https://www.football-plus.az/ Yazarlar - Football-plus.az true https://www.football-plus.az/86634-67694.html kenan Manşet / Yazarlar Sun, 19 Jul 2026 13:47:34 +0400 “Neftçi”nin Sloveniyada “Osiyek”ə qarşı keçirdiyi yoxlama oyununu izləyə-izləyə dərin düşüncələrə daldım. Alçaq bir təpənin fonunda standartları elə də yüksək olmayan bir futbol meydançası idi. “Neftçi” də Xorvatiya təmsilçisi ilə orda qarşılaşırdı. Gözümün qarşısına Qəbələ şəhər stadionunun fonunda hər zaman bizə boylanan əzəmətli, bol meşəli o dağ gəldi. Fikirləşdim ki, bizdə o “əjdaha”dan, yəni meşəli dağdan və dağ havasından varsa, nə üçün onun ətrafında 4-5 dənə stadion tikib, xarici və yerli klublar üçün təlim-məşq toplanışı keçirə bilmirik?

Bu yaxınlarda oxumuşdum ki, Qətərin “Əl-Haraitiyat” komandası Azərbaycana gəlib. Ərəblərin məqsədi Qəbələdə təlim-məşq toplanışı keçməkdi. Bu toplanış həm də bizim klubların işinə yarayacaq, onlar Azərbaycanı tərk etmədən beynəlxalq səviyyəli hazırlıq oyunu keçirmək imkanı qazanacaqlar. “Sumqayıt”la “Şamaxı”nın bu fürsətdən yararlanması çox yaxşı addımdı. Çox arzulayardım ki, gələcəkdə belə imkanlar artsın. Bunun üçünsə “Əl-Haraitiyat” kimi Azərbaycana toplanışa gələn əcnəbi klubların sayı çoxalmalıdı. Belədə bizimkilər də toplanış üçün xaricə getməzlər. Artıq xərc çəkməyə də ehtiyac olmaz.

Xaricə təlim-məşq toplanışına getmək üçün Avstriyada, Sloveniyada, lap elə Türkiyədə xərclənən pullara neynəmək olar? Əlbəttə, uşaq futboluna, akademiyalarına diqqəti artırmaq, həmin pulu azərbaycanlı balaları üçün xərcləmək mümkündü. Kinonun ağlamalı yeri də elə budu. Bizim klublar uşaq futbolu adı gələndə ora pul xərcləməyə həvəs göstərmirlər. Amma elə ki, xaricə təlim-məşq toplanışına yollanmaq məsələsi ortaya çıxır, buna dərhal pul tapırlar. Elə legionerlərə pul xərcləmək məsələsində də belə həvəslidilər. Ona görə də Azərbaycan futbolu illərdi yerində sayır, klublarımızda yerli futbolçuların sayı sürətlə azalır, millidə oynatmağa səviyyəli futbolçu tapa bilmirik.
Amma çıxış yollarından biri də məhz budu.

“Yuventus”, “Benfika” kimi tanınmış Avropa klubları Ermənistanda özlərinə uşaq akademiyaları açır. Di gəl ki, Azərbaycan klubları burdan-bura bölgələrə ayaq qoymaq, ordakı futbol infrastrukturunu inkişaf etdirmək haqda düşünmürlər. Bu yükü həmişə “Qəbələ” çiynində daşıyıb, Azərbaycan futbolu üçün fabrik rolunu oynayıb. Artıq “Qəbələ”nin də imkanları tükənib, təkbaşına bu vəzifənin öhdəsindən gələ bilmir. “Neftçi” ilə “Sabah” yaxasını kənara çəkib, özlərini paytaxt təmsilçisi kimi təqdim edə bilərlər. Lakin bu da bəhanədən başqa bir şey deyil. Nə üçün elə Qəbələnin özündə, yaxud Qusarda, Qaxda, lap elə Lənkəranda “Neftçi”nın və ya “Sabah”ın adına futbol məktəbi, təlim-məşq bazaları olan infrastruktur olmasın?

Yararsız legionerlərə, xaricdə keçirilən bahalı təlim-məşq toplanışlarını xərclənən pullardan qənaət edib, bu layihəni həyata keçirmək olar.

Təbiəti səfalı olan bir çox rayonlarda ayrı-ayrı nazirliklərin, şirkətlərin, hətta təhsil ocaqlarının istirahət evlərinə, təlim bazalarına rast gəlirik. Bunu futbol klublarımız da edə bilər. Hansısa kənddə bir neçə sot torpağı alıb, azı bir meydança salmaq, ordakı istedadlı uşaqların məşq etməsi üçün şərait yaratmaq elə də böyük xərc tələb etmir. Milyonçu klublarımız üçün bu məbləğ lap qəpik-quruş olar.

Təşəbbüsü elə “Neftçi” dəstəkləyib, ilk addımı da o ata bilər. Özünü hər fürsətdəcə “xalq komandası”, “bayraqdar” adlandıran “ağ-qaralar” Azərbaycanın bölgələrində özünə futbol akademiyaları, təlim-məşq bazaları açmaqla xalqa daha yaxın ola bilər. “Turan Tovuz” Tovuzdan gəlib, Kürdəxanıda özünə baza tikibsə, eynisini “Neftçi” də Tovuzda tikə bilər. Həm də bu baza Bakıdakından daha ucuz başa gələr. Əvəzində 100 uşaq orda futbolla məşğul olar. Əminəm ki, onların arasından gələcəkdə “Neftçi”nin formasını şərəflə və uğurla daşıya biləcək azı beş futbolçu çıxacaq.

“Xalq komandası” olmaq üçün sözün əsl mənasında xalqın komandası olmaq, xalqa tərəf getmək lazımdı. Təklifi biz verdik, qaldı bizim klubların bu təklifi dəyərləndirməsi. Faydasını həm özləri görəcək, həm də Azərbaycan futbolu. Əmin ola bilərsiz.

