Çərşənbə axşamı AFFA-nın İntizam Komitəsinin (İK) növbəti iclası keçirilib. Budəfəki toplantı premyer-liqanın ikinci yarısının ilk turunda, həmçinin digər yarışlarda baş verən qayda pozuntularının müzakirəsinə həsr olunub. Əvvəlcə “cərimə büdcəsi”nə təsiri olmayan qərarlardan ən önəmliləri diqqətinizə çatdıraq. Ən ağır cəza U-15 Liqası ilə bağlı olub. Belə ki, “Xilə” – “Keşlə” görüşü başa çatdıqdan sonra birincilərin məşqçisi Əsəd Kərimov hakimlər otağına daxil olaraq, onları təhqir edib və bu azmış kimi fiziki təzyiq də göstərib. Buna görə İK məşqçini bir il müddətinə diskvalifikasiya edib. Region Liqasının “Araz” (Saatlı) – “Füzuli” qarşılaşmasının fasiləsində ikincilərin inzibatçısı Ramil Məmmədov hakimi təhqir etdiyinə görə 5 oyunluq cəzalandırılıb. Bundan başqa, komitə növbəti dəfə texniki məğlubiyyət cəzaları verib ki, onlardan biri futzal üzrə yüksək liqaya aiddi. “Ekol”la qarşılaşmaya çıxmayan “Yasamal” MFK 0:5 hesablı texniki məğlubiyyət cəzasına məruz qalıb.
O ki qaldı Topaz premyer-liqasına, 4 oyundan 3-də sanksiyaya səbəb olan qayda pozuntuları baş verib. “Zirə” – “Sabah” matçında hər iki komandanın 4 üzvü sarı vərəqə ilə cəzalandığına görə tərəflər hərəyə 800 manat cərimələnib. Bundan başqa, həm “Zirə”nin, həm də “Sabah”ın nümayəndələri matçın protokolunu vaxtında təqdim etməyiblər. Nəticədə hər iki klub 800 manat cərimə ödəyəcək. Oyunun 25-ci dəqiqəsində ikinci sarı vərəqə alaraq meydandan kənarlaşdırılan “Sabah”ın üzvü Məqsəd İsayev 15-ci turu buraxacaq. Müdafiəçiyə görə klub 200 manat cərimə ödəyəcək. “Zirə”nin işi isə daha ağırdı. 62-ci dəqiqədə aqressiv davranışa görə birbaşa “qırmızı” alan Vüqar Mustafayev 2 oyunluq cəzalanıb, klubunu 1600 manat ziyana salıb.
“Qəbələ” – “Sumqayıt” qarşılaşmasında isə hakimlər otağında lazımı inventarlar olmadığına görə meydan sahibi 1600 manat ödəməlidi.
“Qarabağ” – “Neftçi” derbisi AFFA-ya 2800 manat qazandırıb. 70-ci dəqiqədə qonaqların müdafiəçisi Anton Krivotsyuk, 90+2-də isə meydan sahiblərinin yarımmüdafiəçisi Qara Qarayev ikinci xəbərdarlıqdan sonra meydandan kənarlaşdırıldıqlarına görə 1 oyun cəzalanıb, hərəyə 200 manat cərimələniblər. Bundan başqa, 10-cu dəqiqədə “Qarabağ”ın azarkeşləri tərəfindən pirotexniki vasitələrdən istifadə edilib ki, bu da 800 manat cərimə deməkdi. Ağdamlılar bununla da canını qurtara bilməyib. Belə ki, matçdan əvvəl hakimlər otağına icazəsiz daxil olan “Qarabağ”ın fiziki hazırlıq üzrə məşqçisi, bolqar Mario Dobromirov klubunu 1600 manat “tərlədib”.
Beləliklə, komitə klublara 9400 manat cərimə kəsilib. Nətcədə mövsümün əvvəlindən cərimə sanksiyaları üzrə nəzərdə tutulan məbləğ 90900 manata çatıb.
MİRAĞA