbolunun inkişafına cavabdehlik daşıyanların heç biri üçün futbol ictimaiyyətinin fikri önəmli deyil. Onlar yalnız öz bildiklərini edirlər.

- Niyə bu qənaətə gəlmisiz?
- İcariyyə Komitəsinin son qərarlarından sonra bir daha buna əmin oldum. Gündəliyə salınan məsələlər hardan gəlir? Təbii ki, klubların istəyi ilə hansısa məsələ müzakirəyə çıxarılır. Müzakirələrdən sonra həmin təklifi ya qərar kimi qəbul edirlər, ya da lazımsız bilib qəbul etmirlər. Məsələn, limit məsələsində olduğu kimi. Əksər klublar limitin götürülməsini istəyirdi. Ancaq İcraiyyə Komitəsi nə etdi? Limiti olduğu kimi saxladı. Bu da o deməkdi ki, AFFA-da oturanlar üçün klubların fikri önəmli deyil, hər məsələdə bildiklərini edirlər. Sonra da deyirlər ki, komitə üzvləri belə qərar verdi. Ay qardaş, orda səs verənlərdən biri çıxıb demir ki, bu qərarı nəyə əsaslanıb qəbul ediblər. Futbolumuzu düşünürsüzsə, klubların istəyi nəzərə alınmalıdı, yox, özünüzü düşünürsüzsə, açıq deyin, hamı bilsin. AFFA-da və İcraiyyə Komitəsində səsvermə hüququ olanların heç biri futbol camiəsinin istəyini nəzərə almır.

- Bəs 21 yaşadək futbolçularla bağlı limitin ləğvi barədə nə düşünürsüz? Bəziləri bunun lehinə, bəziləri isə əleyhinədi.
- Bizim vaxtımızda 21 yaşadək futbolçularla bağlı limit tətbiq olunmurdu. Məgər onda futbolçu yetişmirdi? Limit oldu-olmadı, futbolçu yetişəcək. Bu da lazımsız qərar idi.

- Yeni mövsümdən premyer-liqada 10 komanda çıxış edəcək. “Turan Tovuz”la “Kəpəz”in elitaya gəlişi ölkə futboluna nə verəcək?
- İki aydan bir maaş verəcəklərsə, heyətə səviyyəsiz futbolçular cəlb olunacaqsa, bu komandaların gəlişi ilə heç nə dəyişməyəcək. Ən yaxşı halda premyer-liqanın coğrafiyası genişlənəcək. Normal maliyyə olacaqsa, nəyəsə ümid etmək mümkündü. Ümumiyyətlə, Azərbaycan futbolu Bakıdan çıxmalı və bütün bölgələri əhatə etməlidi. Ancaq yenə deyirəm, klublar normal büdcəyə malik olmalıdı.

RƏŞAD