Zaur Axundov kimi oynatmaq lazım olduğunu məşqçiyə deyirdi”
Qış fasiləsində "Keşlə"dən ayrılan, bir müddət pulunun dalınca Bakıya gəl-get edən Bahodir Nasimovun karyerasını vətənində davam etdirəcəyini xəbər vermişdik. O, ölkəsinin "Novbahor" klubuna keçib. Forvard bugünlərdə Özbəkistan mətbuatına müsahibə verib və "Keşlə" rəhbərliyi haqda qalmaqallı fikirlər səsləndirib. Nasimovun interfutbol.uz saytına müsahibəsini diqqətinizə çatdırırıq.
- Azərbaycan klubu ilə birillik müqaviləniz var idi. Necə oldu ki, "Novbahor"a keçdiz?
- Səbəb odu ki, "Keşlə"də daim ehtiyatda qalırdım. Son matçlarda, ümumiyyətlə, heyətə düşmürdüm. Məni "qaralamışdılar", artıq oyun praktikası sarıdan əziyyət çəkirdim. Klub rəhbərliyi ilə görüşərək, ayrılmaq istədiyimi söylədim.
- Oynamamağınızın səbəbi nə idi?
- Son 6 ay ərzində komandada üç məşqçi dəyişikliyi oldu. Ən böyük problem odu ki, rəhbərlik həmişə baş məşqçinin işinə qarışır. Hətta vəziyyət o həddə çatmışdı ki, klub prezidenti kimi oynatmaq lazım olduğunu məşqçiyə deyirdi. Məni oyunların sonuna 5-10 dəqiqə qalmış meydana buraxır, maksimum bir hissə oynamağa icazə verirdilər. Sonda dözmədim və müqaviləyə xitam verilməsini xahiş etdim.
- Klubun sizə borcu qalıb?
- Xeyr, bura gələndə klub bütün pulu ödədi və müqaviləyə xitam verilməsi ilə bağlı bütün sənədləri aldım.
- Deməli, Azərbaycana növbəti səfəriniz uğursuz alındı, istədiyiniz kimi olmadı...
- Bəli, uğursuz alındı. Sözün düzü, mən də kollektivə uyğunlaşa bilmədim və "Keşlə" düşündüyüm qədər güclü deyildi. Digər tərəfdən, hər bir futbolçu uğursuzluğun səbəbini özündə axtarmalıdı.
- Karyeranızı Azərbaycanda davam etdirmək variantı olmadı?
- Xeyr, başqa klublardan təklif gəlmədi.
- "Novbahor"un heyətində təlim-məşq toplanışında iştirak etdiz, hətta yoxlama görüşündə qol da vurduz. Sizi bura kim dəvət etdi?
- "Novbahor"a baş məşqçinin dəvəti ilə gəldim. Azərbaycanda olarkən Andrey Antanasoviç zəng vurub, komandaya kömək etməyə hazır olub-olmadığımı soruşdu. Fikirləşdim ki, orda ehtiyatda oturmaqdansa, "Novbahor"a kömək edərəm. Qarşıma məqsəd qoydum ki, vurduğum qollarla azarkeşləri sevindirəcəm.
MİRAĞA hazırladı
P.S. Maraqlıdı ki, Bahodir dünən sport24.az saytına verdiyi açıqlamada dediklərini təkzib edib: “Mən deməmişəm ki, heyəti rəhbərlik müəyyənləşdirir. Heç buna bənzər ifadə də işlətməmişəm. Bu, jurnalistin təxəyyülünün məhsuludu”.