Füzuli Məmmədov “Qaradağ Lökbatan”ın uğurunun sirrini açıqladı
Birinci divizionda mövsümün sonuna 5 tur qalmasına baxmayaraq, “Qaradağ Lökbatan” 21-ci oyun həftəsi çərçivəsində baş tutan MOİK ilə oyundan qalib ayrılmaqla ilk iki yerdən birini tutacağını rəsmiləşdirdi.
Böyük ehtimalla Bakıətrafı qəsəbə təmsilçisi artıq növbəti turda çempionluğu bayram edəcək. Bu münasibətlə lökbatanlıların baş məşqçisi Füzli Məmmədovla (rəsmi protokollarda baş məşqçi kimi Rafael Əmirbəyovun adı yazılsa da, faktiki komandanı Füzuli bəy çalışdırır) əlaqə saxlayıb mövsümlə bağlı fikirlərini öyrəndik:
“Əvvəlcə onu bildirim ki, birinci divizionda carı mövsüm çox gərgin idman mübarizəsində keçir. Hər matç yeni bir çağırışdı. Bütün oyunlara maksimum hazır olmalısan ki, istədiyin nəticəni əldə edəsən. Məsələn, götürək elə böyük hesabla qalib gəldiyimiz MOİK-lə son oyunu. Bəlkə də hesab bəzilərini yanılda bilər. Qalib ayrılsaq da, uduza da bilərdik. Və ya “Zirə-2” ilə qarşılaşmanı xatırlayaq. Autsayder olmasına baxmayaraq, onları son dəqiqə qolu ilə yenib 3 xal qazana bildik. Hər matça son oyun kimi çıxırdıq və bunun da bəhrəsini gördük. Büdcəmiz aşağı olduğundan, heyətimiz də geniş deyil. Və heyətdəki gənclərin əksəriyyəti ilk dəfə məhz cari mövsümdə divizion həyəcanı yaşadı. Futbolçular məşqçilər korpusuna, biz də onalara inamın nəticəsində ortaya belə bir iş qoymağı bacardıq”.
Füzüli bəy “Qaradağ Lökbatan”ın “sükanı arxasına” keçməmiş premyer-liqada ölkənin ən köklü klubu “Neftçi”ni çalışdırıb. Görəsən, elitadan sonra aşağı dəstədə işləmək 44 yaşlı mütəxəssis üçün çətin olmayıb? Məmmədovun reaksiyası belə oldu:
“İnanın, hər yerin özünəxas çətinliyi var. Əlbəttə, premyer-liqa mənim üçün əla təcrübə oldu. Birinci divizionda təcrübəmi bir qədər də artırdım”.
“Qaradağ Lökbatan”ın baş məşqçisi eyni zamanda U-15 və U-16-nın da çalışdırıcısıdı. Bəzən deyirlər ki, bir əldə iki qarpız tutmaq mümkün deyil. Ancaq göründüyü kimi, Füzuli bəy bunu bacardı. Özü isə bu barədə bunları söylədi:
“Bilirsiz ki, divizionda işləməyimin əsas səbəbi PRO kateqoriyalı məşqçi kurslarına qatılmağımdı. Kursun tələblərinə uyğun divizionda çalışıram. Mən U-15 və U-16-nın baş məşqçisiyəm. Artıq kursun da sonuna yaxınlaşırıq. Amma nə olur-olsun, harda işləməyimdən asılı olmayaraq, bildiyimin ən yaxşısını verməyə çalışmışam və belə də davam edəcəm. Baxmayaraq ki, bəzən çətin olur”.
Yuxarıda qeyd etdiyimiz kimi, idman prinsipləri nəzərə alınsa, “Qaradağ Lökbatan” növbəti mövsüm elitada çıxış etməlidi. Ancaq lisenziyalaşdırmanın tələblərinə cavab verə bilmədiyindən qəsəbə təmsilçisi növbəti mövsümdə də aşağı dəstədə mübarizə aparmağa məhkumdu. Məmmədov bizimlə söhbətdə hazırkı vəziyyətdə bunun mümkün olmadığını və bununla barışdıqlarını söylədi:
“Biz də istərdik ki, komanda elitada çıxış etsin. Ancaq premyer-liqada iştirak üçün tələblər var. Həmin tələblər yerinə yetirilmədən premyer-liqada çıxış etmək mümkünsüzdü. Bu olmasa, elitanın səviyyəsi aşağı düşər. Fikrimcə, lisenziyalaşdırmanın tələbləri önəmlidi və onlar yerinə yetirilmədən heç bir klub premyer-liqada çıxış edə bilməz”.
RƏŞAD
Digər xəbərlər