AMAL]]> true https://www.football-plus.az/86529-neftci-cempion-olmaq-isteyir-ancaq-nece-yazi.html admin2 Yazarlar / Manşet Wed, 15 Jul 2026 10:52:00 +0400 Azərbaycan futbolundan söz düşəndə, dərhal yada düşən komandalaran biri də “Neftçi”di. Sonuncu dəfə 5 il əvvəl çempion olan “ağ-qaralar” indiyə qədər “Qarabağ”ın hegemonluğuna dözməliydisə, artıq “Sabah” da var. Litvadan bir mütəxəssis gəldi və yerli, əcnəbi – bütün mütəxəssislərə “əlcək atdı”. Elə “Neftçi”nin “sükanı arxasında” da əcnəbi dayanıb. Ukraynalı Yuri Vernidub Sloveniya toplanışı zamanı keçirilən hər yoxlama oyunundan sonra işlərin qaydasında olduğunu, komandanın gücləndiyini deyir.

4 oyunun yalnız birində qələbə qazanan, tezliklə Konfrans Liqasında oynayacaq “ağ-qaralar” doğrudanmı güclənib. Ən azı şübhə etməyə haqqımız var!

Komandanı avrokuboklara daşıyan 6 oyunçu ilə yollar ayrılıb. Düzdü, bu uğurda onların hər biri eyni dərəcədə rol oynamayıb. Amma gedənləri yalnız 4 futbolçu əvəzləyib - Rüfət Abbasov, Qustavo Klisman, Endryu Qravilyon, Lyubomir Tupta. Freddi Varqasla bağlı problem hələ həllini tapmayıb. Lap tapsa da belə, onun heç bir yoxlama oyununda iştirak etməməsi, yenilərlə oyun əlaqələrinin formalaşmaması yaxşı heç nə vəd etmir. 90 illiyində çempionluğu hədəf götürən klub bu gün üçün yetərincə ləng davranır. Lənglikdən söz düşmüşkən... “Neftçi” Konfrans Liqasında iştirak ərizəsini iyulun 17-si, saat 23.59-a qədər tədqim etməlidi. Heç olmasa, Varqası ərizəyə sala bilsəydilər... Varqas, ver qaz!

İSRAYIL XEYRULLAYEV]]> true https://www.football-plus.az/86478-titul-kimin-haqqidi.html admin2 Yazarlar / Manşet Tue, 14 Jul 2026 17:29:00 +0400 Oyunlar və mərhələlər arxada qaldı, iş elə gətirdi ki, sonda yarımfinala məhz dünyanın reytinqinə görə ən gücü 4 komandası – Argentina, İspaniya, Fransa və İngiltərə çıxdı.

Bu komandaların hər birinin heyətində parlaq ulduzlar var. Lionel Messi, Lamin Yamal, Kilian Mbappe, Harri Keyn... Əlbəttə, bu gün bütün dünyada məhz Fransanın çempion olacağını düşünənlərin sayı daha çoxdu. Bir qədər də konktetləşdirsəm, ümumi fikir belədi ki, DÇ-2022-nin finalı təkrarlanacaq, yəni yenə də həlledici oyunda Fransa ilə Argentina qarşılaşacaq. Düzdü, bu da maraqlı son olardı; Fransa üçün Qətər mundialının qisasını almaq, Argentina üçün Messinin futbolda son sözünü deməsi baxımından. Ancaq şəxsən mənim fikrim sizin üçün maraqlıdısa, İngiltərə - İspaniya variantı üzərində dayanardım. Əslində belə final da özünəməxsus qisas ssenarisidi. Axı “qırmızı furiya” 2024-cü ildə məhz “üç şir”i məğlub etməklə Avropa çempionu olub. Finalın belə variasiyasına rəng qatan başqa amil də var: 19 yaşını dünən tamamlayan Yamal futbolun nəhəngi, gələn ay 33 yaşını tamamlayacaq, çox güman, bir də heç vaxt indiki kimi yüksək səviyyədə oynamayacaq Keynə qarşı.

Mənə elə gəlir ki, dünya futbolunda haqq etdiyi qiyməti almayan oyunçuların önündə məhz Keyn qərarlaşıb. Düzdü, əsas günahkar özüdü, daha doğrusu, “Tottenhem”ə sədaqəti. Harri karyerasının ən parlaq dönəmini bu komandaya həsr etdi. Arada qısa müddətə başqa komandalara icarəyə verilsə də, İngiltərənin paytaxtında tam 12 il keçirdi. Heç bir titul gətirməyən 12 il. Təsəvvür edin ki, “mahmızlar”dan titulsuz ayrılan Keyn son üç ildə “Bavariya” ilə artıq 4 titul qazanıb. Bu gün sanki ikinci gəncliyini yaşayır, qoldan, komanda yoldaşlarını arxasınca daşımaqdan doymur. Karyerasında son zəng çalınır, bir qədər yekəxana ifadə kimi görünsə də, nədənsə mənə elə gəlir ki, futbol ona bir böyük titul borcludu. Avropa çempionluğu alınmadı, İngiltərə ardıcıl iki finalda İtaliya ilə İspaniyaya uduzdu. 3-cü cəhddə dünya çempionluğunu qazansa, bunun nəyi pisdi ki?!

Heç nəyi! Pis olan budu ki, dünya çempionatı tədricən sona yaxınlaşır. Bizi yalnız son 4 oyun gözləyir. Yəqin ki, ən müxtəlif səbəblərdən bu qədər çox söz-söhbət doğuran başqa mundial olmayıb. Əlbəttə, əvvəllər də gözəl qollar olub, ulduzlar da parlayıb, sürpriz nəticələr də qeydə alınıb, amma eyni vaxtda bir neçə ulduzun yığmasını titul uğrunda mübarizədə diri saxlaması... Belçikanın “qızıl nəsl”inin qalıqları son dəfə özünü göstərməyə çalışdı, alınmadı, şənbədən bazara keçən gecə Erlinq Holann da dayandı, meydanda məhz girişdə adını çəkdiyim ulduzların komandaları qaldı.

