Zeynal Kərimzadə: “Bu dəqiqə heç bir kommersiya marağımız yoxdu”
Dünən “Gənclik”də “Gilavar”ın tədbiri idi. “Yeri var” ləqəbli restoranın yox. Cəmi bir ildi fəaliyyət göstərən və gələcəklə bağlı ciddi planlar quran bu adda uşaq futbol məktəbinin 1 yaşı tamam olurdu. “Caspian” ticarət mərkəzinin yanında yerləşən “Azfar”ın meydançasına çox sayda valideynin və kifayət qədər tanınan idmançıların təşrif buyurmasına “Gilavar”ın ad günü səbəb olmuşdu. “Neftçi”nin futbolçuları Ruslan Abışovla Tural Axundov, “Araz”ın və futzal millisinin əsas qapısıçı Rövşən Hüseynli, həmçinin AZAL-dakı çıxışları ilə yadda qalan Nuqzar Kvirtiya 1 yaşlı səbəbkarı təbrik etmək üçün istirahət günü olmasına baxmayaraq, adı çəkilən məkana üz tutmuşdu.
Xeyli sayda valideynin də iştirak etdiyi tədbirdə gələcəyin ulduzları hazırda top qovan futbolçularla şəkil çəkdirmək imkanı qazanandan sonra xüsusi hazırlanmış çərçivədə topla bacarıqlarını nümayiş etdirdilər. Klubun təsisçisi və rəhbəri Zeynal Kərimzadə, həmçinin əsas məşqçi Namiq Həsənov ad günü ilə bağlı fikirlərini deyib, gələcəklə bağlı arzularını dilə gətirdilər. Sonda üzərində “Gilavar” yazılmış tort kəsildi, hər kəs furşet masası arxasına toplaşdı.
Biz də öz növbəmizdə Zeynal bəyə yaxınlaşıb, “Gilavar”ın dünəni, bu günü və sabahı ilə bağlı suallara cavab tapmağa çalışdıq.
- Belə bir klubun yaradılması ilə bağlı təşəbbüs kimdən gəldi?
- Özüm futboldan uzaq adamam. O mənada ki, futbolla məşğul olmamışam. Uzun illərdi tam fərqli sektorda – maliyyə sahəsində çalışıram. Ötən il bu vaxt oğlum 2,5 yaşındaydı, onu futbola yazdırmaq istəyirdim. Bu məqsədlə klub axtarmağa başladım və məlum oldu ki, 3 yaşlı uşağı qəbul edəcək belə bir klub yoxdu. Belə deyim, bazarın boş olduğunu görüncə ağlıma belə bir ideya gəldi. Həm öz oğlumun, həm də futbola həvəs göstərən başqa uşaqların bu işlə məşğul olması üçün “Gilavar”ı yaratdım.
- Məqsədiniz, hədəfləriniz nədən ibarətdi?
- Bu gün klubda 3-12 yaş aralığında uşaqlar futbolun sirlərinə yiyələnir. Bu, uşaq futbol məktəbidi, böyük futbola keçidlə bağlı planımız yoxdu. Sadəcə, özümüzdəki və xaricdəki peşəkar futbol klubları üçün layiqli futbolçular yetişdirmək istəyirik. Dəqiq desəm, təməllərinin sağlam qurulmasında maraqlıyıq.
- Belə başa düşdüm ki, hədəf pul qazanmaq deyil.
- Bu dəqiqə heç bir kommersiya marağımız yoxdu. Planımız uzunmüddətli investisiya üçün hesablanıb. Bəlkə də nə vaxtsa bu işə gəlir mənbəyi kimi baxmaq mümkündü. Söhbət indidən gedirsə, qazanc götürməkdən çox, oğlum da daxil olmaqla, başqa uşaqların gələcəkdə adından söz etdirməsi yönündə işlər görürük. Ümumi məqsəd isə ölkə futboluna xidmət etməkdi.
- Hazırda neçə uşaq “Gilavar”da futbolun sirlərinə yiyələnir?
- Qeydiyyatda 80-ə yaxın uşaq var.
- Seçim turları olur? Ümumiyyətlə, kluba uşaqlar necə cəlb olunur?
- Üç aydan bir seleksiya xarakterli məşqlərimiz olur. Hər yaş qrupuna uyğun istedadlı uşaqlar seçilir. Məşqçilərimizin perspektiv gördüyü uşaqlar seçilir və onlara pulsuz abunə imkanı yaradılır. Heç bir ödəniş etmədən hazırlığa qatılırlar.
- Uşaqların 12 yaşından sonrası üçün planlarınız necədi?
- Bununla bağlı bir neçə peşəkar klubla danışıq aparırıq. Bu işdə mütləq tramplin rolunu oynayan klublar olmalıdı. Klubun açılışında “Qəbələ” Futbol Akademiyasının baş skautu Böyükağa Ağayev iştirak etmişdi. O vaxt da futbolçuların mübadiləsi mövzusunda söhbətimiz olmuşdu.
- Ölkə daxilində keçirilən hansısa çempionat və ya turnirlərdə iştirak etmək niyyətiniz var?
- Hazırda AFFA tərəfindən 6-8 yaş aralığında uşaqlar arasında “Akademiya kuboku” adlı yarış keçirilir. Həmin yarışda iştirak edirik və artıq 2 oyun oynamışıq. Yetərincə güclü rəqiblər olmasına baxmayaraq, müqavimət göstərməyə çalışırıq.
- Əsas məsələ: aylıq ödəniş neçə manatdı?
- Məktəbdən-məktəbə fərq var. Həftədə 2, ayda 8 dəfə olmaqla 60 manatdı. Bu, “Gənclik” filialımızdadı, şənbə və bazar günləri. “Xətai” filialımızda isə həftədə 3, ayda 12 məşq olmaqla aylıq ödəniş 30 manatdı.
- Meydançaların icarə haqqı, məşqçilərin maaşı və inventarlaşmanı nəzərə alsaq, qazancınız xərcləri qarşılaşamağa imkan verir?
- Sözsüz, müəyyən çətinliklər olur. Çalışırıq ki, yoluna qoyaq.
- Klubda neçə məşqçi işləyir?
- Hazırda üç məşqçi ilə əməkdaşlıq edirik. Baş məşqçimiz Namiq Həsənovdu. Digəri Namiq İsgəndərov və ukraynalı Riçard Hotradı. Məşqçilərimiz UEFA-nın B və C kateqoriyaları üzrə lisenziyaya sahibdilər.
- Klubun tanınması yönündə nə kimi işlər görürsüz?
- Yaranan ilk gündən “feysbuk” və “instaqram” kimi sosial şəbəkələrdə səhifələrimizi yaratmışıq. Kifayət qədər də fəallıq var. Saytımız da var, sadəcə, hazırda üzərində yenilənmə ilə bağlı işlər görülməkdədi. Saytda valideynlər üçün bölüm yaradılacaq ki, ata-analar ordakı məlumatlar sayəsində övladlarının inkişaf proqramı ilə tanış ola biləcəklər.
HƏBİB