“Neftçi” “transfer pəncərəsi”nin bağlanması ərəfəsində yeni hücumçu ilə gücləndi. Bu haqda çox yazılsa da, sonda “ağ-qaralar”ın forvardının italiyalı Canluka Sansone olduğu haqda məlumat verildi. Ardınca klub rəhbərliyi təcrübəli futbolçu ilə ilyarımlıq müqavilə bağladı. 31 yaşlı forvard artıq paytaxt təmsilçisinin heyətində “16” nömrəli formada debüt etməyə də imkan tapıb. O, “Keşlə” ilə qarşılaşmanın 82-ci dəqiqəsində Vangelis Platellası əvəzlədikdən az sonra Kamran Ağayevin qoruduğu “çərçivə” istiqamətinə hiyləgər zərbə vurmaqla azarkeşlərin alqışını qazanmağa da imkan tapdı. Azacıq dəqiqlik olsaydı, Sansone adını tabloya yazdıracaqdı.
Heç şübhəsiz, transferin gerçəkləşməsində Roberto Bordin amili də əsas rol oynayıb. İtalyan mütəxəssis yaxından tanıdığı həmyerlisini sərəncamında görmək üçün rəhbərliyə xahişdə bulunub ki, başbilənlər Bordinin müraciətini qulaqardına vurmayıb.
Sportinfo.az saytı Sansonenin “Neftçi”dəki qazancı haqda xəbər yayıb. Belə ki, müqavilənin ümumi dəyəri 300 min avrodu. Məbləğin 100 mini cari mövsümün 4 ayı üçün nəzərdə tutulubsa, qalan 200 min növbəti mövsüm üçün hesablanıb. Biz isə o deməkdi ki, italyan forvard ölkəmizdə olduğu müddətdə 600 min manat qazanacaq.
HƏBİB