“Titul kimin haqqıdı” elə sualdı ki, hər kəs özünə görə bu futbolçulardan hansınısa seçə, öz həqiqətini dilə gətirə bilər. Düzünə qalsa, Messi, Mbappe, Yamal və Keynin hər biri üçün onlarda dəlil tapmaq olar. Bu futbolçulardan ikisi – Mbappe və Yamal elə yaşdadı ki, dəfələrlə titul uğrunda mübarizəyə qoşula bilər. Əlbəttə, hansısa qeyri-adi hadisə karyeralarına son qoymasa. Messi və Keyn isə artıq karyerasının qürub çağındadı. Onlar üçün sual belə qoyulub: ya indi, ya da heç vaxt. Əslində Messi bir dəfə bu suala müsbət cavab verib, karyerasında çatışmayan yeganə titulu da qazanıb. Keyn bundan sonra da “Bavariya”nın heyətində müxtəlif titullar qazana bilər. Ancaq yığma səviyyəsində artıq nəsə qazanacağı qətiyyən inandırıcı görünmür.

Mən bir qədər əvvəl Belçika futbolunun “qızıl nəsl”inin son çırpıntılarından danışdım. Bu ifadəni İngiltərə yığmasına da aid etmək olar. Ardıcıl iki qitə birinciliyində finala, ardından dünya çempionatında yarımfinala çıxmaq asan məsələ deyil. Kim bilir, İngiltərə futbolu bir də nə vaxt belə nəsil yetişdirəcək. Odu ki, hər şeyin, illərdi çəkilən əziyyətin nəticəsi bir titul, bir tac olsaydı, futbol həm də yaradıcılarına münasibətdə çox gözəl bir jest edərdi. Bilirəm ki, bütün bunlar sizə futboldankənar yanaşma, məsələn, İngiltərə yığmasının hansısa azarkeşinin xatirə dəftərindən romantik lövhə kimi görünür. Amma Keyn futbola sədaqətinə, vəfasına, alicənab və centlmen obrazına görə bir böyük titulu haqq etməyibmi? Doğrudan da, titul kimin haqqıdı?

HUŞƏNG]]> true https://www.football-plus.az/86460-6738.html admin2 Manşet / Yazarlar Tue, 14 Jul 2026 10:52:00 +0400 Təbii ki, baş məşqçi Yuri Vernidubla "Neftçi"ni sərlövhədə bir-biriylə əlaqəsi olmayanlar kimi təqdim etdiyimə görə məni qınaya bilərsiz. Axı ukraynalı postuna təyin olunduğu gündən özünü illərin "Neftçi"lisi kimi aparır. İstər yerli, istərsə də xarici mətbuata açıqlamalarında kluba bağlılığından, hədəflərinin böyüklüyündən bəhs edir. Mütəxəssis son müsahibəsində bir qədər də irəli gedib və çempionluq arzusunu dilə gətirib:

"Niyə Azərbaycanda da çempion olmayım ki?!"

Görünür, Valdas Dambrauskaslı "Sabah"ın "Qarabağ"ı uzun müddət sonra “taxtdan endirməsi” ölkəmizdə fərqli klubların da çempion ola biləcəyi gerçəyini ortaya qoyub. Lakin bütün tələblərin qarşılanması şərti ilə. Demək olar ki, qüsursuz sistemə malik "köhlən atlar" ən kiçik səhvi belə bağışlamır. İş ondadı ki, Vernidub çempionluğa tamah salsa da, "ağ-qaralar"da bu cür əhval-ruhiyyə müşahidə edilmir. Yox-yox, paytaxt təmsilçisinin çempion olması mümkünsüz deyil. Hətta büdcə, azarkeş dəstəyi, infrastruktur kimi amilləri nəzər alsaq, "Neftçi"nin belə uğuru heç kimi təəccübləndirməz. Ancaq bakılıların mövsümlərarası fasiləyə yanaşması bu yöndə ümid vermir.

Bəli, komanda təlim-məşq toplanışı üçün başqa ölkəyə - Sloveniyaya yollanıb və orda yoxlama oyunları keçirir. Lakin kollektivin heyətin formalaşdırmasıyla bağlı siyasətindən çempionluq niyyətinin qoxusu gəlmir. "Ağ-qaralar" yay "transfer pəncərəsi"ndə bir yerli, üç əcnəbi futbolçuyla güclənib. Hələ üstəlik "Neftçi" Konfrans Liqasında mübarizə aparacaq. Premyer-liqa və ölkə kubokunda da uğur qazanmağın vacibliyini nəzərə alsaq, paytaxt təmsilçisinin daha çox transferə ehtiyacı var. Hələ onu demirik ki, bu ərəfədə "Qarabağ" transferlərdən doymur, "Sabah"da isə daş atsan, futbolçuya dəyər.

Kəsəsi, "Neftçi" həqiqətən də 90 illik yubileyini azı bir titulla qeyd etmək istəyirsə, kisənin ağzını bir qədər də açmalıdı. Vernidubla müqavilə müddətini uzatmaq bəs deyil. Çünki gəmi su buraxırsa, kapitan ən yaxşı halda öz canını qurtara bilər!

KƏNAN BAHADIR]]> true https://www.football-plus.az/86416-duran-dusunmemek-bir-ayib-bunu-dile-getirmek-iki-ayib-replIka.html admin2 Yazarlar / Manşet Sun, 12 Jul 2026 10:52:41 +0400 “Qarabağ”ı “Seltik”ə dəyişən Kamilo Duran bu klubun mətbuat xidmətinə diqqətçəkən açıqlamalar verib. Hər futbolçunun yeni komandaya keçəndə dediyi sözlər öz yerində. Ancaq kolumbiyalının bəzi ifadələri var ki, qıcıq doğurmaya bilməz. Söhbət məhz bu sözlərdən gedir:

“Seltik”in mənimlə maraqlandığını eşidəndə heç bir tərəddüdüm olmadı. Təklifə düşünmədən razılıq verdim”.

Əslində həm baş məşqçi Qurban Qurbanovun, həm də “Qarabağ”ın prezidenti Tahir Gözəlin bu transferlə bağlı dediklərindən aydın olur ki, qərar məhz Durana məxsusdu. Onun getməsini nə mütəxəssis, nə də prezident istəyirmiş. Klubun ayrılığı açıqladığı mətndə də qeyd olunduğu kimi, burda yalnız qarşı tərəflə futbolçunun istəyindən söhbət gedir.

