Region Liqasının yarımfinalında “Araz Naxçıvan” “Xan Lənkəran”ı 2:1 hesabı ilə məğlub etdi.

“Football-plus.az” xəbər verir ki, bununla da Muxtar Respublika təmsilçisi finala vəsiqə qazandı. Yarımfinal matçında 44 günlük Vətən müharibəsinin qaziləri də qonaq qismində iştirak edib. "Vətən Bağı" Sosial Təşəbbüslər İctimai Birliyinin dəvəti ilə stadiona təşrif buyuran qazilər - Vüsal Əliyev, Xəqani Muradov və Turan Hüseynli görüşü tribunadan canlı izləyiblər. Adı çəkilən şəxslər qarşılaşma ilə bağlı fikirlərini saytımıza bölüşdülər.

Vüsal Əliyev:"Bu gün "Vətən Bağı" Sosial Təşəbbüslər İctimai Birliyinin dəvəti ilə bu oyunu izləməyə gəlmişdik. Açığı, çoxdandı futbola baxmırdım. Amma zövq aldım. Təbii ki, qonaq komandanı - "Araz Naxçıvan"ı dəstəkləyirdik. Bizim üçün ayrılan oturacaqlara gedəndə naxçıvanlı azarkeşlərin bizi ayaq üstə alqışlaması və "Şəhidlər ölməz, vətən bölünməz" şüarı məni bir az kövrəltdi. Deməli, unudulmamışıq".

Xəqani Muradov: "Naxçıvanlı dostların dəvəti ilə bu oyuna baxmağa getmişdik. Qələbənin qazanılması isə lap yerinə düşdü. Amma cənublu azarkeşlərin də haqqını yemək olmaz. Oyundan zövq aldım".

Turan Hüseynli: "Əslən irəvanlı olsam da, Naxçıvanda doğulmuşam. Buna görə də Muxtar Respublika təmsilçisinə azarkeşlik edirdim. Stadionda bizi ayaqüstə alqışlayan azarkeşlərə də təşəkkür edirəm. Qismət olsa, "Araz Naxçıvan"ın ev oyunlarında da nə vaxtsa iştirak edəcəm. Ayağımız düşərli oldu, naxçıvanlılar qələbə qazanıb finala vəsiqəni təmin etdilər. Görüş Şamaxıda keçiriləcəyindən oyuna gedə bilməyəcəm. Amma finalda tərəfimiz bəllidi - "Araz Naxçıvan".