Son günlərdə “feysbuk”da bir post diqqətimi çəkir. Məlumunuz olsun ki, Azərbaycan şahmatında önəmli yerə sahib olan Məmmədyarovlar ailəsi məktəb açıb. Bəs “feysbuk”dakı postun diqqətimi çəkməsinin səbəbi nədi? Həmin məktəbin rəsmi “feysbuk” səhifəsi Şəhriyar Məmmədyarovla Qurban Qurbanovun şəkli olan post paylaşıb. Məsələnin məğzi belədi: mayın 17-də “Şah” bu məktəbdə “ustad dərsi” keçəcək. Fəxri qonaq da Qurban Qurbanov olacaq. Bura qədər hər şey əladı. Amma problem başqadı. Postun içində qeyd olunub ki, “ustad dərsi” ödənişlidi. Burda qəribə heç nə yoxdu. Dünyanın hər yerində özəl məktəblərdə seanslar, “ustad dərsləri” ödənişli olur. Amma...

Seansda iştirak etmək istəyən şəxs 350 manatından keçməlidi. “Ustad dərsi” ümumilikdə 7 saat (9.30 – 16.30) sürəcək. Saat 12.30 – 14.00 aralığında iştirakçılar üçün nahar və istirahət nəzərdə tutulub. Təqaüdçülərin 250 manat aldığı ölkədə 350 rəqəminin hardan götürüldüyü bilinmir. Yox, Şəhriyar qonaqlara ağ balıqla bahalı şərab təklif edəcəksə, bu başqa məsələ! Məsələnin başqa tərəfi də var. Azərbaycanda bu idman növünə həvəs göstərənlər əsasən kasıb ailələrdən çıxan uşaqlardı. İmkanı olmayan, amma ölkə idmanının iki görkəmli simasını bir arada görmək istəyənlər nə etsin?! Daha bir məqam: məktəbin paylaşdığı statustda bütün detallar göstərilib, amma məbləğ yoxdu. Görəsən, niyə? “Məmmədyarovlar şahmat məktəbi” “instaqram”da hansısa məhsul satır ki, qiymətlə maraqlananlara “inboksa yazdım” desinlər? Ümumiyyətlə, gəlin qanuni tərəfdən danışaq: niyə məbləğ gizli saxlanılır? Bunun vergisini dövlətə ödəyən olacaq? Və mənim üçün daha bir vacib məqam: adım kimi əminəm ki, Qurban Qurbanov “ustad dərsi”nin qiymətinin 350 manat olduğunu bilmir. Bilsə, yəqin burda iştirak etməz. Niyə onun adından istifadə edib, pul qazanırsız? Kəsəsi, ən yaxın illərə qədər ölkəyə şahmat tacını gətirəcəyinə inandığımız bir şəxs bu gün özünü böyük biznes adamı kimi aparmağa üstünlük verir. Xeyirli olsun!

HÜŞƏNG

P.S. Yadıma gəlir, bir dəfə Şəhriyar sponsorların yoxluğundan şikayətlənib, Prezidentə müraciət etmişdi. Dərhal da problemi həll olunmuşdu.