Əlbəttə, daha çox maaş almaq, daha böyük turnirlərdə iştirak, xüsusən, millidə çıxış etmək hər futbolçunun arzusudu. Görünür, məhz bu məqamları nəzərə alan Duran Azərbaycanı tərk etmək qərarına gəlib. Həm də Çempionlar Liqasında möhtəşəm oyun göstərməsinə, liqa mərhələsində 5 qol vurmasına rəğmən, Kolumbiya millisinə çağrılmamasını premyer-liqamızın səviyyəsi ilə də əlaqələndirib. O başqa məsələ ki, “Seltik”in ÇL-də iştirakının da bu qərarda əvəzsiz rolu olub. Lakin...

Duran “Qarabağ”la müqavilə imzalayanda “Transfermarkt”dakı qiyməti 200 min avro idisə, indi 2 milyon avrodu. Yəni 10 qat baha! Bununla belə, “Seltik” onun üçün 5,5 milyon funt sterlinq ödəyəcək.

Təbii ki, futbolçunun belə inkişafı “Qarabağ”ın və Qurban Qurbanov sayəsindədi. Odu ki, heç düşünmədən “köhlən atlar”ı tərk etmək qərarını vermək bir ayıbdısa, bunu dilə gətirmək ikinci ayıbdı. Heç şübhəsiz, Duran bu məqamı nəzərə almalı, Qurban bəyin əməyini belə tez unutmamalıydı. Amma buna da tab gətirərik. Çünki elə bir neçə gün əvvəl “Qarabağ”dan “Polesye”yə transfer olunan Leandro Andrade də Bakıdan uçar-uçmaz Azərbaycanla bağlı hər şeyi hafizəsindən silmiş kimi davranmış, yeni klubunun mətbuat xidmətinə açıqlamasında burdakı karyerası barədə bir kəlmə də deməmişdi...

KƏNAN BAHADIR]]> true https://www.football-plus.az/86297-54.html admin2 Manşet / Yazarlar Wed, 08 Jul 2026 11:02:01 +0400 Kim nə deyir-desin, çox maraqlı dünya çempionatı izləməkdəyik.

Meydanda parlaq mübarizə gedir, təşkilatçılar oyunların yaddaqalan olması üçün əlindən gələni edir, bəzən komandalar da hədəfə çatmaq üçün hər cür hoqqabazlığa əl atır. Bu turnirdə hoqqabazlığını miqyası böyük, elementləri zəngindi. Amma hoqqabazlığın və hoqqabazların gec-tez cəzalandırıldığını da görürük.

Bilirsizmi, hardan başlayacam? 48 komandalı formatdan irəli gələn qüsurdan yararlanıb, 3-cü turun oyunlarını məzhəkəyə çevirən komandalardan. Qrup mərhələsinin son turunda 8 yığmanın hesabı razılaşdırmaq, yəni sövdələşmək imkanı var idi. Söhbət İsveçrə, Kanada, Yaponiya, İsveç, Paraqvay, Avstraliya, Əlcəzair və Avstriyadan gedir. İsveçrə ilə Kanada heç bir danışığa getmədi, halal oyunda avropalılar qələbə qazandı. Ardından 1/16 finalda İsveçrə Əlcəzairi, Kanada Cənubi Afrikanı məğlub etdi, yəni 1/8 finala çıxdı. Onların futbola sədaqətini İlahi Ədalət belə mükafatlandırdı. 1:1 hesablı heç-heçəyə razılaşan Yaponiya ilə İsveçin taleyi necə oldu? “Samuraylar”ı Braziliya cəzalandırdı, skandinaviyalıları da Fransa. Əlcəzair və Avstraliya yığmasının oyunçuları aktyorluq bacarığını ən usta şəkildə göstərdi, həmin oyunda hesab 1:1 yox, 3:3 oldu. Əlcəzair 1/16 finalda İsveçrəyə uduzmaqla evə yollanmağı haqq etdi, Avstriyanı da İspaniya darmadağın etdi. 3-cü turun 0:0 bitən Avstraliya – Paraqvay oyununun nəticəsi də əvvəldən razılaşdırılmışdı. Salahlı Misir Avstraliyanın cəzasını çəkdi. Sövdələşənlərdən yalnız Paraqvay 1/8 finala adladı ki, onu da həmin mərhələdə Fransa məğlub etdi. Kəsəsi, futbol ona xəyanət edənləri, hoqqabazlığı sevmir və bağışlamır! Onun da haqq-hesabı, bax, belə olur!

Hoqqabazlıq mövzusunu davam etdirəcəm. Meksikalı azarkeşlər həm Ekvadorla, həm İngiltərə ilə oyundan əvvəl rəqib komandaların futbolçularına cəhənnəm əzabı yaşatdı. Ekvadorlular hətta otelin yaxınlığında fasiləsiz səs-küy salan və oyunçularını təhdid edən meksikalılarla bağlı FİFA-ya şikayət etdi. Amma meksikalılar sakitləşmədi və İngiltərə ilə oyundan əvvəl də həmin hərəkəti təkrarladı. Onlar ingilislərin qaldığı otelin qarşısına toplaşaraq, gecə saatlarında baraban və trubalardan istifadə edib, mahnılar oxuyub, fişənglər atıblar. Təbii ki, məqsəd rəqib futbolçuların istirahətinə mane olmaq idi. İngiltərə Futbol Assosiasiyası komandanın yerləşdiyi məkanı gizli saxlamağa çalışsa da, azarkeşlər otelin yerini müəyyənləşdirib. Nəticə nə oldu? İngiltərə Meksikanı məğlub edərək mübarizədən kənarlaşdırdı.

