21 yaşadək futbolçulardan ibarət yığmanın heyəti açıqlanıb. Baş məşqçi Milan Obradoviç sabah start götürəcək və üç gün davam edəcək hazırlıq prosesinə 23 futbolçu çağırıb. Bakıdakı toplanışa ötən ay olduğu kimi, yenə Azərbaycanda oynayan futbolçular dəvət alıb. Obradoviç əsasən köməkçisi Elbrus Məmmədovun çalışdığı “Sumqayıt”ın üzvlərinə üstünlük verib. Hər halda, 23 nəfərdən 7-si “gənclik şəhəri” təmsilçisindəndi. “Neftçi” U-21-də 5, MOİK, “Qəbələ” və “Qarabağ” 3, “Keşlə” 2 futbolçu ilə təmsil olunacaq. Beləliklə, hazırlıqda Süleyman Süleymanov, Ricat Qarayev, Elvin Dəmirov, Tural Bayramlı, Murad Xaçayev, Baxşəli Baxşəliyev, Süleyman Əhmədov (hamısı “Sumqayıt”), Kamran İbrahimov, Ömər Buludov, Rəhman Daşdəmirov, Anton Krivotsyuk, Əli Şirinov (hamısı “Neftçi”), Hacıağa Hacılı, İsmayıl İbrahimli, Nicat Süleymanov (hamısı “Qarabağ”), Faiq Hacıyev, Abbas Ağazadə, Əli Sadıxov (hamısı MOİK), Murad Popov, Amin Seydiyev, Rövlan Muradov (hamısı “Qəbələ”), Murad Qayalı və Nurlan Quliyev (hər ikisi “Keşlə”) iştirak edəcək.