“Atletiko” – MS oyunu hər iki ölkədə geniş əks-səda doğurdu - YAZI
Atletiko” ilə “Mançester Siti” arasındakı oyunun (0:0) sonluğu hədsiz “isti” keçdi: meydanda az qala hamı itələşirdi, Felipe qırmızı aldı, Simeone ironiya rəmzi kimi uzun müddət əl çaldı, həmin anlarda bütün stadion “Qvardiola – qə... oğlu” qışqırırdı.
Oyundan sonra da münasibətlərin aydınlaşdırılması davam etdi. “Atletiko”nun müdafiəçisi Şime Vrsalko MS-dən olan həmkarı Kayl Uokerə qapıçı əlcəklərini atdı və tüpürdü. Qalan futbolçular və rəsmi şəxslər onları çətinliklə ayırdı. UEFA nümayəndəsi hadisə yerinə polis çağırmalı oldu. Bu komandaların təmsil etdiyi ölkələrin mediası, gözlənildiyi kimi, hadisəyə fərqli yanaşıb.
İspaniyada “Atletiko”nu tərfləyir, “Siti”ni darmadağın edirlər
“As” qəzetindən olan həmkarlarımızın fikrincə, məhz “Siti” oyunu çirkinləşdirib:
“Sonda baş verən dava-dalaş Fodenin “vaxtı öldürmək” üçün ora-bura vurnuxmasının nəticəsidi. Və bu, İngiltərə komandasının 2-ci hissədə edə bildiyi yeganə şey idi. İngilislər üçün “feyr-pley” anlayışının olması və onların simulyasiyaya əl atmaması artıq şəhər əfsanəsi kimi dolaşır. “Atletiko” yarımfinala adlamaq üçün 2-ci hissədə mümkün olanı etdi, “Siti” isə yarımfinalda olmamağı haqq etməmək üçün mümkün hər şeyi eydi. Və qonaqlar hədəfinə çatdı”.
“Marka”nın yazısında “Atletiko”nun oyunu hədsiz yüksək qiymətləndirilib. Sərlövhələrdən biri belədi:
“Hər kəsə Saviç kimi lider lazımdı”. Xatırladaq ki, məhz Saviç dava-dalaşda ən fəal iştirak edənlərdən biridi, Cek Qrilişin saçından tutub dartmağa da imkan tapdı.
Qəzet Felipenin oyununa da münasibət bildirib. “Marca” belə hesab edir ki, hakim ona hədsiz sərt cəza verib:
“Oyunun sonunda düşən davaya görə meydandan qovulana qədər müdafiədə düzgün oynadı. Fodenlə bağlı epizodda hədsiz sərt cəzalandı”.
İngiltərədə “Atletiko”nun sərtliyindən yazırlar
Yuxarıda da vurğuladığımız kimi, İngilərə nəşrləri tam əks mövqe tutub.
Talksport: “Dieqo Simeone və yetirmələri nəzarəti itirdilər və “Vanda Metropolitano”nu UFC-dəki səkkizgüzəli oktaqonuna çevirdilər”.
The Mirror: “Simeone bu gecəni qonaqlar üçün əlverişsiz, gərgin və hətta ağrıdıcı etmək, onları özündən çıxarmaq, çapıq qoymaq istəyirdi”.
İngiltərəli jurnalist və yazıçı Daniel Stori “tvitter” hesabında yazır: “Ən çox xoşuma gələn cəhət budu ki, “Atletiko”nun oyunçuları rəqibi “zibil” sayanda sifətlərində necə də sakit ifadə olur”.
“The Athletic”in əməkdaşı Karl Anka bu yazı ilə bağlı yazılan şərhlərə qoşularaq əlavə edib:
“Atletiko”nun oyunçularının rəqibin cərimə zərbəsini vurmalı olduqları yerlə bağlı etirazları çox xoşuma gəlir: “yox, 5 düym solda qaydanı pozmuşam, topu yana çəkin”.
Bütün bu mövqelərə baxanda “The Mirror”un əməkdaşı Kolin Millar daha təmkinli görünür:
“Futbol oynayan və ona baxan kişilərin problemi ondan ibarətdi ki, biz hədsiz emosional oluruq”.
Reaksiyalar
Enrike Sereso, “Atletiko”nun prezidenti:
“Komandamızın statusu elə yüksəkdi ki, hər söz bizi incidən deyil. Nəticədə hamı gördü ki, istənilən komanda tarixəqədərki futboldan yararlana bilər (MS-nin baş məşqçisi Pep Qvardiola ilk oyundan sonra demişdi ki, “indi də, tarixəqədərki dövrdə də 5-5-0 sxeminə qarşı oynamaq çətindi” – red.). Yaxşı oyun keçirdik, hücum etdik, “Mançester Siti” isə tarixəqədərki futbol göstərdi, qol buraxmamaq üçün qapısı önündə divar hördü, müdafiə olundu. “Siti” istisnasız müdafiə olunan komanda idi. Bütün 2-ci hissə ərzində rəqibin “çərçivə”yə gedən bir zərbəsi oldu”.
Ouen Harqrivz, İngiltərə yığmasının sabiq xavbeki:
“Siti” yüksək oyun və özünənəzarət səviyyəsi göstərdi. “Atletiko”nun sondakı davranışı rüsvayçı idi. Sadəcə, gözəl futbol oynayın! Belə hərəkətlər ikrah doğurur. Daha möhkəm olan “Mançester Siti”nin haqqını vermək lazımdı”.
Digər xəbərlər