Hoqqabazlıqdan söz düşmüşkən, Braziliya yığmasına da toxunmalıyam. Bu komandanın ölkəmizdə azarkeş ordusunun olduğunu bilirəm. Bəlkə də deyəcəklərim onların xətrinə dəyəcək. Amma Karlo Ançelottinin baş məşqçi postuna gəlişindən tutmuş Neymarın penaltini dəqiq yerinə yetirəndən sonra rəqib qapıçıya dil çıxarmasına, onunla sözləşməsinə qədər bu yığma ətrafındakı çox şey hoqqa idi. Nəticə qazanmaq üçün gətirilən praqmatik italiyalı mütəxəssis Braziliya futbolunu ilkin təbiətindən tam uzaqlaşdırdı, yığmanı Avropanın ortabab komandalarından birinin səviyyəsinə endirdi, mundial üçün heyət seçimi ilə ölkədə çoxlarının narazılığına səbəbkar oldu. Sonda nə gördük? Faktiki heç nə! Yaponiyanı böyük çətinlik bahasına turnirdən kənarlaşdıran pentakampeonlar özləri də 1/8 finalda dayandı. Bu artıq şəxsən mənim də könül verdiyim, 80-90-cı illərdə oyunu ilə göz oxşayan Braziliya yığması deyil. Ənənəvi kombinasiyalar, düşünülmüş hücumlar, driblinqlər ilə zəngin Braziliya futbolu yoxa çıxıb, əvəzinə avropalıların oynamağı xoşladığı “intellektual” futbol gəlib. Heç cür qəhrəman ola bilməyən Neymar haqda isə heç danışmağa dəyməz. Bir ulduz karyerasının qürub çağında necə fiasko yaşaya bilər, oyunu yox, meydandankənar hərəkətləri ilə necə gündəmin ulduzu ola bilər – bax, son illərin Neymarı dediyim kateqoriyaya tam uyğun gəlir. İndi onun göz yaşlarının saflığına, səmimiliyinə inanmaq da çətindi. Neymar ulduz oldu, amma peşəkar ola bilmədi!

Bu rubrika altında dərc olunan yazılarda FİFA-nın təşkilatçılıq yolunda böyük əziyyət çəkdiyini, turnir ətrafında bayram ab-havası yaratmaq üçün əlindən gələni etdiyini yazmışam. Amma qurumun ABŞ yığmasının hücumçusu Folarin Baloqunla bağlı son qərarı da mənə hoqqabazlığı xatırlatdı, ünumiyyətlə, bütün dünyada narazılıq doğurdu. Folarin Bosniya və Hersoqovina ilə 1/16 final oyununda birbaşa qırmızı vərəqə ilə qovularaq cəzalı duruma düşmüşdü. FİFA əvvəlcə onun Belçika ilə 1/8 final oyununu buraxacağını açıqlasa da, sonradan qərarını dəyişdi, “qırmızı”nı ləğv etdi, daha doğrusu, şərti cəzaya çevirdi. Deyilənə görə, ABŞ prezidenti Donald Tramp FİFA prezidenti Canni İnfantinodan Baloqunun cəzasının ləğvini xahiş edib, o da razılıq verib. Bu versiyada zərrəcə həqiqət payı varsa, onda çox böyük biabırçılıq yaşandığını deyə bilərik. Heç bir siyasi liderin iradəsi FİFA-nın qaydalarından və futbol qanunlarından yüksəkdə dayanmamalıdı. Çox təəssüf ki, Baloqun nümunəsi ilə zərərli bir tendensiyanın əsası qoyuldu. Bu qərar yalnız ABŞ yığmasına nəsə qazandıra bilər, dünya futboluna yox!

HUŞƏNG]]> true https://www.football-plus.az/86273-Uc-musketyor-baslayir.html admin2 Yazarlar / Manşet Tue, 07 Jul 2026 15:14:25 +0400 Avrokuboklara vəsiqə qazanan üç klubumuz bu həftə mövsümün ilk oyunlarını keçirəcək.

Məlum olduğu kimi, bu gün “Sabah” “Nyu Seynts”i, sabah “Zirə” “Torpedo”nu, birisigün “Qarabağ” “Vestri”ni sınağa çəkəcək. Bütün komandaların matçları evdə olacaq. Deməli, futbolsevərlər üçün əla fürsət yaranıb. Onlar istər kafe və restoranlarda, istər evdə, istərsə də tribunalarda həmin oyunları izləyə, bizimkilərin qələbə uğrunda mübarizəsindən zövq ala bilər. Onsuz da azarkeşlərin bu barədə hansısa problemlə üzləşmək ehtimalı azdı. Məhz yuxarıda adlarını sadaladığımız klubların, xüsusən “Qarabağ”ın avrokuboklarda müntəzəm çıxışı sayəsində ölkədə futbolsevərlərin oyun günüylə bağlı adət-ənənələri formalaşıb, artıq hamı həmin anda nə edəcəyini bilir. Belədə qalan məsuliyyət klubların üzərinə düşür ki, tərəfdarların kefinə soğan doğramasın, yediyini-içdiyini burnundan gətirməsin.

Bəs, bu ehtimal nə dərəcədə yüksəkdi? Axı arzumuz “Neftçi”nin baş məşqçisi Yuri Vernidub demişkən, bir-iki mərhələ keçib yarışları əli ətəyindən uzun tərk etmək deyil. Azı iki klubun ölkəmizi əsas mərhələlərdə təmsil etməsini istəyirik! Təbii ki, bu istiqamətdə favoritlər “Sabah”, “Qarabağ” və “Neftçi”di. Son iki mövsümdə uğurlu nəticələrə imza atan Masazır təmsilçisi ötən il yalnız ölkə kubokunu qazandısa, bu il “qızıl dubl”a imza atdı. Bu səbəbdən, “bayquşlar”dan gözləntilər bir qədər də artıb. Hər halda, ölkə daxilində “Qarabağ”ı qabaqlayırsansa, avrokuboklarda həmin uğurun təsadüf olmadığını əsaslandırmağa məcbursan. Bununla belə, “Sabah”ın oyun tərzi, demək olar, qüsursuzdu. Kollektivin ölkə kubokundakı və premyer-liqadakı hegemonluğu təkcə “köhlən atlar”ın Çempionlar Liqasının əsas mərhələsində çıxış etməsi ilə bağlı deyil. İstisnaları nəzərə almasaq, hamı komandanın “qızıl dubl”u haqq etdiyinə əmindi. Odu ki, Masazır təmsilçisinin Çempionlar Liqasında uğurlu debüt etməkdən başqa yolu yoxdu. Təkcə “Nyu Seynts”lə oyunları demirik ha!

