Sanşeş 5 saniyə içində iki sarı vərəqə aldı.

“Futbol+”də “turun axmaqlığı” rubrikası olsaydı, heç şübhəsiz, ötən həftənin qəhrəmanl kimi Renato Sanşeşi seçərdik. 5 saniyə içində iki sarı və ardından qırmızı vərəqə alan portuqaliyalı yarımmüdafiəçi üçün bundan yüngül ifadə seçmək çətindi.

“Lill” Fransa çempionatında 2020/21 mövsümünün qalibi idi. Ancaq indi çətin bu uğurla öyünmək hayında ola. Joslen Qurvennekin komandası hazırda turnir cədvəlinin 10-cu pilləsində qərarlaşıb. “Şimallı itlər” 35-ci turda autsayderlərdən “Trua” önündə darmadağın oldu – 0:3. Bütün qolları penaltidən buraxdılar.

Artıq ilk yarının sonunda – 43-cü dəqiqədə VAR-ın da yardımı ilə Tristan Dinyomun yerdə qalmasını qiymətləndirən hakim Villi Delajo ilk penaltini təyin etdi. Meydan sahibləri bu yolla önə çıxsalar da, poruqaliyalı Sanşeşin yersiz qovulması məğlubiyyətdə həlledici rol oynadı.

Portuqaliyalı 50-ci dəqiqədə oyundaşı Burak Yılmazın yol verdiyi fola görə şikayətləndi. Rəqibin müdafiəçisi Julian Byankonu artistlikdə ittiham edən Renato referidən ilk “sarı”nı aldı. Ancaq sakitləşmədi və jestlərlə eynək və ya binokl göstərdi. Hakim zərrəcə düşünmədən dərhal cibindən növbəti dəfə sarı vərəqə çıxardı. Beləliklə, tarixə düşəsi, 5 saniyə içində gerçəkləşən qovulma baş tutdu. Halbuki portuqaliyalı bu zaman kəsiyində nə kobudluq etdi, nə də topa toxundu. Qəzəbli Sanşeş hakimə, sadəcə, jestlərini izah etməyə çalışsa da, Delajo fikrindən dönmədi. Portuqaliyalını meydandan oyundaşları çıxardı, “Lill” isə bundan sonra “yatdı”. Bir neçə dəqiqə sonra “Trua” daha bir penaltini qola çevirdi – bu dəfə İke Uqboya qarşı kobudluq qeydə alınmışdı.

68-ci dəqiqədə “Lill”dən daha bir oyunçu qovuldu – yuxarıda adını çəkdiyimiz Burak əks-hücumun qarşısını almaq üçün meydanın mərkəzində rəqibin kapitanını “sürüşmə” fəndi ilə qarşıladı. Sərt Delajo dərhal “qırmızı”ya əl atmaqla Burakı şoka saldı. Türk hücumçu da qəzəbli baxışlarla paltardəyişmə otağına yollandı.

Oyunun sonunda – 86-cı dəqiqədə hakim Yasser Larusiyə qarşı kobudluğa görə “Lill”in qapısına 3-cü penaltini təyin etdi. Qonaq futbolçular artıq Delajonun qərarına ironiyalarını gizlətmədilər, onu alqışladılar.

“Lill” son 30 ildə Fransa çempionatında bir çempionat oyununda iki qırmızı vərəqəyə “layiq görülən”, qapısına üç penalti təyin olunan ilk komandadı.

Əlbəttə, çempion mövsüm ərəfəsində belə aqibət arzulamırdı. “Lill”in prezidenti Olivye Letan belə hesab edir ki, komandasını son turda cəzalandırıblar:

“Hər kəs nəyin baş verdiyin gördü. Ötən həftə bir məktub gördüm, onun əsasında anladım ki, “Trua” aprelin 24-də - “Nitsa” ilə oyunda bir neçə penalti qazanmalıydı. Ancaq qazanmadı. Hakimlik mövzusuna qayıtmaq istəmirəm, ancaq VAR-ın səviyyəsi və faydası ilə bağlı qeydlərimizi çatdırmalıyıq. Həmin məktubdan və həftə ərzindəki bütün polemikalardan sonra hələ qapımıza ilk penalti təyin olunmamış yanımda əyləşənləri nələrin olacağından xəbərdar etmişdim. Təəssüf ki, haqlı çıxdım”.