Bu gün Bakıda səfərdə olan Qazaxıstanın Azərbaycan əsilli UFC döyüşçüsü Rafael Fiziyevin mətbuat konfransı keçirilib.

Bakı Gənclər Mərkəzində təşkil olunan tədbirdə çıxış edən 29 yaşlı idmançı təəssüratlarını bölüşüb:

- Səfər kim tərəfindən təşkil olunub?
- Gənclər və İdman Nazirliyi tərəfindən dəvət olundum. Burda dostlarımız var, onların vasitəsilə əlaqə saxlamışdıq. Azərbaycana gəlmək çoxdankı arzum idi. Çünki burda olmamışdım. Ölkəmizi görməyi çox istəyirdim.

- Koronavirusa görə son döyüşü buraxmalı oldunuz. Özünüzü necə hiss edirsiniz?
- Bəli, koronavirusa yoluxmuşdum. Artıq bərpa olunmuşam, hər şey normaldı. Əsas mərhələyə hazırlaşıram. İyunda titul üçün döyüşə çıxacağam. Mənim gücümü qəfəsdə görəcəklər.

- Azərbaycanda döyüş keçirmək planınız yoxdu?
- Planlar çoxdu. MMA azarkeşləri çoxdu. Amma bu məndən asılı deyil.

- Azərbaycan döyüşçülərin MMA-da iştirak potensiallarını necə görürsünüz?
- Ölkədə yaxşı idmançılar var. Bunun üçün güclü baza lazımdı. Yaxşı güləşçilər, cüdoçular var. Hansı ki, onlar kifayət qədər titullar qazanıblar. Tofiq Musayev, Nəriman Abbasov kimi idmançıların adlarını çəkə bilərəm. Onlar Rusiyada çox qələbələr qazanıblar. İnanıram ki, bu idman növü Azərbaycanda inkişaf edəcək.