İş ondadı ki, “bayquşlar”ın daha güclü görünməsinə rəğmən, “Qarabağ”ın əsas mərhələdə çıxış edəcəyinə əmin olanların sayı daha çoxdu. Bunun üçün o qədər haqlı səbəb var ki, iki əlin barmaqlarına sığmaz. Təkcə baş məşqçi Qurban Qurbanovun adı, təcrübəsi bəs edir ki, ağdamlıların pley-off mərhələsinə qədər bütün matçlarda aşkar favorit olacağını düşünək. Ancaq burda narahatlıq doğuran məqamı da nəzərə almalıyıq. Söhbət “Qarabağ”ın heyətində edilən köklü dəyişikliklərdən gedir. Çünki 8 futbolçuyla yollarını ayıran komanda 8 transfer edib. Əlbəttə, bu addımları start heyətində 11 nəfərin top qovduğu idman növü üçün genişmiqyaslı islahat adlandırmalıyıq. Ancaq buna görə ümidləri üzməyə dəyməz. Futbolçuların bir-birinə uyğunlaşması, Qurban bəyin sistemini mənimsəməsi üçün müəyyən qədər vaxt var.

Həmçinin təsnifat mərhələsindəki rəqiblərin “köhlən atlar”ın “dişinə görə” olduğunu bilirik. Həmin vaxtdan da səmərəli istifadə, ardıcıl uğurlu nəticələr kollektivin motivasiyasın da müsbət təsir edəcək və proses sürətlənəcək. Təbii ki, bu, ağlagələn ən nikbin proqnozdu. Allah uzaq eləsin, hadisələrin axarı plana uyğun irəliləməsə, baş məşqçinin B planı işə düşməlidi. Varsa... O başqa məsələ ki, olmalıdı! Həqiqətən də, bu ərəfədə bu cür dəyişikliklər böyük riskdi... Yenə də “Qarabağ”ın əsas mərhələyə vəsiqə qazanacağına qəlbdən inananların sırasında biz də varıq!

O ki qaldı “Zirə”yə. Məlum səbəblər üzündən uğursuz mövsüm keçirsə də, avrokuboklara vəsiqə qazanan “qartallar”ın şansı yüksək qiymətləndirilmir. Bəli, qəsəbə təmsilçisi Rəşad Sadıqovun rəhbərliyi altında böyük təcrübə qazanıb. Ancaq komandanın bugünkü maliyyə durumu, ötən ayın 15-dək hələ Konfrans Liqasında çıxış edib-etməyəcəyinin bilinməməsi kollektivin hazırlıq prosesinə mənfi təsir göstərib. Hələ onu demirik ki, mövsümün sonunda hədəfə çata bilmədiyini görən “Zirə” xeyli aparıcı futbolçuyla yollarını ayırdı. Hazırda heyətlə bağlı ən ciddi problem isə qapı mövqeyində yaşanır. Çünki Tyaqo Silvanın davamçısı kimi transfer edilən Maykon Kleyton məşqdə zədələnib. Hazırda “çərçivə” üçün namizədlər Anar Nəzirov, Aydın Bayramov və Hüseynəli Quliyevdi ki, Rəşad bəy daha çox Aydına etibar etməyə məcburdu. Bu qolkiper avrokuboklarda sonuncu dəfə 2021/22 mövsümündə “Sumqayıt”ın şərəfini qoruyarkən çıxış edib. Qalan mövqelərlə bağlı problemlər də çoxdu. Hər halda, “Zirə” mümkün qədər irəliləməklə təcrübəsinə təcrübə qatmağa məcburdu.

Öz aramızdı, daim yerli məşqçilərə güvənilməməsiylə mübarizə aparan Rəşad Sadıqov əsas mərhələyə vəsiqə qazanmaqla həmkarlarına da böyük fayda verə bilər. Hələ “qartallar”ın qazancını demirik.

“Neftçi” ilə bağlı durum isə hələ bulanıqdı. Bəli, klub başa çatan mövsümdə uğur qazandı. Ancaq davamlılığı təmin etmək məqsədilə sükanı belə saxlamaq lazımdı. Bunun üçün isə yoxlama oyunları keçirilməli, heyətin komplektləşdirilməsi tamamlanmalıdı. “Ağ-qaralar” haqda yalnız həmin gündən etibarən ağızdolusu danışmağa dəyər...

KƏNAN BAHADIR]]> true https://www.football-plus.az/86284-sabaha-boyuk-umidlerle.html admin2 Yazarlar / Manşet Tue, 07 Jul 2026 12:00:52 +0400 Dünya çempionatı futbol azarkeşlərinin başını əməlli-başlı qatıb. Fikrimiz-zikrimiz uzaq Amerikadadı, hər axşam bir-birindən maraqlı və gərgin qarşılaşmaları izləyirik, günümüzü də bu oyunlarının təəssüratı, müzakirəsi ilə keçirir. Buna görə də vaxtın necə gəlib keçməsindən də xəbərimiz olmayıb. Bir də gözümüzü açıb görürük ki, yeni avrokubok mövsümü başlayır və təmsilçilərimiz də meydana çıxmağa hazırlaşır.

Dünya çempionatının təəssüratından ayrılmaq çox da asan olmasa da, buna məcburuq. Artıq özümüzkülərin oynadığı oyuna baxıb, onların futbolundan danışmalıyıq. Həm də bir həqiqət də var. Ataların məşhur deyimini bir qədər fərqli formaya çevirib, qulağımıza sırğa etməliyik. Bu deyim də ondan ibarətdi ki, dünya çempionatı gəldi-gedərdi, bizə qalan öz futbolumuz olacaq.

