Emin Abbasov: “Reza Azərbaycan əsillidi, əslən Culfadandı”
Hücum xəttində yalnız Marko Deviçin ümidinə qalan “Sabah” bu gedişlə mövsümün sonuna qədər Ukrayna yığmasının sabiq forvardından asılı olacaq. Hər halda, qış fasiləsində və geridə qalan bir ayda lazım olan hücumçunun tapılmaması belə düşünməyə əsas verir. Əvəzində başqa mövqelərin gücləndirilməsi prosesi sürətlə davam edir.
Fasilədə yalnız yerli futbolçularla güclənən “tələbələr”in növbəti transferi əcnəbi olacaq. Elşad Əhmədov Ekvador yığmasının sol cinah oyunçusu Anibal Çalanın nəyə qadir olduğunu görüb, biləndən sonra keçidə “hə” deyib. Artıq iki gündü Bakıda olan cənubi amerikalının bu gün tibbi müayinədən keçib, klubla 2 illik müqavilə imzalayacağı gözlənilir.
Tanıtmaya gəlincə, sol ayağı işlək olan futbolçu həm müdafiədə, həm də yarımmüdafiədə çıxış etmək bacarığı ilə seçilsə də, əsasən arxa xətt oyunçusu kimi tanınır. 1996-cı ildə anadan olan Çala peşəkar karyerasına 2013-də, 17 yaşında yerli “El Nasyonal”da başlayıb. Ardıcıl dörd il bu komandanın şərəfini qoruyub aparıcı fiqura çevrilməsi amerikalıların diqqətindən yayınmayıb. Odu ki, MLS-də mübarizə aparan “Dallas” 2017-də Anibalın transferi üçün ekvadorlulara 620 min avro (təxminən 1 milyon 240 min manat) ödəsə də, ABŞ-da oynamaq qismət olmayıb. Yenidən vətəninə qayıdıb, bu dəfə “LDU Quito” ilə anlaşıb. Son iki ili bu komandada keçirməklə 2018-in çempionu adını qazanıb. Maraq üçün qeyd edək ki, Çala ötən il Ekvador çempionatında və “KONMEBOL Sudamerikana”da üst-üstə 16 oyunda meydana çıxıb. Sonuncu dəfə 3 ay əvvəl, dekabrın 8-də “Delfin”lə matçda iş başında olub.
Daha bir üstünlüyü Ekvador yığmasına dəvət almasıdı. Millinin 2018-in oktyabrındakı oyunlara cəlb olunsa da, Oman və Qətərlə qarşılaşmaların hər birində 45 dəqiqə meydanda olub.
Növbəti futbolçu da legionerdi. Lakin yeni deyil, artıq əvəzedici komandanın heyətində meydana çıxmağa, hətta qol vurmağa da imkan tapıb. Söhbət Reza Biqdelodan gedir. Bəlkə o da əsas komanda üçün nəzərdə tutulub. Ola bilsin, gəncdi, ya da oyun təcrübəsinin azlığından əziyyət çəkir deyə, bir müddət “Sabah-2”də top qovması məqsədəuyğun sayılıb. Rezanın kimliyinə və komandada necə peyda olmasına aydınlıq gətirmək üçün klubun icraçı direktoru Emin Abbasovla əlaqə saxladıq: “Rezanı komandaya əvəzedici komandanın baş məşqçisi Vasif Haqverdiyev cəlb edib. 2000-ci ildə anadan olub. Azərbaycan əsillidi, əslən Culfadandı. Bacarıqlı futbolçudu, xoş gələcək vəd edir. Gəldiyi gündən xoş təsir bağışlayır. Hətta “Keşlə-2” ilə son qarşılaşmada qol da vurdu. Bu cür davam etsə, əsas komandaya cəlb olunması mümkündü. Hələ ki əsas komandanın məşqçilər heyəti Rezanı izləyir”.
HƏBİB