Sonuncu qələbəsini 14-cü turda qazanan “Turan Tovuz” son 4 turda məğlubiyyətləri sıralayır.

15-ci oyun həftəsində öz meydanında “Zaqatala”ya yenilən qərblilər ardınca səfərdə “Sabah-2”yə boyun əyib. 17-ci turda “doğma divarlar” arasında “Qəbələ-2” önündə “ağ bayraq” qaldıran tovuzlular yığmaların oyunları ilə bağlı yaranan fasilə ərəfəsində lider “Qaradağ Lökbatan”a uduzmaqla hazırda 17 oyundan sonra 17 xalla turnir cədvəlinin 10-cu pilləsində qərarlaşıb ki, bu da növbəti mövsüm premyer-liqaya gətirələcəyi deyilən komandanın adına heç də yaxş hal sayıla bilməz.

Bəlkə də qərblilərin baş məşqçisi Rövşən Babayev də bunu başa düşdüyündən baş məşqçi postundan getmək qərarına gəlib. “Football-plus.az” saytına daxil olan məlumata görə, “Qaradağ Lökbatan” ilə qarşılaşmadan sonra ardıcıl məğlubiyyətləri həzm edə bilməyən çalışdırıcı istefa vermək fikrinə düşüb.

Məsələyə aydınlıq gətirmək üçün Babayevlə danışmaq istəsək də, 46 yaşlı mütəxəssis zənglərimizi cavabsız qoydu. Belədə “Tovuz Turan”ın Müşahidə Şurasının sədri Oqtay Abdullayevlə əlaqə saxladıq. Oqtay bəy məlumatı nə təsdiq, nə də təkzib etdi:

“Bütün suallara sabah aydınlıq gələcək”.

RƏŞAD