Elə bu deyimi rəhbər tutub, diqqəti Azərbaycan klublarının avrokuboklardakı oyunlarına yönəltməliyik. Şəxsən mən bu axşam Argentina millisinin Misirlə qarşılaşmasına baxmayacam. Yox, Messinin futbolundan doymamışam. Yaxşı başa düşürəm ki, futbol dünyası onunla və portuqaliyalı Ronaldo ilə yavaş-yavaş sağollaşmaq üzrədi. Bu gün belə ulduz futbolçuları meydanda topun arxasınca qaçan gördüyümüz üçün şanslıyıq. Amma neynəmək olar?! Argentina ilə Misir meydana çıxan saatda Azərbaycan çempionu “Sabah” Masazırda Uelsdən bizə qonaq gələn “Nyu Seynts”i qəbul edəcək. Əlbəttə, təkcə dünya çempionatının cazibəsi yox, “Qarabağ”ın bizə izlətdirdiyi oyunların afişası bu qarşılaşmanı bizim üçün sıradan bir oyuna çevirir. Fikirləşirik ki, Masazırdakı görüş o qədər də əhəmiyyətli deyil və orda meydana çıxacaq futbolçular bizim dəstəyimiz olmadan da rəqibin işini bitirəcəklər. Lakin bu cür yanaşma bizi aldada da bilər.

“Sabah”ın çox hörmətli baş məşqçisi Valdas Dambrauskas bizdən inciməsin. İstəsək də, istəməsək də, vəziyyət belədi ki, azərbaycanlı futbol azarkeşləri “Sabah”ı “Qarabağ”la hələ uzun müddət müqayisə edəcəklər. Bundan qaçmaq yaxın zamanlarda mümkün görünmür. Qurban Qurbanov və onun komandası azərbaycanlı futbol azarkeşlərinin avrokuboklardan gözləntilərini, bizim klublarla bağlı tələblərini artırıb. “Sabah” Azərbaycan çempionu olmaqla çiyinlərinə böyük məsuliyyət götürüb. Bu məsuliyyəti qürurla daşımaq və avrokuboklarda Liqa mərhələsinə qədər uzun bir yol qət etmək lazımdı. Bu yolun əsas dayanacağı Çempionlar Liqasının əsas mərhələsi olsa, nə xoş bizə. Bununla “Sabah” ölkə futbolunun tarixində yeni bir səhifə açar, “Qarabağ”dan heç nə ilə geri qalmadığını isbatlamış olar.

Yaxşı başa düşürəm ki, Çempionlar Liqasının debütantından birdən-birə belə uğur gözləmək çətindi. Ona görə də gözləntilərimizi bir qədər aşağı edib, ən yaxşı halda Avropa Liqasının liqa mərhələsi ilə, ən pis halda isə Konfrans Liqasının əsas mərhələsi ilə məhdudlaşdırırıq.

Bu axşam Masazıra yollanarkən həmin o nikbin ümidləri də özümüzlə birlikdə aparacağıq. Bəli, avrokuboklara hamı iddialı başlayır, hər kəs uğur qazanmaq istəyir. Bunu bacarıb-bacarmamaq, buna layiq olub-olmamaq isə mübarizənin gedişində görünür. Bizim Azərbaycan çempionu “Sabah”a ümidlərimiz böyükdü. Komandanın uğur qazanmaq, bizi sevindirmək üçün böyük potensialı var.

Qısa müddətdə “Sabah”la birlikdə böyük yol keçən və komandaya çempionluq qazandıran baş məşqçi Valdas Dambrauskas öz postundadı. Şübhə etmirəm ki, klub rəhbərliyinin ona olan inamı və dəstəyi indi daha da yüksək səviyyədədi. Litvali baş məşqçi sərəncamındakı əsas oyunçuları da saxlaya bilib. “Çərçivə”də inamlı görünən Stas Pokatilov da yerindədi, özünü “bakılı balası” adlandırıb, azarkeşlərə sevdirə bilən Coy-Lens Mikels də. Bu iki futbolçudan başqa Puxaç, Simiç, Mbina kimi aparıcı legionerlərlə yeni müqavilələr imzalanıb. Aron Maluda “Sabah”ın tamhüquqlu üzvüdü və ötən mövsüm premyer-liqada nümayiş etdirdiyi oyunu indi daha yaxşı formada avrokuboklarda göstərməli, komandanın uğurlarında böyük pay sahibi olmalıdı.

Bir sözlə, bu axşam “Sabah”a inanmaq üçün yetərincə əsasımız var. Çempionluğu qazanan, Azərbaycanda özünə rəqib tanımayan futbolçular elə bu axşam gücünü Uels çempionu “Nyu Seynts”ə göstərməlidi. Uğurlu başlanğıcdan sonra davamını gətirmək çətin olmayacaq. Uğur olsun, “Sabah”!

AMAL]]> true https://www.football-plus.az/86210-alma-memun-ahini-cixar-ahes-aheste.html admin2 Manşet / Yazarlar Sun, 05 Jul 2026 11:00:10 +0400 Bugünlərdə Jorj Kaşkilya ilə vidalaşan "İmişli"də "yarpaq tökümü" davam edir.

Aran təmsilçisinin portuqaliya mütəxəssislə yolları ayırmasının ədalətsiz qərar olduğunu yazmışdıq. Çünki premyer-liqa debütantının mövsümü 9-cu pillədə tamamlayacağını, demək olar, heç kim təxmin etmirdi. Lakin Kaşkilya minimum imkanlardan maksimum yararlandı.

İş ondadı ki, "pələnglər" hədəfə çatan, ümidləri doğruldan futbolçuların da günahını alır. Daha doğrusu, klub mövsümlərarası fasilədə nə az, nə çox 10 futbolçuyla - Abbas Ağazadə, Xəzər Mahmudov, Həzrət İsayev, Elmir Rəhimzadə, Riad Abbaszadə, Orxan Fərəcov, Lətif Rzayev, Andrey Sinenka, Rafael Vieqaş və Hüseynəli Quliyevlə vidalaşıb. Əlbəttə, onların hər birinin komandanın premyer-liqadakı yerini qoruyub-saxlamasında müstəsna əməyi var. Axı təkcə "İmişli"nin ev oyunlarını doğma məkanda yox, Qubada - kələ-kötür, palçıqlı stadionda keçirməsi haqda fakt bəs edir ki, həmin oyunçuların hansı çətinliklərə rəğmən, döyüşdüyünü təxmin edək.

Aran təmsilçisinin çatışmazlıqları bununla yekunlaşmır. Komanda çoxsaylı ayrılıqlar fonunda cəmi bir transfer edib. 1-ci liqada iştirak edən MOİK-dən Seyxan Fərəcov alınıb. Həmçinin, "pələnglər"in yeni baş məşqçisi hələ bugünlərdə bilinib. Ev oyunlarının harda olacağı isə hələ də açıqlanmayıb. Görünür, yeni çalışdırıcı Fərid Namazovun sınağı daha çətin olacaq.

