“Qəbələ” rəhbərliyi U-18 üçün bir meydan ayırıb - AÇIQLAMA
Fasilədə bütün aşağı yaş qrupu üzrə yığmalar da bir araya gəlib.
U-18 Aqil Nəbiyevin rəhbərliyi altında toplanışa start verib. Planlarını öyrənmək üçün mütəxəssislə əlaqə saxladıq: “Ötən gün bir araya gəldik. Martın 23-dən 29-dək Qəbələdə toplanış nəzərdə tutulub. İlk məşqimizi dünən keçirdik. Hava şəraiti əlverişli deyil, qar yağıb. Meydanlar, demək olar ki, tam qarla örtülüb. Sağ olsun “Qəbələ” rəhbərliyi, bizim üçün şərait yaratdı. Meydanlardan birini təmizləyiblər. Bu gün (dünən) iki məşqimiz oldu. Növbəti gün də oyunumuz olmalıdı. Hava şəraiti imkan versə, martın 25-i və 28-də oyun keçirəcəyik. Heyətdə yeni futbolçular var. Bir neçə oyunçu U-19-a dəvət alıb. Bir yaş kiçik futbolçular da dəvət etmişik. Demək olar ki, burda olanların 70 faizi yeni uşaqlardı. Seleksiya xarakterli toplanış olacaq. Apreldə də bir araya gəlməyi nəzərdə tutmuşuq. Rəqib tapsaq, bir yoldaşlıq görüşü keçirməyi planlaşdırırıq”.
SƏNƏM FƏRHADOVA
