Martın 5-də AFFA İntizam Komitəsinin (İK) növbəti iclası keçirilib. Budəfəki toplantı premyer-liqada 19-cu, birinci divizionda isə 17-ci, eləcə də 15-ci turdan turdan təxirə salınan və bazar ertəsi keçirilən bir oyunda baş vermiş qayda pozuntularının müzakirəsinə həsr olunub.
Premyer-liqa oyunlarından cəmi birində cəza və cəriməyə əsas verən pozuntu aşkarlanıb. Söhbət “Neftçi” – “Sabah” qarşılaşmasından gedir. Debütant üzərində qələbə meydan sahiblərinə 1000 manat bahasına başa gəlib. “Ağ-qaralar”ın 6 üzvü sarı vərəqə alıb ki, bu, 800 manat cərimə deməkdi. Bundan başqa, 84-cü dəqiqədə ikinci xəbərdarlıqdan sonra “qırmızı” alan Məhəmməd Mirzəbəyov klubunu 200 manat ziyana salıb. Müdafiəçi həftəsonu “Sumqayıt”la baş tutacaq görüşü də buraxmalı olacaq.
Diviziona gəlincə, 15-ci turdan təxirə salınmış “Qarabağ-2” – “Zirə-2” matçının 78-ci dəqiqəsində ağdamlıların üzvü Hüseyn Novruzov ikinci sarı vərəqə alaraq meydandan kənarlaşdırıldığı üçün 1 oyun cəzalanıb, klub 20 manat cərimələnib. Son turda isə 14 komandadan 9-u “qarmağa keçib”. “Ağsu” – “Səbail-2” matçı PFL-i 1040 manat irəli salıb ki, məbləğin 960-ı meydan sahiblərinin payına düşür. “Səbail-2”, sadəcə, matçın protokolunu vaxtında təqdim etmədiyinə görə 80 manat cərimələnib. 36-cı dəqiqədə “Ağsu”nun futbolçusu Fərrux Rəhimov hakimi təhqir edib. Komitə intizamsız futbolçunu 4 oyunluq diskvalifikasiya edib, kluba 320 manat cərimə kəsib. İki dəqiqə sonra aqressiv davranışa görə birbaşa “qırmızı” alıb komandasını meydanda 9 nəfərlə qoyan Sahib Cümşüdov isə növbəti 2 turda iştirak etməyəcək. Onun davranışı klubu 160 manat ziyana salıb. AFFA nümayəndəsi raportunda “Ağsu”nun təhlükəsizliyi tam təmin etmədiyini yazıb ki, belədə klub daha 400 manat cərimələnib. Bu azmış kimi, bölgə təmsilçisi sarı vərəqələrin bolluğuna görə də 80 manat “tərləyib”.
“Qaradağ Lökbatan” – “Kəpəz” qarşılaşmasının ikinci hissəsi 3 dəqiqə gec başlayıb ki, bu, meydan sahiblərinin səhlənkarlığı ucbatından baş verib. Buna görə klub 240 manat cərimələnib. “Keşlə-2” – “Sabah-2” matçında isə hər iki komanda ziyana düşüb. 85-ci dəqiqədə qonaqlardan Tahir Zeynalov, 90+6-da isə meydan sahiblərindən Vüqar Həsənov birbaşa qırmızı vərəqə alıb. Hər ikisi 2 oyunluq cəzaya və 160 manat cəriməyə məruz qalıb. “Zaqatala” – “Turan Tovuz” matçındakı vərəqə bolluğu hər iki tərəfi 80 manat ziyana salıb. Oyunun 90+5-ci dəqiqəsində Tovuz təmsilçisinin üzvü Emin Bağırov “qırmızı” alıb ki, ona tətbiq olunan “48-ci maddə” 1 oyun və 20 manat cəriməni özündə ehtiva edir. “Sumqayıt-2” və “Şüvəlan” isə sarı vərəqələrin 4 və daha çox olması səbəbindən hərəyə 80 manat “tərləyib”.
Beləliklə, komitə klublara 2960 manatlıq cərimə kəsilib. Nəticədə mövsümün əvvəlindən cərimə sanksiyaları üzrə nəzərdə tutulan məbləğ 104580 manata çatıb.