Dünən Bakı vaxtı ilə 16.30-da qadınlardan ibarət yığmalar arasında AÇ-2021-in seçmə mərhələsinin püşkatma mərasimi başlayıb. Tədbir UEFA-nın İsveçrədəki mənzil-qərargahında keçirilib. Püşkatmaya 47 komandanın nümayəndəsi qatılıb. Cənubi Kipr və Kosovonun qadınlardan ibarət yığması ilk dəfə sözügedən turnirdə iştirak edəcəksə, bizim milli 2009-cu ildən sonra qitə birinciliyinə dönüşünü qeyd edəcək. Final mərhələsinə evsahibliyi edəcək İngiltərə istisna olmaqla, qalan yığmalar qruplara səpələnib. Yığmamız püşkdən öncə sonuncu - 5-ci səbətdə qərarlaşıb. Beləliklə, D qrupuna düşən komandamız İspaniya, Çexiya, Polşa və Moldova ilə üz-üzə gələcək. Ümumilikdə millilər 9 qrupa bölünüb. Bunların ikisində 6, yeddisində 5 yığma mübarizə aparacaq. İndi isə qrupların tərkibini diqqətinizə çatdırırıq.
A qrupu: Hollandiya, Rusiya, Sloveniya, Türkiyə, Kosovo, Estoniya
B qrupu: İtaliya, Danimarka, Bosniya və Hersoqovina, İsrail, Malta, Gürcüstan
C qrupu: Norveç, Uels, Belarus, Şimali İrlandiya, Farer adaları
D qrupu: İspaniya, Çexiya, Polşa, Moldova, AZƏRBAYCAN
E qrupu: Şotlandiya, Finlandiya, Portuqaliya, Albaniya, Cənubi Kipr
F qrupu: İsveç, İslandiya, Macarıstan, Slovakiya, Latviya
G qrupu: Fransa, Avstriya, Serbiya, Qazaxıstan, Makedoniya
H qrupu: İsveçrə, Belçika, Rumıniya, Xorvatiya, Litva
İ qrupu: Almaniya, Ukrayna, İrlandiya, Yunanıstan, Monteneqro
Seçmə mərhələdə mübarizə avqustun 26-da start götürəcək və gələn il sentyabrın 22-dək davam edəcək. Qrup qalibləri və ikinci yerlər arasında ən yaxşı nəticə göstərən 3 komanda final mərhələsinə vəsiqə qazanacaq. İkinci yeri tutan digər 6 komanda arasında isə pley-off oyunları keçiriləcək.
Oyunlar bu il 26 avqust - 3 sentyabr, 30 sentyabr - 8 oktyabr, 4-12 noyabr, gələn il 2-11 mart, 6-14 aprel, 1-9 iyun və 14-22 sentyabr tarixlərində oynanılacaq. Gələn il oktyabrın 19-da və 27-də pley-off mərhələsinin görüşləri baş tutacaq. Final mərhələsinin püşkatma mərasimi gələn ilin sonlarında, həlledici mərhələnin oyunları isə 2021-ci ilin iyulunda İngiltərədə keçiriləcək.
FARİZ