Fransadakı legionerləri oynatmadılar
Qadın voleybolçular arasında Türkiyə çempionatında təsnifat yarışı başa çatıb. Son turda “Fənərbaxça” gözlənilmədən Manisada “Seramiksan”a uduzub – 0:3 (20:25, 17:25, 15:25). Polina Rəhimova 14 xalla komandasının ən məhsuldar oyunçusu olub. Odina Bayramova isə 6 xalla meydan sahiblərinin qələbəsinə töhfə verib. “Beşiktaş” İstanbulda “Nilüfər Bələdiyyəsi”nə qalib gəlib – 3:0 (31:29, 25:23, 25:22). Marqarita Əzizova hesabına 3 xal yazıb. “Bəylikdüzü” isə İstanbulda autsayder “İlbank”ı darmadağın edib – 3:0 (25:15, 25:19, 25:18). Yana Kulan 14 xalla komandasının lideri olub.
Beləliklə, “sarı-lacivərdlilər” təsnifat yarışını 45 xalla 4-cü yerdə tamamlayıb. “Qartal” 29 xalla 6-cı pillədə qərarlaşıb. Bu komandalar pley-offda iştirak hüququ qazanıb. 9-cu “Bəylikdüzü” (25) və 10-cu “Seramiksan” (24) üçün mövsüm başa çatıb. İlkin pley-off mərhələsində “Fənərbaxça” “Bursa BB”, “Beşiktaş” isə “Qalatasaray” ilə münasibətləri aydınlaşdıracaq.
Fransa çempionatında 19-cu turun oyunları keçirilib. “Le-Kann” evdə “Qimper”i üstələyib – 3:1 (25:20, 25:21, 18:25, 25:22). Alyona Həsənova bu oyunun iştirakçısı olmayıb. “Venell” isə azarkeşləri önündə “Nant”a məğlub olub – 1:3 (25:10, 23:25, 24:26, 23:25). Anastasiya Qurbanova yenilgini kənardan izləyib. “Le-Kann” 36 xalla 4-cü, “Venell” 25 xalla 6-cıdı. Növbəti turda “Le-Kann” “Şamalye”ni qəbul edəcəksə, “Venell” “Vandovr”un qonağı olacaq.
İtaliya A seriyasının 20-ci turunda “Skandiççi” səfərdə gözlənilmədən lider “Konelyano”ya qalib gəlib – 3:0 (25:14, 25:22, 25:20). Yelizaveta Səmədova bu qarşılaşmada da meydana çıxmayıb. 45 xalla ilk “3-lüy”ü qapayan “Skandiççi” növbəti turda “Berqamo” səfərinə yollanacaq.