Hər halda, "İmişli" bu qədər günah almaqla xoşbəxtliyə çata bilməz. Nə deyək? Babalı başbilənlərin boynuna!

KƏNAN BAHADIR]]> true https://www.football-plus.az/86153-axrinci-defe-olsun-elvin.html admin2 Yazarlar / Manşet Fri, 03 Jul 2026 10:52:00 +0400 “Qarabağ”ın futbolçusu Elvin Cəfərquliyevin başına gələnlərdən hamı xəbərdardı. Bu üzdən müdafiəçinin baş məşqçi Qurban Qurbanovun qərarıyla əsas komandadan uzaqlaşdırılmasından qayışına qədər başverənlərə geniş yer ayırmağa ehtiyac yoxdu.

Konkret onu xatırlatmalıyıq ki, oyunçunun qovulmasıyla bağlı aprelin 17-də üzə çıxan xəbərdən sonra yaşananlara “köhlən atlar” Tirola yollanmasıyla yekun vuruldu. Üzə çıxdı ki, Qurban bəy Elvinin də Avstriya toplanışında iştirak etməsinə qərar verib. Düzdü, bundan sonra da onun bağışlanıb-bağışlanmadığı sual altında idi. Çünki mütəxəssis futbolçunun formasını bərpa etməsinə və daha baha qiymətə satılması üçün şəraitin yaranmasına hesablanmış addım da ata bilərdi. Ancaq Elvinin Tirolda keçirilən oyunlarda şans qazanması, hətta “Metallist 1925” ilə matçda start heyətində yer alması bu ehtimalı böyük ölçüdə azaltdı.

Hər halda, bu gün Cəfərquliyevin yenidən əsas komandada möhkəmlənməsi, start heyətində daimi şans qazanması üçün şans var. Və Elvin başına gələnlərdən dərs çıxarıbsa, bu fürsətdən maksimum yararlanacaq. O başqa məsələ ki, onun komandadan ayrılmaq ehtimalı da hələ qüvvədədi. Sadəcə, bunun üçün həm futbolçuya, həm də “Qarabağ”a sərfəli olacaq təklif gəlməlidi. O da yoxdu. Təbii ki, ötən il fırtınalar qoparan, yeni ilə də möhtəşəm start verən futbolçunun real təklif almaması bəzilərində sual doğura bilər. Lakin buna təəccüblənməməliyik. Azı ona görə ki, Qurban Qurbanov nəinki ölkəmizdə, həm də beynəlxalq miqyasda tanınır və xüsusən bu il Çempionlar Liqasında qazandığı uğurlara görə daha da şöhrətlənib. Hamı, eləcə də Elvini heyətində görmək istəyən klublar durumla maraqlandıqda Qurban bəy kimi mütəxəssisin yanlış qərar verməyəcəyinə əminliklə yanaşır. Öz aramızdı, niyə şübhə duysunlar?! Axı Cəfərquliyev kimi futbolçu əsas komandadan kiçik səhv üzündən qovula bilməz!

Hər halda, bu gün hər şey geridə qalıb. Yuxarıda da dediyimiz kimi, Elvin üçün önəmli fürsət yaranıb. Bunu futbolçunun atası Eldar kişi də deyir. Onun “Teleqraf”a müsahibəsində dediyi sözlərə fikir verin:

“Ona bir ağsaqqal kimi yol göstərdim. Əslində elə böyük problem də yox idi. Hadisə baş verdi, cəzalandırıldı və yenidən kluba qayıtdı. Çalışmalıdı ki, bundan sonra daha intizamlı olsun”.

İndi deyirsiz, Elvin günahlara o qədər batıb ki, nəinki Qurban Qurbanovun, atasının məsləhətlərini də qulaqardına vuracaq? Qətiyyən! Əminik ki, bundan sonra yaşıl meydanlarda daha istəkli, daha çevik, daha iddialı, daha güclü Elvin görəcəyik. Yenə rəqiblərini qabaqlayacaq, komandasının fərqlənməsi üçün əlverişli şərait yaradacaq, daha böyük uğurlara imza atacaq, hətta bəlkə də özünü bütün futbol ictimaiyyətinə əfv etdirib, 2026-cı ilin də ən yaxşı futbolçusu seçiləcək! Bəli, futbolçunun bunun üçün hələ vaxtı var. Qarşıdan yeni mövüm gəlir ki, 6 ay ərzində həm millidə, həm də “Qarabağ” da özünü yaxşı tərəfdən göstərə bilər.

Ancaq Eldar kişi müsahibədə Akif babadan da söhbət açır. Yəqin xatırlayarsız, söhbət ötən ay ağdamlıların bazasına gələn, Qurban Qurbanov və futbolçular ilə görüşən, yeni mövsüm ərəfəsində sevimli komandasına xeyir-dua verən azarkeşdən gedir. Eldar kişi deyir ki, Qurban bəy Akif babanın xahişindən sonra Elvini bağışlayıb. Bu üzdən övladıyla birgə azarkeşlə görüşəcək, ona təşəkkür edəcəklər. Heç şübhəsiz, çox vacib addımdı. Çünki Akif baba həm də yerli, istedadlı futbolçunun təmiz səhifə açmasına yardımçı olub və Cəfərquliyev ona ömrünün sonuna qədər borclu olacaq!

Həm də biləcək ki, səhv edərkən təkcə özünə yox, həm də onu sevən minlərlə azarkeşə pislik edir, qəlb qırır, onları üzür.

Göründüyü kimi, həqiqətən də hər şərdə bir xeyir var. Elvin bəlkə indi həm də ictimaiyyət üçün məlum olduğundan daha önəmli fiqur olduğunu anlaya, təkcə özünü yox, həm də böyük fanat kütləsini təmsil etdiyini dərk edə! Öz aramızdı, növbəti səhv olsa, Qurban bəy Elvini nəinki Akif baba, heç Allah baba da gəlsə, bağışlamayacaq!

KƏNAN BAHADIR]]>